1 Mame tõturuse ropa Ritonõpo ya. Ynara tykase:

— Ytoko ropa nohpo pynanohse, imeimehnõ poko aexihpyry, imepỹ maro exikety. Mokyro pyno exiko, Izyraeu tõ pyno jexiry samo imehnõ neponãmarykõ poko toto ahtao ro, tynekaroryme uwa epery asarahtyã aroryhtao ro eya xine ritõ Paau eahmatohme.

2 Naeroro ytoase, mokyro nohpo epekatyase 15me parata ke, 150 kirume sewata maro. 3 Ynara tykase ywy eya:

— Okynahxo jeraximãko mase. Morarame jeraximaryme imeimehnõ maro pyra exiko, osekaropyra exiko amaro se exikety a. Ywy roropa eraximãko ase amaro jehtohme imeĩpo.

4 Moro sã tuhke ẽmepyry eraximãko Izyraeu tõ mana tuisa konõto maro pyra te, imepỹ tutuisake pyra roropa te, tynekarorykõ onyahkara exĩko mã toto, xikihme exiketõ topu risẽ Paau kyryry poko pyra exĩko mã toto, tyneponãmarykõ poko pyra exĩko roropa mã toto tytapyĩkõ tao. 5 Yrome ẽmepyry oehnõko mana: Izyraeu tõ oehnõko ropa Ritonõpo eahmase ropa Tosẽkõme. Tutuisake exĩko mã toto tuisa Tawi paryme exikety. Morarame Ritonõpo eahmãko mã toto Tosẽkõme, aomiry omipona, inekarory kurã tuhke apoĩko roropa mã toto.