1 Ritonõpo, Izyraeu tõ Esẽ, tõturuse Moeze tomo a Arão maro 2 ynara tyripotohme Izyraeu tomo a:

Okyno tõ onokyro tõ roropa kure mã toto õtykõme, 3 ipepexipuhturu tãtapiakase ahtao, kayhkayhkame roropa toto ahtao. 4-6 Yrome kameru tõ onõpyra matose, koeriu tõ roropa, repere tõ maro, ynara exiryke, kayhkayhãko mã toh repe yrome ipepexipuhturu atapiakara exiketõme mã toto. Oya xine mokaro nuriame mã toto. 7 Poinokoimo pũ onõpyra matose. Oya xine poinoko tõ nuriame mã toto, ipepexipuhturu tãtapiakase repe, yrome kayhkayhkara mã toto. 8 Mokaro pũ onõpyra ehtoko, toto ekepyry anapopyra ehtoko toorihse ahtao. Mokaro emero nuriame mã toto oya xine.

9 Emero rokẽ kana tõ õnõko matose tozakoke ahtao, ipuhturu nae ahtao roropa. 10 Yrome onokyro tõ nakuaõkõ tozakoke pyra ahtao, tupuhtuke pyra, mokaro onõpyra ehtoko; 11 mokarohne nuriame mã toto oya xine. Naeroro toto onõpyra ehtoko, ekepyry anapopyra ehtoko toorihse ahtao. 12 Nakuaõkõ emero onõpyra ehtoko tozakoke pyra toto ahtao, ipuhturu maro.

13 Ynara torõ tõ onõpyra ehtoko, nuriame mã toto oya xine: piano tomo, kurumu tomo, pianoimo tomo, 14 asore tomo, parakão tomo te, 15 kurou tomo te, 16 awexituruze tomo, suhsuku tomo, kumarako panõ komo muramura tomo, 17 moxo tomo, kurou marĩjo tomo, ipi tomo, 18 kararia tomo, perikano tomo te, imotatyã enahnanomo, 19 sekonia tomo, akarara tomo te, poupa tomo; rere tõ roropa.

20 Nuriame oya xine onokyro tõ emero nono po ytoketomo te, taporihke exiketõ roropa. 21 Yrome onokyro tõ tyaxike exiketomo pyhseky kananomo, mokaro õnõko matose. 22 Taparara tõ emero tõnõko matose, kiriru tõ roropa. 23 Yrome imehnõ onokyro tõ ytoketomo nono po, taporihke ytoketõ roropa nuriame mã toto.

24-28 Okyno tõ ekepyry tapose ahtao oya nuriame exĩko mase xixi omõtoh pona: onokyro tomo te, okyno tõ roropa typepexipuhturu atapiakara exiketomo te, kayhkayhkara roropa exiketomo te, emero tupupuke asakoropane te, tomahtopuke exiketomo. Mokaro ekepyry tapoise ahtao oya xine oupõkõ ikurikatoko, mame nuriame exĩko ro mase xixi omõtoh pona. Mokaro nuriame oya xine mã toto.

29-30 Onokyro tõ esyryhmaketõ nono poro ynara nuriame mã toto oya xine: oruko tomo te, rakaatixa tomo, mũpo tomo, toupeira tomo te, zuana tomo, enara. 31 Mokaro tapose ahtao oya xine toorihse ahtao nuriame exĩko matose xixi omõtoh pona. 32 Mokaro ekepyry toepukase ahtao mõkomo pona, nuriame exĩko mana: wewe risẽme ahtao te, kamisa te, ipihpyry risemy te, kamisa topuxiximano te, emero rokene. Mame ikurãkatohme ropa morohne tyritoko tuna kuaka, yrome nuriame exĩko ro mana xixi omõtoh pona. 33 Mokaro ekepyry toepukase ahtao oripo orino risẽ aka, emero moro ao exikety nuriame exĩko mana. Mame moro oripo itohtohkatoko. 34 Tuna moro oripo ao exikety epukaryhtao tonahsẽ pona, moro tonahsẽ nuriame exĩko mana. Emero eukuru moro oripo ao exikety nuriame mana. 35 Nuriame exikety ekepyry toepukase ahtao mõkomo pona nuriame exĩko mana. Orino risẽme ahtao, orinato tõkehko nuriame exĩko mana, typahsẽme exĩko mana; 36 tuna enatyryme ahtao, tuna ẽ konõto ahtao roropa kure ro mã tuna moro aono, yrome nuriame aexihpyry apohpono nuriame exĩko mana. 37 Nuriame exikety ekepyry toepukase ahtao ipuhturu pona, tarykasẽ pona kure ro mana, nuriame pyra; 38 yrome moro ipuhturu tõ ehxikaryhtao tuna ke mame nuriame exikety ekepyry toepukase ahtao epona, nuriame exĩko mã morohne.

39 Okyno tõsẽme exikety tamoreme toorihse ahtao, mokyro ekepyry apohpono nuriame exĩko mana xixi omõtoh pona. 40 Mame mokyro pũ tõse ahtao ahno a tupõ kurikãko mana, mame nuriame exĩko mana xixi omõtoh pona; mokyro okyno ekepyry tupuimase ahtao ahno a tupõ kurikãko ropa mana, mame nuriame exĩko roropa mana xixi omõtoh pona.

41 Onokyro tõ nono poro ytoketõ onõpyra ehtoko; nuriame mã toto oya xine. 42 Sararahme ytoketõ onõpyra ehtoko te, ytoytoketõ asakoropane pupu po te, tuhke tupupurukõ po roropa. 43 Nuriame pyra ehtoko, mokarohne onõpyra ehtoko ipunaka. 44 Ywy ase Ritonõpo Oesẽkomo; anamonohpyra ehtoko jomiry omipona, zae rokẽ jexiryke nuriame pyra. Naeroro nuriame pyra ehtoko ysamo, mokarohne nuriame exiketõ poko pyra ehtoko. 45 Ywy ase Ritonõpo, kuenepyatose Ejitu poe Oesẽkõme jehtohme. Naeroro nuriame ehtoh poko pyra ehtoko kure rokẽ ehtoh poko jehtoh samo.

46 Morohne ynyripohpyry oya xine onokyro tõ poko, torõ tõ poko, isene exiketõ poko nakuaõkõ poko, nono poro ytoketõ poko, enara. 47 Morohne ãmorepatohkomo nuriame pyra ehtoh poko te, nuriame ehtoh poko roropa, onokyro tõ pũ tõsẽme ehtoh poko, tyorõ pũ onõpyra oehtohkõme, enara.