Pauru Nymerohpyry sero Tesaronikapõkõ Neneryme
Sero pape tymerose Pauru a. Ritonõpo nymenekahpyryme kynexine ynororo imehnõ amorepaneme. Tynymerohpyry sero taropose eya Jezu poetory tõ neneryme, Tesaronikapõkõ neneryme. Pitiko rokẽ pyra etuarimãko toh kynexine tosẽkõme Jezu enetuputyryke tyya xine.
Tynymerohpyryae Ritonõpo omipona exiketõ akorehmary se kynexine tãkye toto ehtohme Jezu maro toytorykõ poko. Jezu oepyry ropa poko toto amorepãko roropa kynexine ynororo.
1
1 Ynanymerohpyry moro onenerykõme. Taro ynanase ywy, Timoteu, Xira, enara. Ywy ase Pauru.
Amarokõ Jezu poetoryme Tesaronika po. Ritonõpo poetoryme matose, Kumykõ poetoryme, Kuesẽkõ Jezu Kyrixtu enetuputyryke oya xine.
Kure rokẽ oriporykõ se ase Ritonõpo a, torẽtyke pyra oriporykõ se roropa ase eya.
Jezu enetupuhtopõpyry Tesaronikapõkomo a
2 “Kure mase Ritonõpo,” ãko ynanase opoko xine. Oturukehpyra ynanase opoko xine Ritonõpo a. 3 Kuesẽkõ Jezu Kyrixtu enetuputyryke oya xine imehnõ akorehmãko matose. Ritonõpo se oexirykõke, imehnõ pyno roropa oexirykõke erohnõko matose Jezu ekarory poko. Jezu oepyry ropa eraximaryke oya xine aomipona matose. Moro poko oturukehpyra ynanase opoko xine Ritonõpo Kumykõ netaryme. 4 Ynara zuaro ynanase, Ritonõpo opyno xine mana. Tymenekase eya matose. Typoenõme tyrise eya matose. 5 Jezu poko oururukohtao yna a yna omiry rokẽ kara nexiase. Yna tyjamihtanohse Kurã Zuzenu a, Jezu poko ourutohkõme. Ajohpe pyra ynanekarohpyry oya xine Jezu poko. Tonetupuhse yna a roropa. Kure ynanexiase amaro xine. Zuaro matose. Tymõkomoke se pyra ynanexiase. Ãkorehmarykõ se rokẽ ynanexiase. 6 Yna typoenohse oya xine, Kuesẽkõ roropa typoenohse. Tyyryhmase iirypyrymãkomo a amarokõ repe. Yrome Ritonõpo omiry mapoiatose. Tãtãkyemase amarokomo Kurã Zuzenu poe. 7 Morarame zae oexirykõ tonese imepỹpõkomo a, Jezu poetory tomo a Masetoniapõkomo a Kyrexiapõkomo a, enara. 8 Ynanekarohpyry Jezu poko tokamose ropa oya xine Masetoniapõkomo a, Kyrexiapõkomo a, emero pata tõ punero. Oturũko toto Ritonõpo enetuputyry poko oya xine. “Mokaro Tesaronikapõkõ orẽpyra Ritonõpo enetupuhnõko mã toto,” ãko toto opoko xine. Morara exiryke oturupyra ynanase opoko xine tuaro toto exiryke. 9 Imehnõ pata poro ekãtõko toto yna ytotopõpyry poko oya xine. “Kure oseya toto, Pauru tõ maro Tesaronikapõkomo. Ahno nyrihpyry turumekase toto a, ‘Ritõkõ mokaro,’ kary se pyra toexirykõke, Ritonõpo nymyry omipona toehtohkõme,” ãko mã toto. “Toexiryro mokyro. Zae exikety roropa mokyro. 10 Imũkuru oepyry ropa momohnõko roropa Tesaronikapõkõ mana,” ãko. “ ‘Kapu ae oehnõko mana. Jezu mokyro ẽsemãkapohpyry ropa mokyro aorihxĩpo. Kukurãkanekõme mã ynororo, kuãnohpyra xine Ritonõpo ehtohme, emero tyyrypyhpykã wãnopyryhtao,’ ãko mã Tesaronikapõkomo,” ãko mã toto opoko xine.