40
1 Mame ynara tykase Ritonõpo Jo a:
2 “Jo, ymaro oseosezukuru se mexiase azahkuru jehtoh kurãkatohme.
Yrome Jamihmehxo Exiketyme ase;
seromaroro typoremãse osekarõko mah te, jezuhnõko ro mah?”
Ritonõpo ezuhtopõpyry Jo a
(40.3-5)
3 Mame Ritonõpo tozuhse Jo a. Ynara tykase ynororo:
4 “Otara ãko ywy?
Oezuhsaromepyra ase.
Kurehxo mynyhme rokẽ jexiry.
5 Tymotyẽkase ywy jotururu sero poko.
Seromaroro ezuhtoh pyra ase ipunaka.”
Ritonõpo tõturuse ropa Jo a
(40.6—41.34)
6 Morarame tyryrykane konõto htae Ritonõpo tõturuse Jo a. Ynara tykase ynororo:
7 “Owõko ty xikihme seromaroro ynekaropory ezuhtohme oya.
8 Jyhxirory se hma zae pyra jexiry poko, iirypyryme jehtoh poko, zae rokẽ õsekarotohme?
9 Ajamitunuru ekarõko mah yjamitunuru samo?
Õmiry ke konomeru riry waro mahno panaikato konõto, jomiry samo?
10 Morohne riry waro awahtao tuisamehxo oexiry enepoko,
saeremehxo oexiry enepoko roropa, upo kurã amurutoh sã oya.
11 Epyrypaketõ eneko;
toto zehno oehtoh zumakako epona xine toto tuarimatohme.
12 Ajohpe pyra, epyrypaketõ eneko toto poremãkatohme, popyra exiketõ enahkatohme esarykõ po.
13 Zonẽko toto nono aka.
Imyhko roropa toto aorihtyã tõ esary ao.
14 Morohne riryhtao oya ywy roropa oeahmãko ase:
‘Ãmoreme orẽpyra mexino,’ ãko ase oya.
Ihpory Peemote kuremary waro hma?
15 “Onokyro Peemote eneko.
Ya tyrise ynororo oritopõpyry samo.
Onahpoty enahnõko mana pui samo.
16 Morararo ijamitunuru eneko, jaxiry pũ jamihme mã kehko, zuakuru pũ roropa!
17 Arokyry tanỹse ahtao tũpore mana, wewe amoriry samo, jaxiry tõ pũ roropa jamihme mã kehko.
18 Mokyro zehpyry tũporemã kehko metau samo, jaxiry kurimene sã roropa.
19 Mokyro eneryhtao oya osenuruhkãko mase, ynyrihpyryme mã mokyro, jamihme roropa emero motye!
Ywy ro rokẽ, mokyro Rihpõme ase.
Morararo iporemãkapory waro ase.
20 Onahpoty inapyry ahtãko mana ypy tõ po,
moroto imehnõ onokyro tõ osemeikãko mã toto.
21 Ataxikãko mana omoxino zopikoxi,
otonẽnõko mana sapisapiriimo htaka tuna ehpikuroko.
22 Omoxino tõ sã zerukumãnõko mã kehko, saukeiru tõ roropa.
23 Enaromyra mana tuna kumaryhtao;
oserehpyra roropa mana tuna Joatão zuemehxo ahtao eunary pona.
24 Onenukehkasaromepyra matose apoitohme;
onoky apoitoh riry waro nae mokyro apoitohme erẽnanohtohme?