1 Mame Juta tomo a, tyekye exiketomo a nono tapoise tosarykõme. Ynara esarykõ kynexine: mya ikurenae Etõ ehpio pona, ona tonorẽ Zim pona roropa. 2 Toto nonory etyhpyry kynexine tuna konõto Aorikyhpyry ikurenae, 3 moro poe inonory kynexine ikurenaka onuhtoh Akarapĩ poe Zim pona. Moro poe inonory kynexine inikahpozakoxi Kate-Panea pona te, Ezerõ poro Ataa pona, eramãko Karaka pokoxi. 4 Morotoino inonory kynexine Azamõ pona te, iporiry kuroko, Ejitu nonory ehpikuroko tuna konõto Metiteraneu pona. Moroto Juta tõ nonory etyhpyry kynexine, Juta tõ nonory ehpio ikurenae.

5 Xixi tũtatoh wino Juta nonory kynexine tuna konõto Aorikyhpyry ehpio, mya tuna Joatão eporehkary pona. Moroto Juta nonory kynexine inikahpoe, 6 mya Pete-Hokara pona, morotoino Pete-Arapa pona. Morotoino onuhnõko topu Poã pona (Rupẽ mũkurume Poã kynexine). 7 Morotoino jakanahmã Ehxirotoh poe Tepia pona, inikahpozakoxi eramãko ropa Kiukau winakoxi ropa, moro onuhtoh Atumĩ etonie te, jakanahmã po ikurenaka, enara. Mya ropa tuna enatyry tõ Seme pona, morotoino tuna enatyry Rojeu pona. 8 Morotoino jakanahmã Pẽ-Hinõ takuohse, ypy jepuseu tõ nonory ikurenaka, pata Jerusarẽ pona. Morotoino Juta tõ nonory kynexine ypy emory pona te, jakanahmã Hinõ etonie, xixi omõtoh wino, jakanahmã Ahno konõto etyhpyry pona inikahpozakoxi. 9 Morotoino Juta tõ nonory kynexine ypy emory poe mya tuna enatyry tõ Nepetoa pona, morotoino pata tõ pona ypy Eporõ pũtokoxi. Morotoino toeramase ropa Paara pokoxi (Kiriate-Jearĩ roropa). 10 Mame Paara kuroko Juta tõ nonory kynexine xixi omõtoh wino ypy Seia pona. Morotoino ypy Jearĩ kuroko inikahpoe (ypy esety akorõ Kesarõ), Juta tõ nonory tyhtose Pete-Seme pokoxi te, mame Timina myakoxi. 11 Morotoino Juta tõ nonory kynexine ypy tõ onuhtoh ae Ekorõ poe inikahpozakoxi, eramãko ropa Xikerõ pona, ypy Paara ehpikuroko, mya Jamania poe tuna konõto Metiteraneu pona.

12 Juta tõ nonory ehpiry xixi omõtoh wino kynexine tuna konõto Metiteraneu.

Moro sã kynexine Juta tõ nonory ehpiõkomo.

13 Ritonõpo omihpyry ae ro Jozue toehse, Juta tõ nonory zokonaka tokarose Karepe a, Jepone mũkuru. Naeroro Eperõ tokarose eya Jozue a, Arapa patahpyry, Anake zũ patahpyry. 14 Moro poe Anake mũkuru tõ oseruao taropose Karepe a: Sesai te, Aimã te, Taumai, enara. 15 Morotoino toytose Karepe Tepia põkõ etapase. Apitoryme moro pata esety kynexine Kiriate-Sepea. 16 Ynara tykase Karepe:

— Jẽxiry Akasa ekarõko ase orutua a ipytyme ehtohme pata Kiriate-Sepea typoremãkase ahtao eya.

17 Moro pata typoremãkase Otonieu a, Kenaza mũkuru, Karepe akorony. Naeroro tõxiry Akasa tokarose eya ipytyme ehtohme. 18 Mame tyniotase Akasa ahtao Otonieu maro, “Nono ekaropoko omy a,” tykase ynororo eya. Akasa toytose Karepe a, mame tyhtose ynororo ahtao toky jumẽtu poe tõturupose jumy eya:

— Oty se hma, ohpo?

19 Ynara tykase nohpo tumy a:

— Ohpetu sehxo hano onekaroryme ya. Nono mekaroase ya, tonore exikety. Nono se ropa ase tuna enatyry nae exikety, tykase. Naeroro tõxiry a tuna enatyry maro nono tokarose Karepe a, nono kae exikety te, nono kae pyra exikety roropa, enara.

