2 “Jo, penekehpyra exiko, ajohpame samo.

Oturutoh nae ro ase ekarotohme oya zae Ritonõpo ehtoh poko.

3 Tuaro jehtoh pitiko rokẽ pyra mana.

Moro ke enetupuhpõko ase oya zae Ritonõpo ehtoh poko, Jyrihpono.

4 Ynekarory emero ajohpe pyra mana;

ywy, oturukety amaro, tuaro exiketyme ase.

5 “Jamihmehxo Ritonõpo mana!

Imehnõ onyhtomara mana.

Emero ehtoh waro mana.

6 Okynahxo isene ro iirypyrymãkõ onyripopyra mana,

zae rokẽ tymõkomokãkara rĩko roropa mana.

7 Zae ehtoh poko exiketõ ewomãko Ritonõpo mana,

tuisame toto ripõko mana,

jũme tuisamehxo toto ripõko mana.

8 Yrome ãpuruhpyry taka tõmase ahno ahtao,

tymyhse toto ahtao keti ke, eary panõ ke roropa etuarimatohme,

9 moro toehse ahtao mokaro enetupuhpõko Ritonõpo mana,

inyrihpyrykõ pokoino tuãnohsẽme exĩko mã toto, iirypyrykõ emetakame, toto epyryparyke roropa.

10 Otatõme ahno ripõko Ritonõpo mana, enaroximatoh ekaroryhtao eya xine,

iirypyrykõ rumekapõko roropa mã eya xine.

11 Ritonõpo omipona toto ahtao, eahmaryhtao roropa eya xine, ewomanekõ nae exĩko mã toto,

kure rokẽ exĩko roropa mã toto toorihtohkõ ponãmero.

12 Yrome aomiry omipona pyra toto ahtao, orihnõko rokẽ mã toto tuaro pyra exiketõ samo,

tuna akuohnõko mã toto aorihtyã esaka.

13 “Ritonõpo waro pyra exiketõ mã zehno exikehpyra tukurohtao xine, tuãnohse toto ahtao ro, takorehmanekõ onykohmara mã toto.

14 Zae pyra mã toto,

Ritonõpo omiry omipona pyra, imeimehnõ poko mã toto.

Naeroro orihnõko mã toto poetome ro toto ahtao.

15 Yrome etuarimatoh ke ahno amorepãko Ritonõpo mana.

Popyra ehtoh eneryke enurukõ etapuruhmakãko mana enetupuhtohme Ritonõpo poko.

16 “Jo, typynanohse mexiase Ritonõpo a popyra ehtoh wino,

towomase mexiase eya torẽtyke pyra oehtohme.

Okyryry otuhtoh kurã po rokẽ motukuase,

tonahsẽ kurã menapyase.

17 Yrome seromaroro tapiakase mase,

iirypyryme mase.

Naeroro tuãnohse mase onyrihpyry emetakame.

18 Tomeseke exiko imehnõ nekarory anapoipyra oehtohme zae ehtoh tyoromatohme;

osenekunohpopyra exiko tineru ke.

19 Ãkorehmane kohmary oya anakorehmara mana.

Ajamitunuru anakorehmara roropa mana seromaroro.

20 Ikohmamyry poko penetara exiko, ahno tõ enahtoh poko.

21 Etuarimãko mase popyra oehtoh pokoino.

Tomeseke exiko eramara ropa oehtohme moro poko ropa.

22 “Jamihme kuhse Ritonõpo mana!

Onoky imehnõ amorepary waro nae isamo?

23 Ritonõpo onynamotomasaromepyra sytatose.

Onyhxirosaromepyra roropa sytatose zae pyra ehtoh riry poko eya.

24 Sero nono põkõ emero Ritonõpo eahmãko mã toto inyriry poko.

Omoro roropa wenikehpyra exiko mokyro eahmatohme.

25 Amekeino inyriry enẽko sytatose, emero porehme.

Osenuruhkãko sytatose inyriry kurã eneryke kyya xine.

26 Ritonõpo imehxo kuhse mana.

Zumo aexiry waro ehsaromepyra sytatose.

Otãto jeimamyry nae ynororo?

Moro onukuhsaromepyra sytatose.

27 “Tuna onuhmapõko mana nono poe esaka.

Mame konopome moro ripõko mana.

28 Akurũ poe konopo oehnõko mana, nono ehxikatohme, ahno maro, enara.

29 Akurũ tõ ytory waro pyra sytatose.

Otãto konomeru panaikato exĩko roropa kapu ao, Ritonõpo esao?

30 Sapararahme nenenehkane aropõko Ritonõpo mana tomye.

Yrome zue ao tuna konõto kuao, xinukutume rokẽ mana.

31 Moro sã tonahsẽ ekarõko Ritonõpo mana ahno a otuhtohme tuesapare ehtohme.

32 Nenenehkane apoĩko mana tomary ke topohme aropotohme tuotoh pona.

33 Konomeru mã enaroximãko tyryrykane jamihmã oepyry poko,

pui tõ zuaro mã toto tyryrykane oehsasaka exiry poko.