1 Mame Jako toytose, toeporehkase ynororo Oriẽte pona. 2 Mame tõsenuhmase ahtao, ona rãnao, nono ahkahpyry tonese eya. Moro tuna eutary zomye tokykõ enenanõ oseruao tonese eya, tokykõ maro, kaneru tomo, poti tõ maro. Moro tuna eutary tapuruse kynexine topu konõto ke. Naeroro tuna ananỹsaromepyra enenanõ kynexine. 3 Tõximõse tokykõ enenanõ emero tahtao, topu tanỹse eya xine tuna anỹtohme tokykõ ohpatohme. Mame tõtyhkase tahtao xine topu tyrise ropa apuru. 4 Tõturupose Jako eya xine, ynara tykase:

— Oty pata põkõ hmatou, jepe tomo? tykase.

— Harã põkõ ynanase, tykase toto.

5 — Rapão waro hmatou, Naoa mũkuru? tykase Jako.

— Ỹ, mokyro waro ynanase, tykase toto.

6 — Kure hnae ynororo? tykase Jako, tõturupose.

— Ỹ, kure mana, tykase toto. — Eneko ke! Mokyro ẽxiry, Rakeu oehnõko mana toky tõ maro.

7 Mame ynara tykase Jako:

— Kohmãpyra ro nase, kaneru tõ apurutoh popyra ro. Oty katoh tuna onekaropyra hmatou oekykomo a, toto arotohme ropa ona pona ropa? tykase Jako eya xine.

8 Ynara tykase toto:

— Tuna ananỹsaromepyra ynanase anapuruhmakara ro ahtao. Tysyryhmase topu ahtao rokẽ yna eky tõ ohpãko ynanase.

9 Toto maro Jako otururuhtao ro Rakeu tooehse toky tõ maro, toky tõ eneneme exiryke. 10 Mokyro eneryhtao Jako a kaneru tõ maro poti tõ maro, tyse piry ẽxiry tonese eya. Mame topu tysyryhmase eya pẽkamã eutary poe, eky tõ ohpatohme. 11 Imeĩpo Rakeu typohse eya. Tyxitapitose ynororo tãkye toexiryke. 12 Ynara tykase ynororo eya:

— Omy ekyryme ase. Repeka mũkuru ase, tykase ynororo eya.

Tururume toytose Rakeu tumy zuruse, emero. 13 Mame typatũ poko zuaro toehse Rapão ahtao, toytose ynororo tururume. Jako eneryhtao toahmase ynororo eya. Typohse eya roropa. Mame tarose ynororo tytapyĩ taka. Mame tory turuse Jako a emero toehtopõpyry poko. 14 Mame ynara tykase Rapão:

— Aõ! Ajohpe pyra. Wekyry nymyry mase, tykase Rapão eya.

Toiro nuno taropose ahtao Jako a tory tapyĩ tao, 15 ynara tykase Rapão eya:

— Zae pyra nase oerokuru ypoetoryme topehke pyra, wekyryme oexiryke. Otãto epehpyry apoiry se hma oerohtamitume?

16 Asakoro tõxike Rapão kynexine. Osemazupu esety kynexine Reia, zakorony Rakeu. 17 Reia enuru kure potu kynexine. Yrome Rakeu ẽmyty oryxime kuhse kynexine. Zoko roropa enekure kynexine. 18 Mame Rakeu pynohxo Jako exiryke ynara tykase ynororo:

— Erohnõko ase 7me jeimamyry Rakeu apoitohme ypytyme.

19 Ynara tykase Rapão:

— Kure ya jẽxiry ekarory oya opytyme. Popyrahxo imepyny a, mose ekarory. Taro exiko ymaro, tykase.

20 Naeroro toerohse Jako 7me jeimamyry Rakeu apoitohme typytyme. Yrome ise toexiryke 7me jeimamyry tuhke pyra saerehkatoh sã kynexine eya. 21 Morarame 7me jeimamyry taropose ahtao, ynara tykase Jako Rapão a:

— Ypyty se ase rahkene 7me jeimamyry taropose ya exiryke, tykase ynororo.

22 Mame otuhtoh konõto tyrise Rapão a Jako pytatoh po. Morotõkõ emero toahmase eya. 23 Yrome moro kohmamyry ae Reia tapoise Rapão a. Tokarose ynororo Jako a. Imaro toehse ynororo. 24 Ipoetory Ziupa tokarose Rapão a, Reia a ipoetoryme ehtohme. 25 Tõmehse ahtao tonetupuhse Reia eya. Naeroro tõturuse ynororo Rapão a. Ynara tykase ynororo eya:

— Oty katohme sẽ sã make ymaro? Toerohse ywy 7me jeimamyry Rakeu apoitohme ya. Oty katohme kuenekunohno, eo? tykase.

26 Ynara tykase Rapão:

— Taro yna nonory po, toipe ynanase. Yna ẽxiry okominoto onekaropyra ynanase osemazuhme. Osemazupu rokẽ ekarõko ynanase osemazuhme. 27 Eraximako. Sero 7me ẽmepyry oseahmatoh erẽnatoh poko rokẽ sytatose aporo. Tõtyhkase ahtao õmiry etary se ase: “Imepỹ 7me jeimamyry erohnõko ase amaro,” karyhtao oya, Rakeu ekarõko ase oya, tykase Rapão Jako a.

28 Ỹme Jako kynexine. Naeroro moro otuhtoh konõto tõtyhkase ahtao Reia maro erẽnatoh poko, Rakeu tokarose roropa Rapão a Jako pytyme. 29 (Ipoetory Pira tokarose Rapão a Rakeu maro ehtohme ipoetoryme). 30 Typyty Rakeu sehxo Jako kynexine, Reia se toehtoh motye. Mame toerohse ynororo Rapão poetoryme 7me jeimamyry ropa.

31 Reia se hkopyra Jako ehtoh tonese Ritonõpo a. Naeroro Reia takorehmase Ritonõpo a aemũkuatohme. Yrome Rakeu tumũkue pyra tyripose Ritonõpo a. 32 Poetoẽme toehse Reia, toemũkuase Rupẽme. Ynara tykase ynororo:

— Tãkye pyra jehtopõpyry tonese Ritonõpo a, yrome taroino ypyno exĩko ynio mana.

33 Mame poetoẽme toehse ropa Reia, toemũkuase ropa ynororo, esety Ximeão. Ynara tykase ynororo:

— Jatasamary tonese Ritonõpo a, naeroro umũkuru tokarose eya.

34 Mame poetoẽme toehse ropa Reia, toemũkuase ropa Rewime. Ynara tykase ynororo:

— Taroino ysehxo ynio exĩko mana toemũkuase oseruao jexiryke, tykase ynororo.

35 Mame poetoẽme toehse ropa Reia, toemũkuase ropa, esety Jutame. Ynara tykase ynororo:

— Taroino Ritonõpo eahmãko ase, tykase ynororo.

Mame emũkuara ropa kynexine.