11
Tõmipona pyra exiketõ pyno Ritonõpo mana
1 Typoetory tõ Izyraeu poko, ynara ãko Ritonõpo mana:
“Poetome ro Izyraeu ahtao, ipyno exiase,
umũkurume tykohmase ya, Ejitu po ynororo ahtao.
2 Yrome itamurumehxo tykohmase ynororo ahtao ya,
itamurumehxo toesyryhmase ynororo ywinoino.
Tynekarory tõ tyahkase eya xine, tyneponãmarykõ Paau eahmatohme.
Ixtaratu tyahkase eya xine roropa tyneponãmarykõ eahmatohme.
3 Ya ro Izyraeu tõ tamorepase ayaytorykõ poko;
toto tanỹse ya jemary ke,
yrome onenetupuhpyra toh nexiase typyno xine jehtopõpyry poko.
4 Toto pyno jehtoh ke, toto ewomaryke roropa ya toahmase toto ya.
Tanỹse toto ya jemary ke, jenao poeto apoiry sã jũ tomo a tonao xine.
Toepuise ywy toto otuhmapotohme.”
5 — Toepyrykõ se pyra ropa mã toto ya. Naeroro Ejitu pona ytõko ropa mã toto; axirio tomo a typoremãkasẽme exĩko mã toto. 6 Etonatoh oehnõko mana ipatarykõ pona. Pata tõ omõtoh tonõ tytahtahkasẽme exĩko mana epetõkara a, tonahkasẽme exĩko mã toto. Ypoetory tõ totapasẽme exĩko mã toto zae pyra exiketõ osenetupuhtoh riry se rokẽ toexirykõke. 7 Ypoetory tõ putupyra sã rokẽ mã toto, jomiry omipona pyra; morara exiryke tarosẽme exĩko mã toto epetõkara a, tynamoto tõme. Imehnõ toto onypynanohsaromepyra exĩko mã toto.
8 “Izyraeu tomo, orumekarykõ se pyra ase!
Orumekasaromepyra xine ase!
Oenahkaposaromepyra xine ase, Atama enahkapotopõpyry sã ya!
Orisaromepyra xine ase Zepoĩ ritopõpyry sã ya, tonahkase ahtao ya!
Opyno xine jexiryke oenahkaposaromepyra xine ase.
Opyno xine jehtoh exikehpyra mana.
9 Awãnohpyra xine ase ozehno xine jehtoh ke.
Ypoetory tõ onenahkara ropa ase,
Ritonõpome jexiryke ahno rokẽ kara ase;
Ywy, Ritonõpo Kurano, ypoetory tõ rãnao ase,
toto onenahkara ropa ase.”
10 — Ywy opore omitaryhtao, reão samo jepetõkara enepanohpotohme, ymaro ypoetory tõ ytõko mã toto. Xixi omõtoh wino ypoetory tõ oehnõko mã toto tururume. 11 Torõ tõ sã oehnõko mã toto Ejitu poe, utuku tõ sã oehnõko Axiria poe. Mame toto ripõko ase toto nonory pona ropa, moroto aehtohkõme ropa. Ywy Ritonõpo oturuno.
Izyraeu wãnohtopo, Juta wãnohtoh roropa
12 Ynara tykase Ritonõpo:
— Izyraeu tõ jomyehmãko sã mã toto ajohpe toehtohkõke, imehnõ enekunohtoh kõ ke roropa. Juta tõ roropa jomiry omipona pyra mã toto, anamonohpyra Exiketyme ase, Ritonõpo kurano.