49
Jako omiry etyhpyryme
1 Mame tumũkuru tõ tykohmase tyya Jako a. Ynara tykase ynororo:
— Jomye ehtoko, imeĩpo ehtoh ekarõko ase oya xine.
2 “Oximõme ehtoko jomye
jomiry etatohme,
umũkuru tomo, etatoko omykõ, Izyraeu omiry.
3 “Rupẽ, umũkuru mase osemazupu.
Yjamitunuru mase, jeperyme mase,
omoro mase epery osemazupu,
jamihme ro jahtao.
Ãkorõ tõ motye epyrypaketyme mase,
imehnõ motye jamihme exikety mase.
4 Orẽpyra mase iporiry samo, zueme ahtao,
yrome imehxo exiketyme pyra mase,
ypyty poko toehse oexiryke.
Zae pyra mexiase omy pyty poko toehse oexiryke.
5 “Atakorõme mã toto Ximeão te, Rewi maro,
typyrekõ ke imehnõ tyyryhmase eya xine.
6 Toto maro oximõpyra ase,
atamoreparyhtao tynyrirykõ poko.
Oseme toto otururuhtao toto maro pyra ase.
Imehnõ totapase eya xine exiryke,
toto zehno toehse toto ahtao.
Pui tõ axiry tysahkase eya xine osemeikatoh samo.
7 Zehno toto ehtoh popyra tyriposẽme exĩko
yronymyrymehxo exiryke!
Tohne toto ehtoh popyra tyriposẽme exĩko iirypyryme exiryke.
Tãtapiakasẽme exĩko mã toto Izyraeu nonory po,
sapararahme toto ripõko ase jekyry tõ maro.
8 “Juta eahmãko zakorõ tõ mana, irui tõ maro.
Tupue exĩko mã toto oẽpataka.
Oepetõkara pymyry apoĩko mase.
9 Aimo Juta, reão mũkurume sã mase,
tõsẽ tosekase ahtao,
mame tosaka ytõko ropa mana.
Tohrame exĩko reão samo,
reão nohpory sã roropa.
Ipoko toexiry zuno imehnõ mana emero.
10 Juta tuisame exĩko mana.
Ipakomotyã tuisame exikehpyra mana.
Imehnõ ahno tynekarory enehnõko eya.
Aomipona exĩko imehnõ nonory põkõ mana.
11 Toky jumẽtu myhnõko mana,
uwa zoko pokona, uwa zoko kurã pokona.
Zupõ kurikãko mã eukuru ke,
tupõ jaraõ kurikãko roropa mana
eukuru tahpiremã ke, munu panõ ke.
12 Enuru kamirarame mana eukuru enyryke eya.
Jery karimutume mana pui suhsuru enyryke eya.
13 “Zepurõ esary exĩko mana tuna konõto ehpio.
Moroto wapu tõ opyime exĩko,
esary ehpio exĩko Xitõ po.
14 “Isakaa jumẽtu jamihme exikety sã mana,
typorohse tynarotyã asakoro rãnao.
15 Nono kurã tonese ahtao eya,
tosaryme kurã oserematohme,
toraximase ynororo imehnomo a omoxinety ritohme ĩpatarãnaka.
Onykerekeremara erohnõko mana imehnõ namotome.
16 “Tã tyekyry tõ tuisaryme exĩko mana.
Imehnõ oxiekyry tõ sã exĩko mana,
Izyraeu tõ ekyry samo.
17 Okoi sã exĩko mana osema ehpio,
orihmatõ samo osema ehpio exikety,
kawaruhtainy esekane samo;
Mokyro kawaru po ytokety emapotohme ĩkakoxi.
18 “Ritonõpo Jesemy,
ypynanopyry oya eraximãko ase!
19 “Kate tõ maro atatapoĩko omato kõ mana.
Yrome imeĩpo toto ekahmãko mana.
20 “Asea nonory po tykyrysã kurã exĩko mana, tonahsẽme.
Tuisa tõ napyryme exĩko mana.
21 “Napatari kapau sã exĩko mana,
jarao tururume ytokety samo,
tumũkue nupunato exikety samo.
22 “Joze, wewe eperytakety sã mana
tuna enatyry pũto.
Itamurume eperytãko mana.
Amoriry apuru motye exĩko mana.
23 Epetõkara iiryhmãko mã toto zehnotokõ samo.
Typyre ke ekahmãko mã toto,
taky tõ pyrou tõ maro.
24 Yrome poremãpyra mana.
Ipyre jamihme emary po mana.
Aporykõ jamihme ro
tyjamihtanohse Ritonõpo a,
jamihme Exikety a, Jako Esemy a;
Esety Topuimo, Izyraeu Ewomane.
25 Ritonõpo, omy Esẽ, ãkorehmãko mana,
jamihmehxo Exikety kure rokẽ orĩko mana.
Kapu ae kurãkõ ekarõko mana.
Tuna kurohtae kurãkõ ekarõko mana.
Oeky tõ tuhke ekarõko mana.
Opoenõ roropa ekarõko mana tuhke.
26 Tonahsã itamurume ekarõko mana,
ekuru tõkehko roropa,
kurãkõ ypy tõ poe moino ro exikety poe
kurãkõ ekarõko mana.
Otyro tõkehko, kurãkõ ypy tõkehko po exiketomo.
Emero kurãkõ exĩko Joze zupuhpyry pona parimã sã zupuhpyry po,
exĩko mana tymenekase ynororo irui toh tae.
27 “Pẽjamĩ kaikuximome exĩko mana,
kaikuxi sã exĩko, zehno exikety samo.
Ẽmepyryme toh apoĩko mana.
Kokonie pukuro zoh nae ro mana ekamotohme.”
28 Moxiã mã 12mãkõ oxiekyry tõme Izyraeu poenomo. Morara tykase jũkõ tumũkuru tomo a kure tyripose toto ahtao. Atatakomino typoenomo a tõturuse tõsekazumaryme.
Jako orihtopõpyry
29 Morarame ynara tykase Jako tumũkuru tomo a:
— Orihnõko ase. Ytõko ase wekyry tomo a. Jekepyry zonẽtoko papa tõ esaka oramãka, Eporõ, heteu tupĩpyry po, 30 Makapera po, Mãre poe xixi tũtatoh wino, Kanaã nonory po. Moro Aparão nepekatyhpyry Eporõ wino, oramã topu, tupito maro tyekyry ekepyry zonẽtohme. 31 Moroto Aparão ekepyry tonẽse, ipyty Sara maro; Izake roropa ipyty Repeka maro; moroto Reia ekepyry tonẽse ya. 32 Moro tupito oramã maro topekahse heteu tomo a.
33 Tõturukehse Jako ahtao tumũkuru tõ maro tohrame toehse ropa ynororo tynyhtoh po, mame toorihse rahkene. Zuzenu toytose oseporyse tyekyry tõ maro, aorihtyã esaka.