2
Zae Izyraeu ehtopõpyry
Morarame tonyohse exiase Ritonõpo a tõmiry ekarotohme Jerusarẽ põkomo a ynara kase:
“Ypoetory tomo, wenikehpyra ase poetome oehtopõpyry poko.
Zae mexiatose ymaro rokene,
yse mexiatose erẽnasenãme kuahtao!
Wenikehpyra ase jekahmatopõpyry poko oya xine ona tonorẽ poro, tupito tõ pyra aexihpyry poro.
Izyraeu tomo, ypoetoryme rokẽ mexiatose,
tapiakase mexiatose ymaro rokẽ oehtohme;
tiriiku samo, tapoise ahtao esemazupurume ekarotohme ya.
Oryhmahpõkõ tuãnohse ya emero porehme,
popyra ehtoh enehpoase toto pona.
Ywy, Ritonõpo, oturũko ase.”
Izyraeu tamuru tõ iirypyry
Jako pakomotyamo, oxiekyryme matose Izyraeu tomo; etatoko Ritonõpo Kuesẽkõ omiry oya xine. Ynara ãko mana:
“Oty popyra jehtoh tonese atamuru tomo a jurumekatohme eya xine?
Tyneponãmarykõ typahsẽme, isene exiketõ kara toahmase eya xine,
mame isaaro toehse roropa toh nexiase typahsẽme sã rokene.
Yse hkopyra toh nexiase;
Yrome ya tonehse toto Ejitu poe.
Ya ro tarose toto ona tonorẽ poro, ypy tõ poro, oramã kuroko;
tuna pyra ehtoh poro, orihmapotoh poro, morotona ahno ytopyra, ahno esary pyra roropa moroto.
Tonehse toto ya nono kurã pona, kure rokẽ toto otuhtohme tykyrysã poko, wewe epery tõkehko poko roropa.
Yrome moro pona toytose toto ahtao nuriame ynonory kurã tyrise eya xine;
ynekarohpyry eya xine esarykõme tyripose eya xine osa nuriame ipunaka.
Ypoko oturupopyra oturuketõ nexiase:
‘Otoko Kuesẽkõ nae?’ kara toh nexiase.
Ynyripohpyry poko atamorepaketõ juaro toexirykõ se pyra toh nexiase.
Kowenu poko erohketõ tyyrypyrykõ poko rokẽ toh nexiase, jomipona pyra.
Urutõ kõ tõturuse toto ritõ Paau omi poe samo,
tyneponãmarykõ toahmase eya xine, isene pyra aexityamo, ahno anakorehmasaromepyra exiketomo.”
Typoetory tõ hxirotopõpyry Ritonõpo a
Ynara ãko Ritonõpo mana:
“Naeroro ohxirotorỹko ropa ase, ypoetory tomo, opoenomo, apakõ roropa.
Ywy, Ritonõpo, oturũko ase.
10 Ytotoko ahmõta Xipere pona, xixi omõtoh wino enetohme;
imepỹ ahno aropoko Ketaa pona, xixi tũtatoh winakoxi, osenuhmatohme.
Moino ro sero panõ exipitopyra kynexine.
11 Imepỹ nonory põkõ tyritõ onymyakãmara tyneponãmary panõ ke, isene pyra exiketõ ke, tynyrihpyrykõ ke, toponãmasã ajohpe exikety ke.
Yrome ypoetory tomo a tymyakãmase ywy,
Ritonõpo kurã, Imehxo Exikety tymyakãmase eya xine, toponãmasã panõ ke, tynyrityã ke, isene pyra exiketõ ke, anakorehmara exiketõ ke.
12 Morara exiryke, ywy Ritonõpo, kapu tykytyky kamexipõko ase osenuruhkaketyme samo, tõserehse exiketyme sã ipunaka.
13 Azahkuru ehtoh asakoro tyrise ypoetory tomo a:
turumekase ywy eya xine, itunary kurã enatyryme jahtao te,
pẽkamã tahkase roropa eya xine tutunary ẽme ehtohme, konopo tunary kurãkatohme repe.
Yrome toto tunary ẽ toerakase mã kehko,
erurukaneme sã mã toehse kehko.”
Itunety sã mana Ritonõpo rumekary
14 Ynara ãko Ritonõpo mana:
“Izyraeu tõ imehnõ namotome pyra mã toto,
imehnõ namotome enurupyra toh kynexine.
Naeroro oty katohme tynamotome toto rĩko epetõkara nae?
15 Reão tõ sã Izyraeu tõ epetõkara tooehse toto enaroximase.
Izyraeu nonory tyrise eya xine patãpome,
ipatary tõ tonahkase eya xine,
pata põkõ pyra toehse.
16 Ejitu põkomo a Izyraeu zupuhpyry tỹmikase samo,
typoihtose ynororo tonahkase Mẽpi põkomo a te, Tapane põkomo a roropa.
 
17 “Izyraeu tomo, oorypyrykõ pokoino morara toehse oya xine.
Kurumekatose, Oesẽkomo, Orihpõkomo, oesemarykõ ae aarorykohtao ya.
18 Seromaroro otyme kure oya xine oytorykomo Ejitu pona tuna ẽse tuna Niro kuaka?
Otyme kure roropa oya xine oytorykohtao Axiria pona tuna ẽse tuna Eupyrati kuaka?
19 Popyra oehtopõpyrykõ awãnohtorỹko mana,
Tuãnohsẽme exĩko matose turumekase oya xine jexiryke.
Tuaro exĩko matose popyra jurumekary ehtoh poko oya xine,
itunetyme exikety sã mana Oesẽkõ Ritonõpo rumekary oya xine, jomiry omipona pyra oexirykomo, enara.
