1 Niniwe põkõ typynanohse Ritonõpo a exiryke tãkye pyra toehse Jona, tohne toehse roropa ynororo.

2 Ynara tykase ynororo:

— Ritonõpo, Jesemy, zuaro exiase ynonory poe oehpyra ro jahtao, serara exiry enetuputyase, imehnõ pyno oexiry waro exiase. Morara exiryke jepary se exiase Expania pona! Kure oexiry waro exiase, axĩ pyra iirypyrymãkõ wãnohnõko mase. Penekehpyra mase te, tyyrypyrykõ rumekary se ropa ahno ahtao axĩ ityoromãko mase, toto onuãnohpyra ekurehnõko mase. 3 Naeroro ajohpãme sã kuorihmapoko, kurehxo ya joorikyry mana, isene jehtoh kure hkopyra mana, tykase Jona.

4 Ynara tykase Ritonõpo eya:

— Otara toehse oya? Oty pokoino zehno mexino? tykase Ritonõpo.

5 Mame tutũtase Jona pata poe xixi tũtatoh wino. Moroto typorohse ynororo. Moromeĩpo tapyi pitiko tyrise eya porohtohme jerutumã zopino, xixi jetuhxo exiryke. Eraximãko nexiase, enetohme, otara Niniwe exiry. 6 Mame otyro tahtanohpose Ritonõpo a Jona epoehme samo, jerutume pohto ehtohme, jetuhkopyra xixi ehtohme. Tãkye toehse Jona moro otyro pokoino. 7 Yrome yrokokoro pakeimo, otyro mity tonahse oruko a, Ritonõpo omi poe. Otyro toorihse roropa. 8 Imeĩpo tõnuhse xixi ahtao tyryrykane tonehpose Ritonõpo a, axitunety, xixi tũtatoh wino. Tapotũkehse sã Jona nexiase axitũ xixi exiryke zupuhpyry pona. Naeroro tohne toexiryke toorikyry se toehse Jona nexiase. Ynara tykase ynororo Ritonõpo a:

— Ajohpãme sã joorikyry sehxo hano. Popyra ya serara jehtoh nase.

9 Yrome ynara tykase Ritonõpo eya:

— Aimo, zae oya yzehno oehtoh otyro orihtopõpyry pokoino? tykase.

— Ỹ, tykase Jona, zae ro ase, tohne jahtao. Tyekĩtapãse jexiryke joorikyry se ase! tykase.

10 Mame ynara tykase Ritonõpo eya:

— Moro otyro axĩ tahtase toiro kohmamyry ae. Yrokokoro osenepyra toehse ropa. Ipoko erohpyra mexiase, anahtanohpopyra mexiase. Yrome nupunato moro otyro eneryke oya, emynyhmãko mase ipoko. 11 Moro motye kuhse zae ro ase Niniwe põkõ poko toenupunase jahtao. Moro tao poeto tõ rokẽ ahtao, 120 miu motye nae nase zae ehtoh waro pyra ro exiketomo, eky tõ roropa tuhke nae, tykase Ritonõpo Jona a.