REWITIKU
Amorepatopõpyry Emero Tymoisã poko
Levítico
Ekarotopo
Sero Rewitiku ao Ritonõpo nyripohpyry nae inekarohpyry Moeze a ekarotohme Izyraeu tomo a zae toto ehtohme oximõme toto ahtao Ritonõpo eahmatohme, zae toto ehtohme roropa tynekarory tõ ekarory poko te, zae oturuketõ ehtoh poko toto erohtoh poko. Rewi tõ rokẽ tyripose Ritonõpo a erohketõme Tapyi Kurã tao, oturuketõ akorehmananõme. Moro enetupuhpotohme mana kure rokẽ Ritonõpo ehtoh poko. Naeroro typoetory tõ tymenekase eya zae toto ehtohme Tosẽkõ omipona. Sero ao ynara mana: “Imehnõ pyno ehtoko osepyno oehtohkõ samo” ( Rewitiku 19.18).
Sero pape ao
Ritonõpo nyripohpyry juteu tõ nekarory tõ poko 1.1—7.38
Arão tõ menekatopõpyry oturuketyme 8.1—10.20
Ritonõpo nyripohpyry zae ehtoh poko te, nuriame pyra ehtoh poko 11.1—15.32
Ẽmepyry Ahno Rypyry Korokatopo 16.1-34
Ritonõpo nyripohpyry zae ehtohme isene ahtao, zae Ritonõpo eahmary poko roropa 17.1—27.34
1
Morarame Moeze tykohmase Ritonõpo a tymaro Oximõtoh Kurã tae, ynara tyripotohme Izyraeu tomo a tynekarorykõ zahkaryhtao eya xine:
Okyno zahkary poko apoto apõ po
Tokykõ zahkaryhtao ahno a tynekaroryme Ritonõpo a tokykõ menekãko mã toto pui te, kaneru te, poti, enara. Pui ekaroryhtao eya jahkatohme apoto apõ po, pui orutua menekãko mana kurãkõ rokene. Mokyro arõko mana Tapyi Kurã omõtoh taka zae ehtohme Ritonõpo a. Moroto tomary rĩko mana okyno zupuhpyry pona zae ehtohme Ritonõpo a iirypyry tykorokase ehtohme. Toky etapãko mokyro mana moroto Tapyi Kurã ẽpataka. Mame oturuketõ, Arão pakomotyã imunuru ekarõko mã toto Ritonõpo a. Mame imunuru kuãnõko mã toto apoto apõ ehpiry 4mãkõ pokona Tapyi ẽpataka. Moromeĩpo okyno ekepyry pikãko mokyro mana, mame zoko sahsahkãko mana. Apoto zukãko oturuketõ mana apoto apõ po. Ikemehtõko mã toto apotopokõ ke. Mame apoto pona mokyro pui orutua isahsahkahpyry rĩko mã toto: zupuhpyry, ikasery zuahxiririny te, epyasyhny tõkehko kurikãko mokyro mana jaxiry tõ roropa. Mame apoto pona morohne rĩko oturukety mana jahkatohme. Mokyro pui orutua ekepyry zahkãko oturukety mana, porehme tynekaroryme, typoxine potu Ritonõpo a.
10 Kaneru menekaryhtao ahno a jahkatohme tynekaroryme Ritonõpo a te, poti roropa, orutua menekãko mana kurãkõ rokene. 11 Mame mokyro etapãko mana Ritonõpo ẽpataka apoto apõ poe inikahpozakoxi. Imunuru kuãnõko oturuketomo apoto apõ ehpiry poro 4mãkõ pona. 12 Moromeĩpo okyno sahsahkãko mokyro mana. Mame oturukety mokyro pũ zupuhpyry maro, ikasery maro zuahxirirĩ roropa apoto pona tyrĩko mana apoto apõ pona. 13 Mame okyno esẽ toky epyasyhny tõkehko kurikãko mana jaxiry tõ maro, mame morohne zahkãko oturukety mana tynekaroryme Ritonõpo a. Okyno tytororo jahkãko mana, tynekaroryme Ritonõpo a. Moro typoxine mana eya.
14 Torõ menekaryhtao ahno a jahkatohme tynekaroryme Ritonõpo a, utukuimo te, parutopuru menekãko mana enehtohme. 15 Mokyro torõ arõko oturukety mana apoto apõ pona, zukãko mana jahkatohme apoto apõ po, imunuru tũtãko apoto apõ ehpiry poro. 16 Mame torõ napyry ẽ oũko mana ipahtohme oruno htaka apoto apõ poe xixi tũtatoh winakoxi. 17 Mame torõ apoĩko mana aporiry poko aporiramãko mana, yrome anapiakara mana asakorõ ehtohme, mame mokyro zahkãko mana apoto apõ po. Zahnõko mana tytororo inekaroryme, typoxine exiketyme Ritonõpo Oesẽkomo a.