38
Tuisa Ezekia kurãkatopõpyry
(2 Tuisa 20.1-11; 2 Koronika 32.24-26)
1 Morarame tuisa Ezekia takuruhtase yronymyryme, orikyĩse kynexine. Mame urutõ Izaja, Amoxi mũkuru, toytose mokyro enese, ynara tykase eya:
— Ynara ãko Ritonõpo mana: “Okyryry tõ ikurãkako emero, ekurãkara ropa oexiryke. Orihnõko mase.”
2 Naeroro tõmyty torimase Ezekia a apuru winakoxi, tõturuse ynororo Ritonõpo a, ynara tykase:
3 — Ritonõpo, wenikehpyra exiko opoetoryme jehtoh poko, omihpyry omipona exiase yronymyryme, onyripohpyry ya tymoise ya ipunaka kokoro rokene. Mame tyxitase tãtasamaryke.
4 Tutũtase Izaja tuisa nyhtoh tae, yrome turuse ynororo Ritonõpo a:
5 — Eramako ropa Ezekia zuruta, ynara kaxiko eya: Ywy, Ritonõpo, atamuru Tawi Esemy, õmiry etano, oxity eneno. 15me jeimamyry ekarõko ase oya isene ro oehtohme. 6 Opynanohnõko ase sero apatary Jerusarẽ maro Axiria tuisary winoino, sero pata ewomãko ase.
(v 21) Ynara tykase Izaja tuisa akorehmananomo a:
— Opime fiku epery risẽ tyriko jetunety pona, tuisa erukoimory pona, mame ekurãkãko ropa mana. (v 22) Mame tuisa Ezekia tõturupose eya:
— Oty rĩko Ritonõpo nae, tukurãkase ropa jahtao, zuaro jehtohme jytotohme Ritonõpo Tapyĩ taka?
7 — Zae toehtoh enetupuhpotoh ekarõko Ritonõpo oya mana, tõmihpyry ae tynyriry enetupuhtohme oya. 8 “Eneko ke, xixi zuzenu onuhmapõko ropa ase 10me onuhtoh opyi Akaze nyrihpyry pokona tyhtose ahtao.” Mame xixi zuzenu tõnuhse ropa 10me onuhtoh pona ropa.
9 Morarame toekurãkase ropa tuisa Ezekia ahtao eremiatoh tymerose eya Ritonõpo eahmatohme, ynara tymerose eya:
10 Nuaseme jahtao ro orihnõko ase, tamuhpõme pyra,
osekaroase repe, aorihtyã esaka ytõko ase,
moro sã enetupuhnõko exiase repe.
11 Taroino, sero nono po, isene exiketõ rãnao, Ritonõpo onenepyra ropa exĩko ase;
imehnõ isene exiketõ onenepyra ropa exĩko ase.
12 Isene jehtoh tonahse rahkene, kaneru pyno exikety tapyinỹpyry samo,
tykararahse ropa ahtao,
kamisa sã roropa tapopohse ahtao.
Saereme ahtao, koko roropa jorihmanohpõko Ritonõpo mana,
moro sã ekaroase repe.
13 Koko kui kary poko tõmehse ywy jetũ jexiryke,
yzehpyry akuhmory sã reão a nexiase.
Saereme ahtao, koko roropa jorihmanohpõko Ritonõpo mana,
moro sã ekaroase repe.
14 Jetũ jexiryke pusuh tykase ywy jamihme pyra samo, parapi omiry samo;
pusuh ãko exiase utuku omiry samo.
Kakoxi josenuhmary poko jenuru totaehse, kapu enery poko.
Ritonõpo, etuarimãko ase! Kypynanohko!
15 Ritonõpo a senohne tyrise ahtao ya,
onykerekeremasaromepyra ase.
Jũme epyrypara ase ypoko
sam tykase jexiryke sero samo ukurohtao.
16 Ritonõpo, onyrityã pokoino isene ynanase emero porehme;
ywy roropa isene ase onyrityã pokoino.
Tukurãkase ropa ywy oya isene jehtohme!
17 Kure jehtohme morohne ke toetuarimase ywy, zuaro ase.
Yrome kypynanopyase orihpyra jehtohme,
yyrypyry tõ emero tykorokase oya.
18 Aorihtyã esao, “Kure mase,” kasaromepyra mã toto,
morotõkõ oeahmasaromepyra mã toto;
typynanopyrykõ oya onenetupuhsaromepyra mã toto.
19 Isene exiketõ oeahmãko mã toto,
ya oeahmary sã seromaroro.
Mame jũkõ typoenõ zurũko mã toto zae oehtoh poko,
typynanohnekõme oenetupuhtohme eya xine.
20 Typynanohse ywy oya, Ritonõpo.
Morara exiryke haapa tõ etõko,
eremiãko roropa ynanase oeahmaryme;
isene ro yna ahtao oeahmãko ynanase Atapyĩ kurã tao. 21-22 (-)