15
Moeze eremiatopo
1 Mame toremiase Moeze tomo Izyraeu tõ maro Ritonõpo Tosẽkõ eahmaryme. Ynara tykase toto:
— Eremiãko ase Ritonõpo eahmaryme
typoremãkapose toto eya exiryke,
orẽpyrahxo toexiryke,
kawaru tõ tomase eya,
kawaru aronanõ maro tuna konõto kuaka.
2 Jewomane jamihme Ritonõpo mana.
Eya typynanohse ywy;
Ritonõpo Jesẽme mana, eahmãko ase.
Papa Esẽme mana, eremiãko ase,
Imehxo Aexiry poko.
3 Ritonõpo etonaketyme mana.
Esety mã Ritonõpo.
4 Tuna konõto kuaka Ejitu soutatu tõ tomase ikanarykõ maro.
Soutatu tõ esã, imehxo exiketõ tynerymapose tuna konõto Tahpiremã kuaka.
5 Tynerymase toto tuna konõto zueme exikety a.
Topu sã tyneryse toto zue aka.
6 Ritonõpo, jamihmehxo oemary apotunuru wino mana,
osenuruhkãko ynanase oepetõkara etohtohkary eneryke yna a.
7 Emero motye orẽpyra mexino.
Oepetõkara poremãkapory poko,
toto zehno oexiryke jahkãko mase
onahpoty samo tonore ahtao.
8 Typũmase oya, tuna kaetokohxo toehse.
Pohkane tõ tõnuhse xikihme, apuru samo pata zomye.
Tũpore toehse tuna konõto zue ao, jeru samo.
9 Kuepetõkara ynara tykase:
“Mokaro ekahmãko sytatose, toto apoĩko sytatose,
Imõkomory emero apoĩko sytatose, kymõkomorykõme.
Kypyrekõ ke toto poremãkapõko sytatose.”
10 Yrome Omoro, Ritonõpo,
typũmase oya ahtao Ejitu põkõ tyneryse,
zue aka tomõse toto xũpu samo, pohkane xihpyry kuaka.
11 Imepỹ ritõ apanõ pyra mana, Ritonõpo!
Onoky nae kurano, Imehxo Exiketyme apanono?
Onokãkõ tyjamitunuru ke tyrĩko nae,
typoetory tõ ewomãko roropa nae?
12 Oemary tanỹse ahtao oya ãpotunuru wino,
mokaro tonahkase nono a, yna ekahmahpõkomo.
13 Yna pyno oexiryke, opoetory tõ arõko mase typynanohse toto oya,
ajamitunuru ke tarose toto oya ononory kurã pona, Ritonõpo.
14 Onyrihpyry poko totase imehnõ nonory põkomo a,
tykytyky ãko mã toto enaromỹke toexirykõke.
Pirixteu tõ oserehnõko mã toto.
15 Etõ põkõ tamuximãkõ roropa tonaroxitapãse mã toto.
Moape põkõ jamihmãkõ typoremãse mã toto.
Kanaã põkõ emero tykytyky ãko mã toto.
16 Enaromỹke toehse toto,
ouno mã toto ipunaka.
Ajamitunuru eneryke tyya xine
totypohse mã toto, topume anyhtahpyry sã toexirykõke,
opoetory tõ ytoytory eneryke tyya xine,
opoetory tõ typynanohse oya Ejitu põkõ namotome toto ahtao.
17 Toto enehnõko mase, ypy pona,
oesary pona onymenekahpyry oesaryme,
Atapyĩ esaryme, onyrihpyry esaryme.
18 Ritonõpo, yna Esemy,
yna Tuisary Imehxo mase,
jũme exikehpyra mase.
Miriã eremiatopo
19 Tuna konõto takuohse Izyraeu tomo a nono tonore poro. Yrome tykanarykõ tarose ahtao Ejitu põkomo a, kawaru tõ maro Izyraeu tõ ekahmaryme, tuna tonehpose ropa Ritonõpo a toto nerymapotohme.
20 Urutõme Miriã kynexine Arão oryxiry. Pãteru tapoise eya imehnõ nohpo tõ emero imaro toehse, pãteru tõ etõko, wãko toto. 21 Mame toremiase Miriã, toto netaryme. Ynara tykase:
— Eremiatoko Ritonõpo eahmaryme,
typoremãkapose toto eya,
Imehxo toehse ynororo ipunaka;
kawaru tõ tomase eya,
kawaru aronanõ maro tuna konõto kuaka.
Tuna itunety
22 Mame Izyraeu tõ tarose Moeze a tuna konõto Tahpiremã poe ona Sua pona. Oseruao tõmehse toytorykõ poko toto ona poro, tuna zupiry poko repe. 23 Toeporehkase toto Mara pona. Yrome moro tuna onẽsaromepyra toh kynexine, itũ exiryke. Morara exiryke moro esety Mara kynexine. 24 Tykerekeremase toto Moeze netaryme; tõturupose toto:
— Oty ẽnõko ynanae? tykase toto.
25 Jarao tõturuse Moeze yronymyryme Ritonõpo a takorehmatohme. Mame wewe zokonaka tonepose Ritonõpo a eya. Moro wewe tõmase eya ahtao tuna kuaka, tuna kure toehse toto okurume.
Moroto tõmihpyry tokarose Ritonõpo a eya xine, Aomipona toto ehtohme. Moroto tukuhse roropa toto Ritonõpo a. 26 Ynara tykase ynororo eya xine:
— Tomeseke awahtao xine jomihpyry poko, zae ehtoh riryhtao oya xine roropa, jomihpyry omipona awahtao xine awãnohpyra xine exĩko ase tyrohsẽ ke Ejitu põkõ wãnohtopõpyry ke. Ywy ase Ritonõpo okurãkanekomo.
27 Moromeĩpo toeporehkase Izyraeu tomo Erĩ pona. Moroto 12me tuna eutary nae kynexine te, 70me airiki panõ roropa. Moroto tõsesarise toh kynexine tuna eutary tõ pũto.