1 Morarame eporehkasasaka toh kynexine Jerusarẽ pona. Oriwera ãkataka toeporehkase toto. Atameke pyra pata tõ kynexine Pehpaje, Petania ypy Oriwera maro. Mame typoetory tõ tonyohse Jezu a asakoro.

2 —Mõ pata pona ytotoko. Morotona toeporehkase awahtao xine jumẽtu mũkuru enẽko matose, tymyhse. Ahno anaropitopỹ enẽko matose. Mỹpokatatose enehtohme xiaro ya. 3 Mame, “Oty kahtohko arõko matou?” karyhtao imehnomo a, ynara kaxitoko eya xine. “Arypyra, arõko rokẽ ynanase. ‘Enehta aporo,’ tykase tuisa exiryke yna a. Axĩtao rokẽ arõko ynanase. Enehnõko ropa ynanase,” kahtoko eya xine, tykase Jezu typoetory tomo a.

4 Morarame toytose toto. Jumẽtu mũkuru tonese eya xine rahkene, tapyi eutary pota tao, osema ehpio. Mame tymyhpokase eya xine ahtao,

5 —Oty katoh jumẽtu mũkuru myhpokãko matou? tykase imehnõ eya xine, tõturupose.

6 Mame tosẽkõ omihpyry tokarose eya xine.

—Ahtao arotoko, tykase toto eya xine. 7 Mame jumẽtu mũkuru tarose rahke eya xine Jezu a. Morarame tupõkõ tyrise toto a jumẽtu mypatarãnaka Jezu porohtohme epona. 8 Imoihmãkomo a roropa tupõkõ tyrise osema taka. Marariary panõ tapukase roropa eya xine osemae tyritohme, eporo jumẽtu ytotohme. 9 Mame emero tãtãkyemase toto, osemazuhme ytoketomo, okomino ytoketõ roropa. Ynara tykase toto,

—Kure Ritonõpo mana. Imehxo reh nahse Ritonõpo omi poe aepyhpyry. 10 Kuesẽkõme exĩko mana, tuisa konõtome, pake tuisame Tawi ehtopõpyry samo. Ahtao kure rahkene. Kure Ritonõpo, imehxo! tykase toto tãkye toexirykõke.

11 Morarame Jerusarẽ pona toeporehkase toto. Ritonõpo maro oturutoh taka axi rokẽ tomõse Jezu osenuhmase rokene. Tykohmãse exiryke toytose ropa ynororo Petania pona typoetory tõ maro, 12mãkõ maro.

12 Yro kokoro Petania poe toytory ropahtao omise Jezu kynexine. 13 Amekeino tykyrysã tonese eya. Wikeira tonese atarỹkara ro. Mame toytose ynororo wikeira epery enahse repe. Yrome topere pyra kynexine zary rokene, takehse exiryke.

14 —Taroino oepery onenahpyra exĩko exino mana, jũme, tykase Jezu tykyrysamo a.

Morara kary totase ipoetory tomo a.

15 Morarame Jerusarẽ pona toeporehkase rahkene. Ritonõpo maro oturutoh taka tomõse Jezu. Moro tae osepekahketõ tutũtanohpose ropa eya okyno ekamonanõ maro. Tineru emetakamananõ meza tõtorimase roropa eya. Parutopuruimo ekamonanõ apõ tõtorimapose roropa eya. 16 Otyro anaropopyra Ritonõpo maro oturutoh takuroko kynexine ynororo.

17 Morarame tamorepase toto eya. Ynara tykase ynororo,

—Ynara tymerose Ritonõpo omiryme, “Emero ahno ytapyĩ esehtõko Ritonõpo maro oturutohme,” me tymerose. Yrome ityorõmãko matose omato kõ tapyĩme ehtohme, tykase Jezu eya xine.

18 Morarame Jezu otururu totase Ritonõpo maro oturuketõ tuisary tomo a, Moeze omihpyry warõkõ maro. Jezu etapary se toehse toto zumoxike toexirykõke, emero Jezu poko imehnõ atãkyemary eneryke tyya xine.

19 Mame tykohmãse ahtao typoetory maro Jezu toytose ropa pata poe.

20 Morarame yrokokoro pakeimo toytorykohtao ynara katopõpyry Jezu a tonese eya xine, “Oepery onenahpyra exĩko exino mana jũme” katopõpyry tonese eya xine. 21 Pake toorihse tonese eya xine. Mame wenikehpyra Peturu kynexine moro katopõpyry poko eya.

—Jezu eneko ke! Moro anaorihmapohpyry pake toorihse, tykase Peturu eya.

22 Mame ynara tykase Jezu eya xine,

—Wenikehpyra ehtoko. Ritonõpo enetuputyryhtao oya xine, 23 mo ypy aroporyhtao oya xine tuna konõto kuaka aepukatohme, “Epukãko hna reh,” kara ehtoko okurohtao xine. Mame tuna konõto kuaka Ritonõpo omi poe epukãko mana. Ritonõpo rokẽ enetupuhtoko okurohtao xine. 24 Morara exiryke ynara ãko ase oya xine, Ritonõpo maro õtururukohtao õpenerykõ poko, inekarory enetupuhtoko. Mame õpenerykõ ekarõko oya xine mana. 25 Mame õtururukohtao Ritonõpo a imehnõ zehno pyra ehtoko. Zae pyra toto ehtopõpyry poko tuenikaro rokẽ ehtoko, Omykõ kapuaõ ozehno xine pyra ehtohme roropa, oorypyrykõ korokatohme roropa eya. 26 Mãpyra imehnõ rypyry poko tuenikaroro pyra awahtao xine, Omykõ kapuaõ roropa oorypyrykõ onykorokara mana, tykase Jezu eya xine.

27 Morarame toeporehkase toto Jerusarẽ pona. Jezu ytoytoryhtao Ritonõpo maro oturutoh tao, morotõkõ toytose eya oturuse, Ritonõpo maro oturuketõ tuisary tomo, Moeze omihpyry warõkomo, juteu tõ tamuximãkomo, enara. Ynara tykase toto eya,

28 —Onoky omi poe senohne rĩko mah? Onokyh, “Ikyryko,” nykã oya? tykase toto Jezu a.

29 Mame Jezu a tozuhse toto,

—Ywy roropa oturupõko ase oya xine. Zae jezukuruhtao oya xine senohne kyrypone ekarõko ase oya xine. 30 Kaxitoko kuezuhtoko. Onoky omi poe roropa ahno ẽpurihkane João? Ritonõpo omi poe, ahno omi poe? tykase Jezu eya xine.

31 Mame tõturuse toto oxime rokene,

—“Ritonõpo omi poe ahno ẽpurihkane João,” karyhtao kyya xine, ynara ãko mã Jezu kuezuhtorỹko, “Morara ahtao oty katohme João omiry onenetupuhpyra matou?” ãko mã kyya xine. 32 Yrome, “Ahno rokẽ omi poe ahno ẽpurihkane João,” karyhtao kyya xine imoihmãkõ kyzehno xine exĩko mana, urutõme nymyry João Ritonõpo omi poe ekaroryke eya xine, tykase toto oxime rokene. 33 Morara exiryke Jezu tozuhse toto a,

—Kũ, zuaro pyra reh ynanahse, tykase toto Jezu a.

—Morara ahtao roropa senohne kyrypone onekaropyra ase roropa, tykase Jezu eya xine.