20 Nono maro pata tõ tapoise Juta tomo a tosarykõme. 21 Ikurenae, Etõ nonory ehpio pũto ynara tapoise eya xine: pata Kapazeu te, Etea te, Jakuru te, 22 Kina, Timona, Atata, 23 Ketese te, Azoa te, Itinã te, 24 Zipe te, Terẽ te, Pearote te, 25 Hazoa-Hatata te, Keriote-Ezerõ (Hazoa roropa), 26 Amã te, Sema te, Morata te, 27 Hazaa-Kata te, Hesemõ te, Pete-Parete te, 28 Hazaa-Suau, Peresepa, Piziotia, 29 Paara te, Iimi te, Ezẽ te, 30 Eutorate, Kexiu te, Horoma te, 31 Zikirake, Matamana, Sãsana te, 32 Repaote te, Xirĩ te, Aim te, Rimõ, enara. Atapona 29me pata tõ kynexine, morohne zomye roropa pata pisarara nae kynexine.

33 Mame pata tõ nono amimomã po ynara kynexine: Exitaou te, Zora te, Asanate te, 34 Zanoa te, Ene-Kanĩ te, Tapua te, Enã te, 35 Jaramute te, Aturã te, Soko te, Azeka te, 36 Saaraĩ te, Atitaĩ te, Ketea te, Keterotaĩ, enara. Atapona 14me pata tomo, morohne zomye roropa pata pisarara nae kynexine.

37 Ynara pata tõ tapoise roropa eya xine: Zenã te, Hatasa te, Mikitau-Kate te, 38 Tireã te, Mixipa te, Jokoteeu te, 39 Rakixi te, Posokate te, Ekorõ te, 40 Kapõ te, Raama te, Kitiri te, 41 Keterote te, Pete-Takõ te, Naama te, Maketa, enara. Atapona 16me pata tõ kynexine morohne zomye roropa pata pisarara kynexine.

42 Imehnõ pata tõ tapoise Juta tomo a roropa: Ripina te, Etea te, Asã te, 43 Ipita te, Asanate te, Nezipe te, 44 Keira te, Akazipe te, Maresa, enara. Atapona 9me pata tõ kynexine, morohne zomye roropa pata pisarara nae kynexine.

45 Ekorõ tapoise roropa eya xine moro pata zomye roropa pata pisarara kynexine. 46 Pata Axitote myhto exiketõ roropa tapoise eya xine Ekorõ poe tuna konõto Metiteraneu pona.

47 Axitote patary tõ tapoise roropa eya xine, Kaza patary tõ maro pata tõ pisarara maro iporiry ehpikoxi Ejitu ehpiõ po, tuna konõto Metiteraneu ehpikoxi roropa.

48 Pata tõ ypy tõ po: Samia te, Jatia te, Soko te, 49 Tana te, Kiriata-Sana (esety akorõ Tepia) te, 50 Anape te, Exitemoa te, Anĩ te, 51 Kosẽ te, Horõ te, Kiro, enara. Atapona 11me pata tõ kynexine pata tõ pisarara roropa morohne zomye.

52 Pata tõ tapoise roropa Juta tomo a: Arape te, Tuma te, Esã te, 53 Janĩ te, Pete-Tapua te, Apeka te, 54 Hũta te, Kiriate-Arapa (esety akorõ Eperõ) te, Zioa, enara. Atapona 9me pata tomo, pata tõ pisarara roropa morohne zomye.

55 Pata tõ tapoise roropa eya xine: Maõ te, Karameru te, Zipe te, Juta te, 56 Jezereu te, Jokoteão te, Zanoa te, 57 Kaĩ te, Kipea te, Timina, enara. Atapona 10me pata tõ kynexine pata tõ pisarara roropa morohne zomye kynexine.

58 Pata tõ tapoise roropa eya xine: Haruu te, Pete-Zua te, Ketoa te, 59 Maarate te, Pete-Anote te, Eutekõ, enara. Atapona 6me pata tomo, pata tõ pisarara roropa morohne zomye kynexine.

60 Pata Kiriate-Paau (esety akorõ Kiriate-Jearĩ) tapoise roropa eya xine te, Rapa roropa. Asakoro pata tomo pata tõ pisarara roropa morohne zomye kynexine.

61 Pata tõ ona tonorẽ po ynara kynexine: Pete-Arapa te, Mitĩ te, Sekaka te, 62 Nipisã te, “Pata Sautu esary” te, Tuna Enatyry Keti, enara. Atapona 6me pata tõ kynexine pata pisarara roropa morohne zomye ropa.

63 Yrome topekõkara, jepuseu tõ Jerusarẽ po exiketõ onenahkasaromepyra Juta tõ kynexine. Naeroro moroto ro mã toto seroae ro Juta tõ maro.