1 Ritonõpo a Xiro tymenekase tuisame ehtohme.

Eya tyjamihtanohse ynororo imehnõ nonory põkõ poremãkatohme, tuisa tõ jamitunuru enahkapotohme.

Pata tõ omõtoh etapuruhmakãko Ritonõpo mana Xiro omõtohme,

imehnõ moro omõtoh anapurusaromepyra ropa mana.

Ynara ãko mã ynororo Xiro a:

2 “Ywy roro osemazuhme ytõko ase,

ypy tõ pipahmãko ase oesemaryme, emorymãkõ roropa;

pata tõ omõtoh tonõ metau risẽ tahkãko ase te, kurimene risẽ roropa.

3 Oya mõkomo kurã ekarõko ase, tonẽse aexityamo,

uuru tõkehko tukurãkase aexityã zonẽtoh tao,

zuaro oehtohme ywy ase Ritonõpo, Izyraeu tõ Esemy, okohmahpono oesety ae.

4 Okohmãko ase ypoetory Izyraeu tõ akorehmatohme oya, ynymenekatyamo.

Mame juaro pyra ro awahtao imehxo oehtoh ekarõko ase oya.

5 “Ywy ro rokẽ ase Ritonõpome;

imepỹ ritõ pyra mana, ywy rokene.

Ajamitunuru ekarõko ase oya etonatohme juaro pyra ro awahtao.

6 Morara tyrĩko ase, nono etyhpyry poe xixi tũtatoh wino mya etyhpyry pona xixi omõtoh wino sero nono põkõ porehme zuaro ehtohme ywy ase Ritonõpo, imepỹ ritõ pyra mana.

7 Saerehkatoh rihpõme ase, ikohmamyry roropa,

kurãkõ ekaroneme ase, popyra ehtoh tyriponeme roropa ase;

ywy Ritonõpo morohne rĩko ase emero porehme.

8 “Konopo enehpory sã ya kaino, orẽpyrahxo jehtoh enehpõko ase kapu poe.

Nono etapuruhmakãko ase moro zae ehtoh apoitohme,

ekutãko sã mana ahno pynanohtoh ke, zae ehtoh ke roropa.

Ywy, Ritonõpo, morara tyrĩko ase.”

9 Tumeri riryhtao orino risemy tyrine maro oseosezuhpyra tyrine maro mana.

Orino onekaropopyra tyrine a: “Oty rĩko mahno?”

Ynara kara roropa mana: “Emese popyra mase,” kara mana.

10 Ahno mũkuru ynara kara tumykomo a:

“Oty katoh kuenurumatose?”

11 Ritonõpo, Izyraeu tõ Esẽ kurano, Orihpõkomo, ynara ãko:

“Zae pyra matose ekaroporyhtao ya ypoenõ pynanopyry poko ya,

jamorepary se roropa awahtao xine ynyriry poko.

12 Ywy ase sero nono Rihpono porehme,

ahno tyrise ya isene ehtohme sero nono po.

Jemary ke kapu yrine mya,

xixi tyripose ya, nuno roropa, xirikuato tõ maro aosenetohme.

13 Ywy roro Xiro ripõko ase jomipona aerohtohme,

jomihpyry ae ro orẽpyra exĩko mana.

Esemary tõ kurãkãko ase aytotohme.

Ypatary, Jerusarẽ rĩko ropa mana,

ypoetory tõ, imehnõ namoto tõ myhpokãko ropa mana,

toto tũtanohpõko ropa mana, namotome pyra toto ehtohme,

topehke pyra morara tyrĩko mã ynororo.

Ywy, Ritonõpo, Jamihmehxo Exikety, morara ãko ase.”

14 Ynara ãko Ritonõpo Izyraeu tomo a:

“Ejitu mõkomory kurã, Etiopia mõkomory roropa okyryryme exĩko mana.

Mokaro Sepa põkõ, ahno mosa exiketõ, anamotome exĩko mã toto;

oekahmatorỹko mã toto tymyhse keti ke.

Tosekumurukõ po porohnõko mã toto oẽpataka xine ynara katohme:

‘Ritonõpo amaro xine mana, ynoro rokẽ Ritonõpome mana,

imepỹ ritõme pyra mana.’ ”

15 Ritonõpo, Izyraeu tõ Esẽ mã typoetory tõ pynanohneme exikety,

ahno wino otonẽnõko mana.

16 Mokaro tyneponãmarykõ axikananomo ehxirõko mã toto, emero porehme.

17 Yrome Izyraeu tõ mã typynanohse Ritonõpo a;

jumãme typynanohse mã toto,

jũme toto onyporemãkapopyra ropa exĩko mã toto,

jũme ehxiropyra exĩko mã toto.

18 Ritonõpo a kapu tõkehko tyrise,

ynororo rokẽ Ritonõpome mana.

Sero nono tyrise roropa eya, tapuhse eya sero samo,

mame esaka tyrise eya.

Typõke pyra ehtohme sero nono onyripyra kynexine,

yrome ahno esaryme tyrise eya moroto toto ehtohme.

Ritonõpo Kuesẽkõ ynara ãko mana:

“Ywy ase Ritonõpo, imepỹ ritõ pyra mana.

19 Tokare pyra oturupyra exiase,

otonẽpyra exiase xinukutumao,

ynara kara exiase Izyraeu tomo a:

‘Kuupitoko ahno esao pyra.’

Ywy Ritonõpo, zae rokẽ oturuase,

jomiry zae ehtoh enetupuhtoko zae rokẽ exiryke.”

“Osehtoko oximõme imeimehnõ nono põkomo isene ro exiketomo,

osenepotoko apiakatoh tao!

Tuaro pyra mã toto ipunaka, oturuketomo tyneponãmarykomo a,

osepynanohposaromepyra exiketomo, ahno oximõme ytoytoketomo tynaxikatyã wewe risẽ puimananomo.

21 Osekarotoko apiakatoh tao;

oturutoko oseya ise awahtao xine.

Onoky a tokarose pake, senohne poko?

Ywy exiase, Ritonõpo, typoetory tõ pynanohne;

imepỹ ritõ pyra mana.

22 “Ahno tomo, sero nono põkõ emero, eramatoko ropa ya seromaroro typynanohsẽme oehtohkõme,

ywy ro rokẽ Ritonõpome ase, imepỹ pyra mana.

23 Jomihpyry totapose ya, onytyoromara ase;

ynara tyripõko ase jomihpyry ae ro:

ahno tõ emero tosekumurukõ po porohnõko mã toto jẽpataka, osekarotohme ya, jomipona toehtohkõme.

24 Zurũko mã toto, ynara ãko:

Ritonõpo rokẽ mã tyjamitunuru ekarõko kyya xine orẽpyra kuehtohkõme.

Yzehno aexityã emero toehxirosẽme exĩko mã toto,

ehxirõko mã toto jẽpataka.

25 Yrome ywy, Ritonõpo, Jako pakomotyã emero pynanohnõko ase,

mame jeahmãko mã toto.”