4
Osetapara exĩko Tuisame Ritonõpo ahtao
(Izaja 2.2-4)
1 Imeĩpo moro ypy, Ritonõpo Tapyĩ esary
imehnõ ypy tõ motye kaehxo exĩko mana, emero porehme.
Mame morotona ytõko ahno tõ mana,
imehnõ nonory põkomo, imehnõ nonory poe emero porehme.
2 Ynara ãko mã toto:
“Ehmaropa onuhse ypy pona Ritonõpo esary pona, Ritonõpo Tapyĩ taka, Izyraeu tõ Esemy a.
Kuamorepatorỹko mana zae ehtoh poko kuehtohkõme;
Inyripohpyry omipona exĩko sytatose.
Ynara exiryke, Kuamorepatohkõ Ritonõpo poko Jerusarẽ poe oehnõko mana;
ypy Xião poe typoetory tõ netaryme oturũko mana.”
3 Emero nonory põkõ apiakaneme exĩko Ritonõpo mana.
Atae pyra ahno ahtao, imoihmãkomo moe toto ahtao roropa zae ehtoh ekarõko mã ynororo eya xine.
Mame ahno etapatoh tyoromãko mã toto tupito nonory ahkatoh ke,
tywaratã tõ myakamãko mã toto, tiriiku sahkatoh ke.
Moromeĩpo jũme osetapara exĩko imehnõ nonory põkõ mana.
Osetapatoh pyre onyripyra ropa exĩko mã toto.
4 Enaromyra exĩko mã toto emero, towomase toexirykõke;
oseremãko mã toto torẽtyke pyra
wikeira zopino jerutumã po, uwa zoko zopino roropa jerutumã po.
Moro omi totapose Ritonõpo Jamihmehxo Exikety a.
5 Imehnõ nonory põkõ tyneponãmarykõ eahmãko mã toto,
aomipona roropa mã toto;
yrome kymarokomo a Ritonõpo Kuesẽkõme mana.
Ynororo eahmãko sytatose,
aomipona exikehpyra sytatose, jũme.
Typoetory tõ pynanohnõko Ritonõpo mana
6 Ynara ãko Ritonõpo Kuesẽkõ mana:
— Imeĩpo, etuarimaketõ enehnõko ase oximõme, emero tuãnohse aexityã ya, taropose toto ahtao ya tynonorykõ poe. 7 Imeimehnõ nonory tõ poe, moe exiketõ poe, isene ro exiketõ emero enehnõko ropa ase ahno orẽpyra exiketyme toto ehtohme. Ywy Ritonõpo tuisame exĩko ase ypy Xião po. Mame moromeĩpo ypoetoryme exĩko ropa mã toto, jũme. 8 Mame pata Jerusarẽ po, Ritonõpo, kaneru tõ esẽ sã typoetory tõ pynanohnõko mana. Mame pata imehxo exĩko ropa mana, tuisa konõto esaryme pata Jerusarẽ po.
9 Jerusarẽ, oty katohme xitãko mah nohpo samo aenururuhtao jetũ toehse ahtao? Tutuisake pyra toehse matou? Tamorepaneke pyra roropa hmatou? 10 Jerusarẽ, sam kahtoko, kui kahtoko nohpo samo aenururuhtao jetũ toehse ahtao; apatary põkõ tũtãko mã toto ona po ehtohme. Imeĩpo ytõko mã toto Papironia pona. Yrome moroto opynanohtorỹko Ritonõpo mana oepetõkara winoino.
11 Tuhkãkõ, imeimehnõ nonory põkõ tõximõse mã toto etonatohme amaro xine, Jerusarẽ põkomo. Ynara ãko mã toto: “Kure exiry Jerusarẽ tonahkase ahtao, nuriame tyripose ahtao roropa.” 12 Yrome Ritonõpo osenetupuhtoh waro pyra mã toto. Inyriry waro pyra roropa mã toto. Tykohmase mã toto eya toto wãnohtohme, tiriiku sã oximõme tyrise ahtao apotohme apiakatohme ipihpyry maro pyra ehtohme.
13 Ynara ãko Ritonõpo mana:
— Jerusarẽ põkomo, owõtoko oepetõkara wãnohtohme! Jamihme oritorỹko ase pui orutua samo kurimene risẽ tyretyke, metau risẽ ipupuru tomo. Ahno tuhkãkõ poremãkãko matose. Inapoityã kurã imehnõ etaparyke eya xine, moro enehnõko matose onekarorykõme ya, Ritonõpo sero nono Esemy.