1 Mame Tawi toytose Kate poe. Toepase ynororo oramã aka, pata Aturã pũtokoxi. Mame moro poko tuaro toehse tahtao xine, irui tõ toytose eya. Imehnõ jekyry tõ roropa toytose eya. 2 Etuarimaketõ roropa toytose eya, ipenekehtyamo te, imehnõ nepehmary onepehmasaromepyra exiketomo tytineruke pyra toexirykõke, enara. Mokarohne tõximõse toto Tawi maro. Mame toto tuisaryme toehse ynororo. 400me orutua kõ imaro toehse nexiase.

3 Morotoino Tawi toytose Mixipa pona Moape nonory pona, ituisary maro tõturuse ynororo, ynara tykase:

— Ajohpãme sã, ah papa tõ noehno aja maro tarona amaro xine toehtohkõme, ypoko Ritonõpo nyripory waro jehtohme, tykase eya.

4 Naeroro moroto tumykõ tynomose Tawi a Moape esẽ maro, moroto toh nexiase, tõtonẽse Tawi ahtao, soutatu tõ tapyĩ tao.

5 Mame urutõ Kate toytose Tawi enese. Ynara tykase ynororo eya:

— Taro okynã pyra exiko. Ytoko Juta nonory pona, tykase.

Naeroro moro tynomose Tawi a toytotohme itu htaka Herete pona.

6 Morarame Sauu nexiase Kipea po, ypy emory po. Typorohse nexiase wewe myhto, iwaratã nexiase emahpo. Ipoetory tõ tamuximãkõ imaro nexiase xikihme. Mame turuse ynororo eya xine Tawi tonese tyya xine exiryke. 7 Mame ynara tykase Sauu typoetory esamo a:

— Etatoko pahne wekyry tomo, Pẽjamĩ pakomotyamo! Oty ekarõko Jese mũkuru oya xihne nah, tupito tomo te, uwa tõkehko tynarykatyamo, tuisamehxo oritorỹko nae, miumãkõ esẽme te, 100mãkõ esẽme? 8 Morara exiryke yporemãkapory se hmatou? Jurupyra mexiatose osepeme umũkuru ehtoh poko Jese mũkuru maro. Ypoko torẽtyke pyra matose. Jurupyra mexiatose Tawi poko, toirõ ypoetorymã jewokãko seromaroro jorihmapotohme, umũkuru ro mã mokyro akorehmãko roropa!

9 Mame moroto Sauu poetory esã maro Toeke, Etõ põ nexiase, ynara tykase ynororo:

— Tawi enease, toytose ahtao oturuse Aimereke, Aitupe mũkuru maro, Nope po. 10 Tõturuse Ritonõpo a Aimereke zae Tawi ritoh poko zuaro aehtohme. Tonahsẽ roropa tokarose eya, pirixteu Koria pyrẽpyry tokarose roropa Tawi a, tapema.

11 Naeroro Aimereke tykohmapose Sauu a jekyry tõ maro emero, Ritonõpo maro Oturutoh tao erohketõ nexiase Nope po. Toytose toto morotona Sauu a.

12 Ynara tykase Sauu Aimereke a:

— Etako pahne, Aimereke!

— Ỹ, Tuisa, taro ase onyripory ritohme, tykase ynororo eya.

13 — Oty katohme Tawi akorehmãko mexiase jewokary poko? tykase Sauu Aimereke a. — Jese mũkuru makorehmase, tonahsẽ mekaroase eya, tapema roropa, moturuase Ritonõpo a akorehmatohme. Naeroro jakorekehkaneme toehse ynororo. Jetapary kuhnõko mã ynororo seroae ro, tykase Tawi poko.

14 Aimereke a tozuhse, ynara tykase ynororo:

— Opoetory Tawi imehnõ motye õmipona mana. Apaniryme roropa mana. Ãkorehmaneme mana, oewomananõ tuisaryme. Zae exiketyme aexiry waro emero atapyĩ taõkõ mana. 15 Toipe ywy oturũko ase Ritonõpo maro imehnõ poko zae ehtoh waro toto ehtohme. Jyhxiropyra exiko, ajohpãme samo, wekyry tõ roropa onyhxiropyra exiko, sero poko zuaro pyra jexiryke ipunaka, tykase Aimereke.

16 Yrome Sauu ynara tykase:

— Aimereke, orihnõko matose, omoro, oekyry tõ maro emero, tykase.

17 Mame tysoutatu tõ esamo a ynara tykase Sauu:

— Ritonõpo maro oturuketõ etapatoko Tawi akorehmaneme toehse toto exiryke. Aepary waro toehse toh repe, yrome jurupyra toh nexiase, tykase Sauu.

Yrome toto etapary se pyra isoutatu esã nexiase, Ritonõpo maro erohketõme toto exiryke. 18 Morara exiryke Toeke a toto taorihmapose eya:

— Etapako toto, omoro! tykase Sauu eya.

Naeroro mokaro emero totapase Toeke Etõ pono a. Moro ae ro 85me Ritonõpo maro oturuketõ totapase eya. 19 Mame mokaro maro Nope põkõ totapase Sauu a, Ritonõpo maro oturuketõ esaryme exiryke, orutua komo, nohpo tomo, poetohti te, enurusenã komo, pui tomo, jumẽtu tomo, kaneru tõ roropa emero totapase eya.

20 Yrome Apiataa, Aimereke mũkuru, toepase, Tawi maro toehtohme. 21 Tawi turuse eya Ritonõpo maro oturuketõ etapatopõpyry poko Sauu a.

22 Ynara tykase Tawi eya:

— Moroto jahtao, Toeke tonese ahtao ya, tuaro exiase, eya Sauu zururu waro exiase. Naeroro ypokoino omy tõ totapase oekyry tõ maro emero. 23 Ymaro exiko, enaromyra exiko. Mokyro oetapary se exikety jetapary se roropa mana. Ymaro osewomãko mase, tykase Tawi eya.