28
Mauta po toto ehtopõpyry
1 Morarame moroto yna ahtao morotõkõ yna zuruase ahmõta esety poko,
—Mauta sero, nase toto yna a. 2 Kure rokẽ toh nexiase yna maro. Yna aroase toto tytapyĩkõ taka. Apoto tukase eya xine yna osũtohme. Konopome exiryke kõxikene ynanexiase. 3 Morarame apotopokõ tupuimase Pauru a. Apoto htaka tyriryhtao eya okoi nesekase emary pokona ynaneneryme. 4 Morara exiryke ynara tykase morotõkomo,
—Otapatõ mosero otarãme. Morara exiryke okoi nesekano. Nerypyra kynako repe. Yrome okoi naryme orihnõko mana, nase toto Pauru poko.
5 Mame pakapakahnase okoi. Toepukase apoto htaka. Yrome jetũ pyra nexiase ipoko. 6 Mame Pauru tonese eya xine. Emary zaory eraximãko toh kynexine. Axĩ aorikyry eraximãko toh repe. Yrome okyna ahtao kure ro Pauru eneryke tyya xine, ynara tykase toto,
—To! Otarãme ritõ mosero, tykase toh ipoko.
7 Moro ahmõta esẽ esety Pupuriu. Mokyro tapyĩ moe pyra kynexine. Tytapyĩ taka yna aroase kure yna ritohme. Moroto ynanynykyase oseruao. 8 Mokyro zũ kure pyra nexiase, oxirohnõko, pixihtãko, enara. Mokyro enese Pauru nomomyase inyhtoh taka. Mame Ritonõpo a noturuase. Zuhpokoxi tomary riase. Axĩ nekurãkase ropa. 9 Moromeĩpo moro ahmõtapõkõ kurãkõkara emero noepyase Pauru a toto tukurãkatohkõme ropa. Tukurãkase ropa toto eya. 10 Mame yna ytory ropahtao yna mõkomohtoase toto, mokaro ahmõtapõkomo.
Mauta poe Roma pona toto ytotopõpyry
11 Morarame moroto wapu kynexine, Arexãtyria poe aepyhpyry, ikonopory enatyry eraximãko, ytoytopyra konopo ae exiryke. Kamaramanõpo tõ esety ae moro wapu esety, Kaxito Poruxime. Morarame ikonopory tonahse ahtao, moro ae ynanytoase. 12 Xirakuza pona toeporehkase yna. Moroto ynanynykyase oseruao. 13 Morotoino ynanytoase ropa tuna konõto ehpikuroko Reziu pona. Moroto yna ahtao kure tyryrykane. Yrokokoro ynanytoase Pozuori pona. 14 Moroto Jezu poetory tõ kynexine. Toto maro ynanynykyase oma zũ mykaponatoae, toahmase yna exiryke eya xine. Morotoino osema konõto ae ynanytoase ropa Roma pona. 15 Yna ekary etahpyryme Jezu poetory tomo a, tooehse toto yna enese, moino Roma poe, Apiu oturutoh pona, oseruao osepekahtoh pona roropa. Mokaro eneryhtao Pauru a eano tyjamihtase. Tãkye toehse ynororo. Kure tõturuse Ritonõpo poko toto maro.
Roma po Pauru ehtopõpyry
16 Morarame Roma pona toeporehkase yna ahtao, ãpuruhpyrytaõkõ ekaroase sajẽtu tutuisary a. Pauru rokẽ imepỹ tapyi taka toytose, soutatu maro.
17 Mame oseruao tynyhse ahtao juteu tamuxiry tõ tonehpose Pauru a oximõme imaro xine tõturutohkõme. Ynara tykase ynororo eya xine,
—Orutua komo, wekyry tomo, kuetatoko. Kuekyrykõ onyenonohpyra exiase Jerusarẽ po. Kytamurukõ omihpyry omipona ase. Yrome ynaroro rokẽ romano tomo a jekaroase toto jetapatohme repe. 18 Morarame tõturupose jahtao romano tuisary a jutũtanohpory se ropa nexiase repe, kowenu jetapapopyra exiryke. 19 Yrome ymyhpokapory se pyra juteu tõ nexiase. Naeroro, “Seza ẽpataka jytory se ase,” ase terekatu a. Wekyry tõ hxirory se pyra exiase. 20 Morara exiryke kuenehpotou xiaro joturutohme amaro xine. Ritonõpo mã kypyno xine. Kyyrypyrykõ korokary se kurã rokẽ ekarotohme kyya xine. Moro eraximãko Izyraeu tõ poetory mana. Moro enetuputyryke ya tymyhse ase keti ke, tykase Pauru eya xine.
21 Ynara tozuhse toto a,
—Pape oehpyra mana, Jerusarẽpõkõ nymerohpyry opoko yna neneryme. Moinõ oehsenãkõ mã, “Popyra,” kara roropa opoko. 22 Õtururu etary se ynanase. Tuhke ahno imehnõ patapõkõ Jezu poetory poihtõko toto, nase toto Pauru a.
23 —Mokokoro osehtoko, tykase exiryke, tuhke toytose toto itapyĩ taka. Mokaro a noturuase Pauru, Ritonõpo ahno esẽme exiry poko, Jezu poko roropa, Moeze tõ nymerohpyry poko, imehnõ urutõkõ nymerohpyry poko roropa. Mokaro zuruse nykohmamyase Pauru. 24 Aomiry etaryke tyya xine, “Ajohpe pyra,” tykase toto emero pyra, tonetupuhse eya xine exiryke. Yrome imehnõ onenetupuhpyra toh tokurehse. 25 Mame toto ytotohto ropa itapyĩkõ taka Pauru ynara tykase eya xine,
—Ajohpe pyra Izaja tõturuse kytamurukomo a Ritonõpo zuzenu poe. 26 Ynara tykase ynororo,
“Tarõkomo a ytotoko. Ynara kahtoko eya xine,
‘Ritonõpo omiry etãko matose repe, yrome zuaro pyra matose.
Enẽko roropa amarokõ repe, yrome onenetupuhpyra matose.
27 Enetuputyry se pyra oexirykõke onenetupuhpyra matose.
Etary se pyra oexirykõke roropa onetara matose.
Enery se pyra oexirykõke onenepyra matose.
Mãpyra oorypyrykõ rumekary se awahtao xine,
otato apanarykõ exiry, jomiry menetupuhtory roropa.
Morarame meramatory ya, kukurãkatory roropa,’ ãko Ritonõpo mana opoko xine,”
tykase Izaja kytamurukomo a.
28 —Morara exiryke etatoko pahne, tõmihpyry aropõko Ritonõpo mã juteutõkara a, toto pynanopyry se toexiry poko toto tuarõtatohme roropa. 29 Morara kary etaryke tyya xine toytose ropa toto, oxime rokẽ tõturutohkõme.
30 Moroto Pauru asakoro tyeimãse tytapyĩ tao. Tãkye ynororo kynexine imehnõ oepyryke tytapyĩ taka. 31 Tõturuse ynororo toto a Ritonõpo ahno esẽme exiry poko. Enaromyra tamorepase toto eya Jezu Kyrixtu poko, “Mokyro poko oturupyra exiko”, kara morotõkõ exiryke.