Ywy, Oesẽkomo Ritonõpo Jamihmehxo Exikety, oturũko ase.”
Ritonõpo eahmary se pyra
20 Ynara ãko Ritonõpo mana:
“Izyraeu tomo, pake jomipona pyra toehse matose.
Oesẽkõme turumekase ywy oya xine,
jeahmary se pyra toehse matose.
Mame ypy kae exiketõ po emero wewe tõ zopikoxi roropa,
jerutume ahtao zae pyra toehse matose imeimehnõ toponãmasã eahmary poko oya xine.
21 Uwa zoko sã mexiatose ya ynymenekahpyry arykatohme, kure eperytatohme.
Yrome seromaroro eneko ke!
Otyme mexitou?
Uwa zoko tonahkase sã matose,
typahsẽme toehse matose.
22 Upo xikuromã sã matose ya.
Toekurikase awahtao xine sahpau ke itamurume, sahpau jamihme exikety ke, ãtapurohpyrykõ enẽko ro ase;
iirypyryme oehtohkõ osenẽko ro mana.
Ywy, Ritonõpo, oturuno.
23 ‘Nuriame ehtoh poko pyra ynanexiase,’ kasaromepyra matose.
Toponãmasã Paau eahmary poko mexiatose.
Jakanahmã po oorypyrykõ poko mexiatose,
enetoko ke onyrihpyrykomo.
Kamera nohpory wãtasenã sã matose xiaxiake ytokety samo, typoko exikety zupiry poko.
24 Jumẽta sã roropa matose, tosẽke pyra exikety, ona pono, typoko exikety zupiryhtao eya:
mokyro onukuremasaromepyra imehnõ mana.
Jumẽtu orutua mokyro se exikety,
mokyro zupiry se pyra mana:
nuno po, moroto mokyro exĩko mana,
moroto enẽko mana.
25 Izyraeu tomo, tomeseke ehtoko õsetaparykõino, opupurukõ ryhmaryino, imeimehnõ neponãmary ekahmaryke oya xine;
tomeseke ehtoko roropa oesenarykõ anorypyra ehtohme.
Yrome ynara matose: ‘Arypyra! Toipe ywy!
Imehnõ neponãmary eahmary poko penetãko ywy,
mokaro poko rokẽ ase,’ ãko matose.”
Izyraeu tõ wãnohtopõpyry
26 Ynara ãko Ritonõpo mana:
— Omato tapoise ahtao ehxirõko mana. Mokyro sã Izyraeu tõ ehxirõko mã toto: amarokõ emero, otuisarykõ maro, tuisa mũkuru tõ maro te, Ritonõpo maro oturuketõ maro te, urutõ kõ maro. 27 Ehxirõko mã toto, emero ynara kananõ wewe risemy a: “Omoro mase papame” te, ynara kananõ roropa topu a: “Omoro mase ajame.” Morara exĩko mana, toeramase oexirykõke õparykõ ywinakoxi, oẽmytykõ eramara mexiatose ywinakoxi. Yrome popyra ehtoh toehse ahtao oya xine, oetuarimarykohtao oehnõko ya matose opynanohpotohkõme.
28 — Otoko na mokaro onyrityamo, oneponãmarykomo? Ah noehno toto oetuarimarykohtao, opynanohtohkõme ãkorehmarykõ waro toto ahtao. Juta tomo, onyrityã oneponãmarykõme tuhke exiry apatary tõ punero. 29 Ywy, Ritonõpo, ynara ekaropõko ase oya xine:
— Oty poko ykerekeremãko matou? Amarokõ emero kyriatose oepekõkarame. Jomipona pyra toehse matose, oty katohme? 30 Kuãnopyatose, yrome anakorehmara nexiase; okurãkarykõ se pyra oexirykõke. Osekato sã mexiatose, reão samo, oekyry tõ, urutõ kõ totapase oya xine. 31 Amarokomo emero etatoko pahne: Ynara ãko ase, Izyraeu tomo a: Oty sã jekarõko matou? Ona tonorẽ sã jekarõko matou? Nono sã etonatohme saereme pyra ahtao, ewomane pyra ahtao. Naeroro, oty katohme ynara ãko matou: “Yna penetatoh rĩko ynanase. Ritonõpo a ytopyra ropa ynanase,” ãko? 32 Tõkyry tõ poko wenikehsaromepyra oryximã mana; tupõ kurã poko wenikehpyra niotakety mana. Yrome ypoetory tõ tuenikehse mã toto ypoko tuhke ẽmepyry ae, ikuhpỹme. 33 Tuarohxo matose imeimehnõ ekahmary poko oximaro oehtohkõme; otarame imeimehnõ poko exiketõ amorepãko matose moro poko. 34 Oupõkõ tyxikuromase tymõkomokãkara munuru ke oryhmapitopyra exiketõ munuru ke roropa.
— Yrome ynara ãko mã ypoetory tomo: 35 “Zae rokẽ ase iirypyryme pyra. Ajohpe pyra, Ritonõpo yzehno pyra toehse mana,” ãko. Yrome ywy, Ritonõpo awãnohtorỹko ase: “Iirypyryme pyra ase,” karyke oya xine. 36 Oty katohme ytoytõko rokẽ mahno etyorõmatohme popyrahxo oehtohme? Axiria poko oehxirotopõpyry sã ehxirõko roropa mase Ejitu poko. 37 Oehnõko ropa matose Ejitu poe, tãkye pyra, toehxirose oexirykõke. Ywy ase Ritonõpo. Ya oepe tõ turumekase, ãkorehmananomo; mokaro maro oehtohkõ poko kurãkõ anapoipyra ekurehnõko matose.