1 Morarame Sauu tõturukehse Tawi maro. Mame imũkuru Jonata Tawi se toehse. Osepeme toehse toto ipunaka Jonata zamaro Tawi exiryke, osepyno toehtoh sã ipyno toehse ynororo. 2 Morotoino Tawi tarose Sauu a tytapyĩ taka. Mame anaropopyra ropa toehse ynororo jũ tapyĩ taka. 3 Mame tõmihpyry totapose Jonata a Tawi a, jũme onytyoromara toehtohme, ipyno toexiryke, osepyno toehtoh samo. 4 Mame tupõ touse eya ekarotohme Tawi a, tykyryry soutatu zupõ maro te, typyre tapema te, taky roropa te, tymetỹ eary, enara. 5 Mame Tawi tyrohmanohpose ahtao Sauu a, emero rokẽ poko ahtao, orẽpyra toehse ynororo. Morara exiryke kapitãome tyrise ynororo Sauu a. Moro pokoino tãkye toehse Izyraeu tõ soutatu tõ emero, toto esã roropa tãkye toehse.

6 Mame mokaro soutatu tõ oepyry ropa ahtao, Koria etapaxĩpo Tawi a, nohpo tõ tooehse pata tõ poe emero, Sauu tõ eahmase. Eremiãko toh nexiase, wãko roropa pãteru tõ etõko rira tõ maro tõseahmarykõme. 7 Mame tuase toto ahtao, ynara tykase toto toremiarykõme:

— Sauu a miumãkõ totapase; Tawi a 10 miumãkõ totapase, tykase.

8 Naeroro mokaro omiry etaryke tyya tãkye pyra toehse Sauu. Tyekĩtapãse ynororo. Ynara tykase:

— Ya miume rokẽ tokarose nohpo tomo a, yrome Tawi a 10 miume tokarose. Toiro se rokẽ ynororo tuisame toehtohme, tykase Sauu.

9 Morotoino Tawi zumoxike toehpitose Sauu. Zae pyra Tawi ehtoh tupise eya.

10 Mame yrokokoro joroko tonehpose Ritonõpo a Sauu erekohmase jamihme samo. Rowohpe exikety sã toehse ynororo tytapyĩ tao. Moro tao Tawi nexiase, rira etõko, kokoro rokẽ tynyriry samo Sauu netaryme, Sauu emahpo warata nexiase.

11 Mame ynara tõsenetupuhse Sauu:

— Mose wõko ase seromaroro ypyre ke, tykase repe.

Mame warata tomase eya, jamihme samo Tawi wotohme repe. Imeĩpo tywaratã tomase ropa eya Tawi wotohme repe; yrome tõsepynanohse Tawi asakoro ehtoh pona.

12 Tawi maro Ritonõpo nexiase, Sauu maro pyra nexiase, turumekase eya. Morara exiryke enaromỹke Sauu nexiase, Tawi zuno. 13 Morarame Tawi taropose Sauu a mya, atameke toto ehtohme, soutatu esẽme Tawi tyrise eya, miume soutatu tõ tuisaryme aehtohme. Mame toto tuisaryme Tawi ahtao osetaparyhtao, 14 inyrihpyry emero kure rokẽ nexiase. Imaro Ritonõpo exiryke emese kure toehse ynororo. 15 Mame emese kure Tawi ehtoh eneryke Sauu a, zuno toehse ynororo. 16 Yrome Izyraeu tõ emero Tawi se, Juta tõ roropa ise nexiase orẽpyra toto tarose exiryke, etonatoh pona.

17 Morarame ynara tykase Sauu Tawi a:

— Mose, Merape, jẽxiry apitorymano. Mose ekarõko ase oya opytyme. Oty se rokẽ hano oya? Ypoetoryme rokẽ oexiry se ase, soutatume, orẽpyra exiketyme, Ritonõpo Kuesẽkõ omipona exiketyme osetaparyhtao, tykase Sauu.

Tõsenetupuhse Sauu tukurohtao rokene: “Kure ya pirixteu tomo a Tawi etapary. Morara ahtao onetapara ase, totapase eya xine exiryke.”

18 Yrome tozuhse Tawi a. Ynara tykase:

— Oẽxiry apoiry ypytyme kure ya repe. Yrome ime pyra ase. Papa tõ roropa ime pyra mã toto. Tuisamehxo mase. Apaniryme jehtoh poko zuaro pyra ase ipunaka, tykase ynororo.

19 Yrome Merape erẽnatoh po toehse ahtao Tawi a nohpo onekaropyra toh nexiase. Imepyny a rokẽ tokarose ynororo, Meora pono a, esety Atarieu.

20 Mãpyra Mikau, Sauu ẽxiry akorõ Tawi se toehse yronymyryme. Moro poko zuaro toehse tahtao tãkye toehse Sauu. 21 Tõsenetupuhse ynororo:

— Jẽxiry ekarõko ase Tawi pytyme aehtohme. Mame jakorehmãko mã ynororo mokyro etapapotohme pirixteu tomo a, tykase Sauu.

Morara exiryke ynara tykase ropa Sauu Tawi a:

— Ypaniryme exĩko mase.

22 Mame typoetory esã taropose Tawi a oturutohme moro poko. Ynara kahtoko Tawi a:

— Tuisa Sauu opyno mana. Ipoetory esã roropa emero opyno mã toto. Naeroro kure ẽxiry ke opytary, kahtoko, tykase Sauu.

23 Mame Tawi turuse toto a. Mame ynara tykase ynororo eya xine:

— Tuisa Sauu paniryme jehtoh kure mã repe. Yrome ywy tymõkomoke pyra ase. Ime pyra roropa ase, tykase Tawi.

24 Toytose ropa toto Sauu zuruse Tawi omihpyry poko. 25 Mame tozuhse toto Sauu a:

— Ynara kahtoko Tawi a: “Tuisa Sauu 100me pirixteu tõ etapapory se mã oya tõxiry epehpyryme imaro oerẽnatohme, topetõkara mỹpotohme,” kahtoko eya.

Yrome Tawi etapapory se Sauu nexiase pirixteu tomo a. 26 Mame Tawi turuse ahtao Sauu omihpyry poko, tãkye toehse ynororo. Sauu paniryme se toehse. Mame aerẽnatoh exisasaka toehse ahtao, 27 soutatu tõ tarose Tawi a, 200me pirixteu tõ totapase eya xine. Mame mokaro ekepyrykõ aĩpotapihpyry tarose eya Sauu a, 200me tukuhse eya ineneryme, ipaniryme toehtohme. Mame tõxiry Mikau tokarose Sauu a, Tawi pytyme ehtohme. 28 Tawi maro Ritonõpo ehtoh tonese, tonetupuhse roropa Sauu a, Tawi pyno nymyry ẽxiry Mikau ehtoh poko roropa. 29 Naeroro Tawi zunohxo toehse ynororo. Epeme pyra toehse ynororo jũme toorikyry ponãmero.

30 Mame pirixteu tõ tooehse ahtao osetapase Izyraeu tõ maro Tawi tõ toytose toto poremãkapose. Mame imehnõ Sauu poetory tõ esã motye Tawi orẽpyra toehse emese kure toexiryke; imehxo aexiry waro toehse toto emero.