3
Toehtoh nae sero nono po
1 Emero porehme sero nono po toehtoh nae Ritonõpo poe.
Emero rokẽ aehtoh toehse ahtao moro exĩko mana.
2 Enurutoh nae mana te,
aorihtoh nae roropa mana,
arykatoh nae mana te,
toutoh nae roropa mana.
3 Etapatoh nae mana te,
ikurãkatoh nae roropa mana.
Akohtoh nae mana te,
tyritoh nae roropa mana.
4 Emynyhmatoh nae mana te,
atãkyematoh roropa nae mana.
Ihnamotoh nae mana te,
watoh nae roropa mana.
5 Topu tõ pahtoh nae mana te,
topu tõ oximõme tyritoh nae roropa mana.
Oseahmatoh nae mana te,
osekazumatoh nae roropa mana.
6 Zupitoh nae mana te,
emapotoh nae roropa mana.
Tineru kurãkatoh nae mana te,
ipahtoh nae roropa mana.
7 Ixihkatoh nae mana te,
ixixĩtoh nae roropa mana.
Mynyhme ehtoh nae mana te,
oturutoh nae roropa mana.
8 Imepỹ pyno ehtoh nae mana te,
ise pyra ehtoh nae roropa mana.
Osetapatoh poko ehtoh nae mana te,
osepeme ehtoh poko ehtoh nae roropa mana.
9 Oty apoĩko erohkety nae toerohtamitume? 10 Ritonõpo nyrohmanohpotoh ahno a enease emero porehme toerohtohke toto ehtohme. 11 Ritonõpo nyrityã emero kure potu mana, toto ehtoh toehse ahtao. Isene exikehpyra ehtoh tyrise roropa eya kukurohtaka xine. Yrome inyrityã emero onenetupuhpyra sytatose.
12 Ynara enetupuhnõko ase: sero nono po ynara rokẽ kure tyriry kyya xine: ikuhko tãkye rokẽ ehtohme te, kure ehtoh poko rokẽ ehtoko imehnõ maro. 13 Kure roropa kyya xine otuhnõko, eukuru ẽnõko tãkye ehtohme kuerohtamitukõme. Moro Ritonõpo nekarohpyryme mana kyya xine.
14 Zuaro ase, Ritonõpo nyriry emero jũme exikehpyra mana. Moro motye onyrisaromepyra sytatose, pitikohxo moro onyrisaromepyra roropa sytatose. Moro rĩko Ritonõpo mana, imehxo toexiry enetupuhpotohme kyya xine. 15 Emero sero nono po ehtoh pake toehse, imeĩpo ehtoh roropa pake toehse nexiase. Ritonõpo poe inyripohpyry exĩko mana, mame moro sã exĩko ropa mana.
Zae pyra ehtoh sero nono po
16 Sero nono po ynara enease roropa: zae ehtoh esao, popyra ehtoh nexiase. Kurãkõ esao iirypyryme nexiase. 17 Osenetupuhnõko ase ukurohtao: “Zae ehtoh poko exiketõ apiakãko Ritonõpo mana, popyra exiketõ roropa. Ynara exiryke, emero ehtoh, emero ahno nyriry roropa exĩko mana, zae morohne ehtoh toehse ahtao.” 18 Osenetupuhno roropa ahno ehtoh poko: Ahno kuhnõko Ritonõpo mana ynara enetupuhtohme kyya xine: onokyro tõ motye kure exipyra sytatose. 19 Etyhpyryme oxisã orihnõko mã toto, ahno, okyno, onokyro roropa. Ahno osewomara mana orihpyra ehtohme. Oxisã oseremãko mã toto isene ehtohme. Enẽko mase, toiparo rokẽ mana. 20 Ahno, onokyro sã, toorihse ahtao nonome exĩko ropa mana. Nono poe tyrise toto. Nonome exĩko ropa mã toto. 21 Otãto zuaro exĩko ahno nae: ahno zuzenu onukuru poko kakoxi, onokyro tõ, okyno zuzenu yhtõko nono aka? Zuaro pyra sytatose. 22 Naeroro ynara osenetupuhno: kure ya mana kuoseahmarykomo tãkye kuehtohkõme kynyrirykõ poko. Moro rokẽ kuepehpyrykõme mana kuerohtamitukõme. Otãto zuaro exĩko sytatou toorihse kuahtao xine imeĩpo ehtoh poko?