47
Ritonõpo nekarohpyry pirixteu tõ poko
1 Osetapara ro Ejitu tuisary ahtao pata Kaza põkõ maro, tõturuse Ritonõpo Kuesẽkõ ya pirixteu tõ poko.
2 Ynara tykase ynororo: “Enetoko ke!
Tuna onuhnõko inikahpozakoxi,
tururume ytõko mana opotunety samo, tuna zueme exikety sã roropa.
Nono emero nerỹko mana, pata tõ maro, ahno maro pata põkomo.
Kohtãko mã toto takorehmane se toexirykõke,
sero nono põkõ xitãko mã toto emero porehme.
3 Kawaru tõ pupuru etãko mã toto, kahu tõ panaikato, ipupuru tõ panaikato.
Typoenoke exiketõ eramara ropa mã toto typoenõ zupitohme,
emary tõ jamihme pyra toehse exiryke, tapotũkehse toto.
4 Tõmehse moro ẽmepyry pirixteu tõ nonory enahkatopo.
Tõmehse moro ẽmepyry pata Tiro tõ akorekehkapotohme tope tomo a, Xitõ maro, enara.
Ywy Ritonõpo, pirixteu tõ enahkapõko ase, ahmõta Kereta poe aepyhpyamo emero.
5 Kaza põkõ ihnamõko mã toto toemynyhmarykõme,
Axikerõ põkõ emynyhmãko mã toto.
Oty pona xitakehpyra mã mokaro pirixteu tõ akoĩpyry?
6 Ynara kohtãko matose, pirixteu tomo:
‘Ritonõpo, otara ahtao yna etapakehnõko mah?
Atapemã ikurãkako ropa ẽ aka;
moroto rokẽ tehme ehtohme!’
7 Yrome moro tapema oseremasaromepyra mana,
erohtoh tokarose ahtao ya aerohtohme.
Mokyro aropoase osetapase pata Axikerõ tõ maro,
ahno maro roropa tuna konõto ehpio po.”