JOEU
Joel
Ekarotopo
Taparara tõ enahpỹme, konopo oehpyra roropa. Morara exiryke Juta tõ nonory tonahkase. Moro eneryke tyya urutõ Joeu a tonetupuhse sero nono põkõ apiakary poko Ritonõpo a, iirypyrymãkõ wãnohtohme. Izyraeu tõ toahmase eya zae pyra toto ehtoh rumekatohme ropa eya xine, aeramatohme ropa Ritonõpo a. Morara ahtao kure Izyraeu tõ rĩko ropa Ritonõpo mana, taparara tõ enahkatopõpyry ekarõko ropa mana. Izyraeu tõ emãnõko ropa, tãkye exĩko ropa toto. Mame Jerusarẽ po Ritonõpo exĩko ropa mana typoetory tõ maro.
Tõmiry tokarose Ritonõpo a Tuzenu enehpory poko typoetory tõ pona emero porehme ( Joeu 2.28-32). Moro poko tõturuse Jezu poetory Peturu ẽmepyry Pẽtekoxite po ( Atos 2.17-21). Moro ẽmepyry ae Ritonõpo Zuzenu Kurã tyhtose Jezu poetory tõ pona tõximõse toto ahtao Jerusarẽ po.
Sero pape ao
Taparara hpe, konopo oehpyra 1.1—2.17
Nono kurãkãko ropa ase, ãko 2.18-27
Ritonõpo ẽmepyry 2.28—3.21
1
Sero nase Ritonõpo omiry, inekarohpyry Joeu, Petueu mũkuru a.
Ahno xitãko tynapyrykõ enahkatopõpyry poko
Etatoko ke, tamuximãkomo!
Otato ehtoko, Juta tomo!
Sero popyra ehtoh panõ toehse nae isene kuahtao xine, kytamurukõ, pakatokõ ehtopõpyry ae ro?
Opoenõkõ zurutoko sero popyra ehtoh poko,
typoenõ zurutohme eya xine,
typoenõ zurutohme roropa mokaro a sero popyra ehtoh poko.
Akurũ sã tooehse, itamurume akurũme sã tooehse taparara tõ rokene,
ahno narykatyã emero otyro tonahse eya xine.
Taparara tõ osemazuhme aehtyã nynomohpyry tonahse okomino aehtyamo a.
Apakatoko toetỹse exiketomo!
Oxitatoko, eukuru jehnahpyry sato komo,
uwa epery tonahkase exiryke,
eukuru tyrisenã pyra exĩko mã rahkene.
Taparara tõ tooehse toto, tuisa konõto soutatu tõ samo, tuhkehxo,
orẽpyrahxo tooehse mã toto ynonory pona.
Jery reão zery sã nexiase,
taere mana reão zery samo.
Uwa zoko tõ kynarykahpyrykõ tonahkase eya xine wikeira tõ roropa tonahse eya xine.
Eperytaketõ pihpyry tonahse eya xine,
amoriry tõ rokẽ tynomose karimutume.
 
Oxitatoko oryximã samo,
ihnamone exikety samo,
tynio orihtopõpyry hnamone samo.
Oturuketõ Ritonõpo poetory tõ xitãko mã toto Ritonõpo Tapyĩ tao
ahno nekarotyã tonahse exiryke,
tonahsẽ pyra eukuru pyra toehse roropa, enara.
10 Tupito tõ po ona po roropa otyro tõ pyra toehse exiryke,
ihnamõko nono mana, tiriiku tõkehko tonahkase exiryke,
uwa zoko tõ oriwera zoko roropa toorihse kehko.
 
11 Emynyhmatoko tupito poko erohketomo;
oxitatoko uwa zoko tõ poko erohketomo;
tiriiku pyra toehse exiryke,
sewata pyra toehse roropa.
Emero tarykasã tonahkase mana.
12 Uwa zoko tõ toorihse mã kehko wikeira tõ roropa;
romã zoko te, airiki panõ zoko kehko te,
masã zoko kehko te,
emero wewe eperytaketõ toorihse kehko.
Tãkye ahno ehtoh tonahse,
emynyhmãko mã toto ipunaka.
Eramatoko ropa oorypyrykõ rumekatohme
13 Oturuketomo, apoto apõ poko erohketõme matose,
upo amurutoko kamisa topuxiximã risemy, oxitatohkõme.
Ritonõpo poetory tomo, omõtoko Itapyĩ taka, oxitarykõ poko oẽmehtoko,
Ritonõpo Tapyĩ tao ahno nekarotyã pyra toehse exiryke tiriiku tõkehko pyra, eukuru pyra roropa.
14 Imoihmãkõ eahmatoko Ritonõpo Tapyĩ taka toto ytotohme!
Zurutoko toto toiro ẽmepyry ae otuhpyra toto kohmãtohme;
tuisa tõ eahmatoko Juta tõ maro emero oximõtohme Ritonõpo Kuesẽkõ Tapyĩ tao,
oturutoko eya kuakorehmatohkõme.
Enahkatoh enetupuhtopo
15 Moro ẽmepyry oehnõko, myhẽ mana!
Kuesẽkõ ẽmepyryme exĩko.
Sero enahkapõko Kuesẽkõ Jamihmehxo Exikety mana.
Oserehtoh konõto exĩko moro ẽmepyry ae mana!
 
16 Anakorehmasaromepyra sytatose,
kynarykahpyrykõ enahkary enẽko rokẽ sytatose.
Ritonõpo Kuesẽkõ Tapyĩ tao atãkyemara mã toto,
otuhtoh onyripyra roropa mã toto.
17 Tupito tõ tonore mã kehko,
ipuhturu tõ ahtara mana;
tykyrysã tiriiku tõkehko anapoipyra sytatose.
Morara exiryke tiriiku tõkehko kurãkatoh epukãko rokene.
18 Pui tõ kohtãko mã toto omise toexirykõke,
ytoytõko mã toto rowohpã samo,
tihtitihme ytoytõko mã toto onahpoty pyra exiryke.
Kaneru tõ roropa orihnõko mã toto.
 
19 Ritonõpo, oya kohtãko ase!
Wewe tõ toorihse kehko,
apoto ke jahkahpyry samo,
onahpoty tyahse mã emero porehme.
20 Onokyro tõ oya kohtãko mana takorehmatohkõme,
tuna tõ tasarahse exiryke,
onahpoty tonahkase roropa exiryke emero porehme.