11
Izyraeu tõ Esẽ toehse ahtao
1 Tawi tõ tuisame ehtopõpyry imũkuru maro ipakomotyã maro wewe akotyhpyry sã mana;
yrome amoriry ahtary sã wewe ãtykyrỹpyry wino,
imepỹ tuisa enurũko mana Tawi parỹpyryme, Jese mũkuru.
2 Imaro Ritonõpo Zuzenu exĩko mana,
tuaro ehtoh ekarõko, enetupuhtoh roropa,
emese kure ehtoh ekarõko, jamihmehxo ehtoh roropa.
Ritonõpo omipona exĩko mana,
ise Ritonõpo ehtoh waro exĩko roropa mana,
3 Ritonõpo omipona toehtoh sehxo exĩko mana.
Mame zae pyra aexityã apiakaryhtao eya mokaro eneryke rokẽ tonuru ke anapiakara mana,
aomiry etaryke roropa typanary ke onymenekara roropa mana.
4 Yrome zae ehtoh ke tymõkomokãkara apiakãko mana.
Zae rokẽ tuisamã kara ewomãko roropa mana.
Aomi poe zae pyra exiketõ tuãnohsẽme exĩko mana,
popyra exiketõ taorihmaposẽme exĩko roropa mana.
5 Zae toehtoh ke erohnõko mana typoetory tõ tuisaryme, ajohpe pyra toexiryke ipunaka.
6 Ropo tõ kaneru tõ maro oximaro exĩko mã toto osepeme,
reoparatu tõ poti tõ maro pohme exĩko mã toto oserematohme.
Pui poenomo reão poenõ maro oximaro otuhnõko mã toto,
poetohti tõ toto aroarõko mana.
7 Pui tomo onahpoty enahnõko mã toto uusa tõ maro,
toto poenõ oseremãko mã toto oximaro.
Reão tõ onahpoty enahnõko mã toto pui tõ samo.
8 Poetohti tõ osemeikãko okoi tõ pũto repe,
yrome onesekara exĩko mã toto,
tomary tyrise ahtao ro poeto pitiko a okoi eutary aka onesekara exĩko mana.
9 Ypy Xião po, jesary kurã po, popyra ehtoh exipyra exĩko mana;
imehnõ onyryhmara exĩko, ynara exiryke:
Tuisamehxo Kuesẽkõ enetupuhnõko sero nono põkõ mana emero porehme, tuna konõto pehkary samo tuna ke.
Izyraeu oepyry ropa tynonory pona
10 Moro ẽmepyry toehse ahtao tuisa Tawi pary tuisame exĩko mana, imityme roropa mana Jese tõ Rihpõme exiryke; pãteira sã exĩko mana imehnõ nonory põkomo a. Imeimehnõ nonory põkõ ytõko mã toto eya imaro ehtohme, ipatary kure rokẽ exĩko mana. 11 Moro ẽmepyry toehse ahtao tyjamitunuru ke typoetory tõ enehnõko ropa Kuesẽkõ mana Axiria nonory poe te, Ejitu poe, Pataro poe te, Etiopia poe, Erão poe te, Papironia poe, Hamate poe, tuna konõto Metiteraneu ehpio poe, ahmõta tõ poe, enara. 12 Pãteira anỹnõko Ritonõpo mana enetupuhpotohme oximõme Izyraeu tõ enehtohme Juta tõ maro sapararahme aexityã sero nono poro porehme; toto enehnõko ropa mana inonorykõ pona ropa. 13 Mame Juta tõ poko zumoxike exikehnõko Izyraeu tõ mana, Izyraeu tõ zehno exikehnõko roropa Juta tõ mana. 14 Oximaro ytõko mã toto pirixteu tõ poremãkapose xixi omõtoh wino; imehnõ poremãkãko roropa mã toto xixi tũtatoh wino, imõkomory apoitohme tymõkomoryme. Etõ tõ poremãkãko mã toto, Moape tõ roropa te, Amõ tõ roropa, enara. 15 Mame Sueze tunary apaikapõko Ritonõpo Kuesẽkõ mana, tyryrykane axitunety enyohnõko roropa mana tuna Eupyrati pona. Iporiry 7mãkõ rokẽ oxinomõko, zumõkara exiketomo, tupime pyra ytoytokety akuohtohme. 16 Mame pake Izyraeu tõ esemahpyry sã tutũtase toto ahtao Ejitu poe, osema kurã exĩko Axiria nonory poe, ypoetory tõ akoĩpyry isene ro exiketõ ytotohme.