2
Jezu enese aehtyã xixi tũtatoh wino
1 Mame Jezu tonuruse Berẽ po, Jutea rãnaõ pata po, Erote Jutea tuisaryme ahtao. Mame te rokẽme orutua kõ toytose Jerusarẽ pona. Xixi tũtatoh wino esarykõ kynexine. Xirikuato poko atamorepaketõ kynexine. Mame ynara tykase toto Jerusarẽpõkomo a,
2 —Otoko hko enurusenã nae? Juteu to tuisaryme aenuruhpyry nae? Ikyryry ynanenease xirikuato, tõnuhse ahtao xixi tũtatoh wino. Moro eneryke yna a aenururu waro toehse yna. Moro xirikuato tokahmase yna a. Morara exiryke mokyro enese ynanoehno xiaro kure tyritohme, tykase toto Jerusarẽpõkomo a.
3 Mame mokaro xirikuato ekahmahpõkõ omiry etaryke tyya xine tutuisarykõ turuse toto a, Erote turuse. Mame toto omiry etaryke tyya torẽtyke toehse Erote imepỹ tuisa se pyra toexiryke tymyakãme. Morararo Jerusarẽpõkõ emero torẽtyke toehse toto. 4 Mame Erote a Ritonõpo maro oturuketõ tykohmase tyya, tamuximãkomo, Moeze omihpyry poko imehnõ amorepananõ roropa.
—Otoko Ritonõpo nymenekahpyry enurũko nae Kuesẽkõme? tykase Erote, tõturupose eya xine.
5 —Berẽ po Jutea rãnaõ po, tykase toto. Ynara tymerose exiryke urutono a pake Ritonõpo poe,
6 “Etatoko pahne Jutea rãnaõpõkomo, Berẽpõkomo,
tuisame hkopyra osekarõko matose.
Pata pitiko rokẽ oesarykõ ekarõko roropa matose repe.
Yrome oesao xine, tuisa konõto enurũko mana.
Izyraeu tõ esẽme exĩko mã ynororo,”
ãko Ritonõpo poe urutõ nymerohpyry, tykase toto Erote a.
7 Morarame Erote a xirikuato ekahmahpõkõ tykohmase tyya toto maro tõturutohme tokare pyra. Mame tõturupose eya xine xirikuato onuhtopõpyry poko,
—Otara ahtao xirikuato menepitoatohse? tykase ynororo. 8 Mame zuaro toehse tahtao taropose toto eya Berẽ pona.
—Ytotoko Berẽ pona. Enurusenã zupitatoko. Mame mokyro tonese oya xine ahtao, meramatatose ropa aporo juruse. Ywy roropa jytory se ase kure tyrise, tykase Erote eya xine repe. (Ajohpe morara tykase ynororo poeto etapary se toexiryke.)
9 Mame morara kary etaryke tyya xine toytose toto. Toytorykohtao xirikuato tonese ropa eya xine, mororo inenehpyrykõ ro xixi tũtatoh wino, aosenepohpyry ro. Mame toto esemazupurume xirikuato toytose poeto pitiko esary pona. Mame totypohse epozakoxi. 10 Tãkye toehse toto yronymyryme xirikuato eneryke tyya xine. 11 Mame tapyi taka toytose toto. Moro tao enurusenã tonese eya xine tyse enao, Maria enao. Mame tosekumurukõ po typorohse toto Jezu ẽpataka, “Kure mase imehxo,” katohme tyya xine eya. Mame typakarãkõ ae tynekarorykõ touse eya xine ekarotohme eya. Uuru, ixtaratu, imepỹ ixtaratu roropa, enara touse kehko eya xine tynekarorykõme eya.
12 Mame tõsenetykõ Ritonõpo omiry totase eya xine.
—Ytopyra ropa ehtoko Erote a, tykase eya xine aosenetykomo. Morara exiryke imepỹ osema ae rokẽ toytose ropa toto, tosaka xine.
Aepatopõpyrykõ Ejitu pona
13 Morarame toytose ropa xirikuato ekahmahpõkõ ahtao, Ritonõpo nenyokyhpyry tõsenepose sã Joze a aosenety. Ynara tykase sã ynororo Joze a,
—Owõko, poeto aroko jẽ maro. Epatoko Ejitu pona. Mame moroto rokẽ mehtatose aporo. Turuse ropa ya awahtao xine rokẽ moehtatose ropa. Poeto pitiko mireremã zupĩko Erote mana etapatohme repe, tykase sã Ritonõpo nenyokyhpyry Joze a aosenety.
14 Morara exiryke towõse Joze. Mororomero toytose toto koko. Poeto tarose eya jẽ maro Ejitu pona. 15 Mame moroto toehse toto, Erote orikyry ponãmero.
Morara toehse zae Ritonõpo omihpyry exiryke. Pake Ritonõpo poe ynara tykase urutono, “Ejitu poe umũkuru enehpõko ropa ase,” tykase pake ynororo.
Poetohti etapatopõpyry poko Erote a
16 Morarame mokaro a tonekunohtopõpyry poko tutuarõtase tahtao, tyekĩtapãse Erote. Xirikuato ekahmahpõkõ zehno toehse. Mame soutatu to taropose eya Berẽ pona poeto pisarara mireremãkõ etapatohme. Emero porehme totapapose toto orutua komo, inenyohtyamo a. Tyse suhsuru poko ro exiketõ tonahkapose eya Jezu enurutopõpyry poko tutuarõtase toexiryke xixi tũtatoh wino aehtyamo a turuse toexiryke. Morara exiryke emero totapapose toh eya, Berẽpõkõ poenomo, Berẽ zomyẽkõ poenomo roropa. Enara totapapose toh Erote a.
17 Zae morara tykase Jeremia pake Ritonõpo poe,
18 “Panaikato osetãko mana Rama po.
Tuhke xitaketõ osetãko mana,
typoenõkõ hnamõnanomo.
Rakeu tõ roropa xitãko mana.
Xitakehpyra toh mana, toorihse typoenõkõ exiryke,”
tykase Jeremia pake.
Aehtopõpyrykõ ropa Ejitu poe
19 Morarame Erote toorihse ahtao Ritonõpo nenyokyhpyry toytose Joze a, Ejitu poro Joze ahtao. Mame ynara tykase sã aosenety,
20 —Owõko ropa. Poeto aroko ropa jẽ maro Izyraeu tõ esaka ropa. Mokaro poetohti etapary se aehtyã toorihse toh mana emero porehme, tykase sã Ritonõpo nenyokyhpyry Joze osenety.
21 Morarame Joze towõse ropa. Poeto tarose jẽ maro Izyraeu to esaka ropa.
22 Mame Erote mũkuhpyry esety Akerau. Mokyro kynexine Jutea esemy. Tumy myakãme toehse kynexine. Mokyro ekary etaryke tyya, Jutea pona toytory se pyra Joze toehse. Mame Ritonõpo a taosenehkase ropa. Mame aomi poe toytose Joze Karirea pona. 23 Mame Nazare pona toytose roropa toto, Karirea rãnaõ pona. Moroto ke ehse toh rahkene, Ritonõpo omihpyryae ro. Pake ynara tykase urutõ kõ Ritonõpo poe inymenekahpyry poko, “Nazarepõme exĩko mana,” tykase.