1 Ritonõpo Imehxo Exikety a Tuzenu tokarose ya,

tymenekase jexiryke eya omi kurã arotohme tymõkomokãkara a.

Tonyohse ywy eya typoremãkase aexityã ãkyematohme.

Tonyohse ywy eya imehnõ namoto tõ myhpokatoh ropa ekarotohme,

ãpuruhpyry taõkõ tũtatoh ekarotohme roropa.

2 Tonyohse ywy ynara katohme:

Ritonõpo poetory tõ pynanohtoh toehse mana.

Typoetory tõ zehno exiketõ poremãkapõko mana.

Tonyohse ywy xitaketõ emero emuhkehkatohme,

3 tãkye ehtoh ekarotohme parimã samo xitaketomo a Xião po.

Ihnamotoh myakamãko ase eremiatoh ke.

Zae ehtoh poko rokẽ exĩko mã toto;

wewe karawario sã exĩko mã toto Ritonõpo Kuesẽkõ narykatyamo.

Imehxo Ritonõpo ehtoh enepõko mã toto.

4 Tapyi tõ rĩko ropa mã toto aepukatyamo,

patãpo tõ roropa okynahxo typahse aehtyamo,

tuhke jeimamyry turumekase aehtyamo.

5 Ypoetory tomo, imehnõ nonory põkõ oehnõko mã toto erohse oeky tõ kaneru tõ pynopyry poko,

otupikõ arykary poko te, uwa tõ kurãkary poko, enara.

6 Mame Ritonõpo maro oturuketõme oesehtotorỹko imehnõ mana, Kuesẽkõ poetoryme roropa.

Mame imehnõ nonory põkõ mõkomohpyry omõkomorykõme exĩko mana,

atãkyemãko matose epyrypãko mõkomo itamurume esẽme oexirykõ poko.

7 Ohxirotopõpyrykõ tonahse, oporemãkatopõpyrykõ roropa,

toanahtose oya xine asakoro oorypyrykõ epehpyryme;

yrome seromaroro ononorykõ pona oehnõko matose,

asakoro omõkomohpyrykõ apoĩko ropa matose

omõkomorykõme, jũme tãkye exĩko roropa matose.

“Zae imehnõ riry yzamaro mana,

ematonanopyry se pyra ase ipunaka, imehnõ ryhmary roropa.

Anamonohpyra ase, kurã ke rokẽ ypoetory tõ epehmãko ase,

jũme jomiry etapõko ase roropa eya xine.

9 Apakomotyã imehxo exĩko mã toto imeimehnõ nonory po emero;

toto eneryhtao imehnomo a zuaro exĩko mã toto

kure rokẽ mokaro tyrise mã toto ya.”

10 Atãkyemãko Jerusarẽ põkõ mana,

eremiãko mã toto Ritonõpo nyrihpyry poko.

Niotakety sã pytakety sã roropa

upo kurã ke tõtupohtose toto typynanopyrykõke,

orẽpyra toehtohkõke roropa.

11 Mame wewe ahtary sã nono po, ipuhturu ahtary sã roropa tupito po,

moro sã typoetory tõ pynanohnõko Ritonõpo Imehxo Exikety mana.

Mame imeimehnõ nonory põkõ eremiãko.

Mokyro eahmãko mã toto emero porehme.