MARAKIA
Malaquias
Ekarotopo
Irãnao jeimamyry 500mã poe 450mã pona oehpyra ro Jezu Kyrixtu ahtao, urutõ Marakia tõturuse Juta tomo a Ritonõpo Tapyĩ tyrise ropa ahtao Jerusarẽ po. Yrome Ritonõpo omihpyry omipona pyra toh kynexine. Inekaropohpyry onenehpyra tynekaroryme Ritonõpo a, oserematoh ae Ritonõpo oneahmara toto, typytase toto Ritonõpo poetory tõ kara maro, oturuketõ zae pyra toh kynexine. Naeroro tyyrypyrykõ rumekary se toehse toto ahtao rokẽ zae toehtohkõme ropa Ritonõpo zamaro toto exiry. Ritonõpo maro oturuketõ turuse Marakia a zae pyra toehtohkõ poko; amonohnõko toh kynexine tynekarorykõ enepyry poko jahkatohme apoto apõ pona, Ritonõpo zamaro pyra toh kynexine. Mame turuse ropa toto Marakia a, Ritonõpo oepyry poko sero nono pona typoetory tõ apiakase, yrome osemazuhme urutõ enehpõko mana tõmiry ekaroneme, esemarykõ kurãkatohme. Ahno tomo a tyyrypyrykõ rumekaryhtao, aeramatohkõme ropa Ritonõpo a ipoetoryme exĩko ropa mã toto.
Sero pape ao
Izyraeu iirypyryme 1.1—2.16
Zuãnopyry, ipynanopyry 2.17—4.6
1
Izyraeu tõ pyno Ritonõpo ehtoh sero
1 Sero Ritonõpo oturutopõpyry Marakia a ekarotohme Izyraeu tomo a.
2 Ritonõpo ynara ãko typoetory tomo a:
— Moino ro opyno xine ase, ãko.
Yrome ekaropõko mã toto:
— Otara enetupuhnõko ynanah, yna pyno oexiry poko?
Ynara ãko Ritonõpo mana:
— Atakorõme Ezau tõ nexiase Jako maro. Yrome Jako pyno exiase ipoenõ maro, ipakomotyã roropa, 3 yrome Ezau tõ se pyra exiase ipoenõ maro, ipakomotyã roropa. Ezau nonory ypy tõ po tonore tyripose ya, onokyro tõ esaryme rokẽ ehtohme.
4 Ezau pakomotyã, etomita tomo ynara karyhtao: “Kypatarykõ tonahkase mã kehko, yrome tyrĩko ropa sytatose.” Ritonõpo Jamihmehxo Exikety toto ezuhnõko mana: “Tyrise ropa ahtao eya xine ipahnõko ropa ase. Mokaro nonory esehpãko imehnõ mana ‘Popyra exiketõ nonoryme,’ te ‘Mokaro zehno exikehpyra Ritonõpo exĩko mana, jũme,’ ” ãko mã toto.
5 Moro ehtoh enẽko Izyraeu tõ mana. Mame ynara ãko mã toto:
— Orẽpyra Ritonõpo mana. Ijamitunuru enẽko imehnõ mana mya Izyraeu tõ nonory moinakoxi.
Oturuketõ zupokary Ritonõpo a
6 Ritonõpo Jamihmehxo Exikety ynara ãko mana oturuketomo a:
— Tumy omipona imũkuru mana, tosẽ omipona inamoto roropa mana. Omykõme jahtao oty katohme jomipona pyra hmatou? Oesẽkõme jahtao oty katohme juno pyra hmatou? Jyhtomãko matose, yrome moro sã awahtao xine ro ekaropõko matose: “Otara ahtao ohtomãko ynanexiahse?” 7 Tonahsẽ nuriamã ekarõko matose apoto apõ po onekarorykõme ya. Mame ekaropõko ro matose: “Otãto ohtomãko ynanahe?” Jyhtomãko matose apoto apõ ryhpopãkaryhtao oya xine. 8 Jyhtomãko matose roropa oekykõ tonurãkara enepyryhtao oya xine onekarorykõme ya, kure pyra exiketõ roropa, ytoytopyny enepyryhtao roropa. Moro riryhtao oya xine, zae osekarõko matohu? Ikuhtoko, mokaro panõ ekarotoko kowenatu a, otuisarykomo a! Moro riryhtao eya jamaro nae, kurãkõ ekarõko nae oya xine? Ywy, Ritonõpo Jamihmehxo Exikety, oturuno.
9 Oturuketomo, seromaroro oturutoko Ritonõpo a kure kyritohkõme. Õmirykõ etãko nae, onekarorykõ xihpyry ekaroryhtao oya xine eya?
10 Ritonõpo Jamihmehxo Exikety ynara ãko oturuketomo a:
— Kurehxo exiry ya Ytapyĩ apururu oya xine. Moro toehse ahtao apoto onukara oexirykõ ykyryry apoto apõ po. Toiparo rokẽ onekarorykõ zahkãko matose. Yzamaro pyra matose; onekarorykõ se pyra ase ipunaka. 11 Imeimehnõ nonory po emero, jeahmãko mã toto. Emero rokẽ po ixtaratu zahkãko imehxo jehtoh ekaroryme, tokykõ kurã ekarõko mã toto tynekarorykõme ya. Emero Tuisamehxo jekarõko mã toto. 12 Yrome amarokõ jyhtomãko matose ykyryry apoto apõ nuriame ekaroryhtao oya xine. Jyhtomãko roropa matose typahsẽ enepyryhtao jahkatohme apoto apõ po onekarorykõme ya. 13 Ynara ãko matose: “Typenekehse yna morohne poko!” Ypoihtõko matose, jeunohnõko roropa matose. Okyno ematonanopyhpyry enehnõko matose ya, ahmitahpyryme exikety te, kure pyra exikety roropa. Morohne yzamaro pyra mana ipunaka! Ywy ase Oesẽkomo. 14 Popyra ehtoh enehpõko ase ajohpe exikety a, tõmiry onymoipyny a: “Okyno kurã ekarõko ase jeky tõ poe,” kahpono a repe, yrome tapurose exikety rokẽ enehnõko mana tynekaroryme ya! Ywy ase Tuisamehxo Exikety, imeimehnõ nono põkõ emero Tuisame Imehxo Exiketyme jekarõko mã toto. Ywy, Ritonõpo Jamihmehxo Exikety, oturuno.