16
Ẽsemãtopõpyry ropa
(Mat 28.1-8; Ruk 24.1-12; Jo 20.1-10)
1 Morotoino oserematoh tõtyhkase ahtao ixtaratu topekahse toto a okepy popatohme, Maria Matarena a, Sarome a, Maria Tiaku eny a. Enara ixtaratu epekatyhpõkõ kynexine. 2 Pakeimo yrokokoro toytose toto okepy enese, xixi tũtara ro ahtao. 3 Toytorykohtao tõturuse toto,
—Otarahxo koh topu syryhmãko sytano? tykase toto, (zumo topu exiryke).
4 Mame toeporehkase tahtao xine topu tysyryhmase tonese eya xine okepy apuru. 5 Mame okepy ẽ aka tomõse toto. Moro tao nuasemã tonese eya xine, typorohse tapotunuru wino, karimutumã ke tupoke.
6 Mame tõserehse toto. Mokyro a turuse nohpo tomo. Ynara tykase ynororo eya xine,
—Oserehpyra ehtoko. Jezu zupĩko matou, Nazarepono, exixihmahpyry? tykase mokyro eya xine. —Nẽsemãno ropa. Nowõno ropa. Taro arypyra mana, esahpyry rokẽ taro mana. Enetoko pahne. 7 Morara exiryke ytotoko. Jezu poetory tõ zurutatoko. Peturu roropa kẽ zurutoko. Jezu ytõko mana osemazuhme Karirea pona. Moroto eporỹko matose inekarotopõpyryae ro, tykase mokyro nohpo tomo a.
8 Morarame tutũtase ropa toto. Okepy esahpyry poe toepase toto. Tõmikehse toto enaromỹke toexirykõke.
Aosenepotopõpyry ropa
(Mat 28.9-10; Jo 20.11-18)
9 Morarame pakeimo nomĩkoae tõsemãse ropa tahtao Jezu kynosenepone ropa Maria Matarena a. Mokyro jorokohpanõpo kynexine. Pake Jezu a joroko tõ tutũtanohpose ropa zae, 7me. 10 Mame toytose ynororo Jezu omihpyry ekarose ipoetory tomo a. Xitãko ro toh kynexine. 11 Mame ynara tykase ynororo eya xine,
—Jezu nẽsemãno ropa! Eneno, tykase ynororo eya xine. Yrome,
—Ajohpe mase, tykase toto eya. Aomiry onenetupuhpyra toh kynexine.
Typoetory tomo a Jezu osenepotopõpyry, 2mãkomo a
(Ruk 24.13-35)
12 Moromeĩpo tõsenepose rahkene Jezu typoetory tomo a, 2mãkomo a, osemae toto ytoryhtao. Yrome onenetupuhpyra toh kynexine aporo. Tyorõme tokarose eya xine.
13 Morarame Jezu tonetupuhse tyya xine ahtao toytose ropa toto Jerusarẽ pona imehnõ zuruse tynenehpyrykõ poko. Yrome,
—Ajohpe matose, tykase toto, morotõkomo eya xine.
11mãkomo a Jezu osenepotopõpyry
(Mat 28.16-20; Ruk 24.36-49; Jo 20.19-23; At 1.6-8)
14 Morotoino typoetory tomo a Jezu tõsenepose rahkene, 11mãkomo a, toto otukuruhtao. Orẽpyra tõturupose,
—Oty katohme axĩ jenetupuhpyra matou? Oty katoh, “Ajohpe rokene,” ãko matou jẽsemãtopõpyry ropa poko? tykase Jezu eya xine.
15 Morarame typoetory tõ taropose eya,
—Ytotoko emero pata tõ punero. Jomiry ekarotatoko emero ahno a. 16 Jenetuputyryhtao eya xine tosẽkõme Ritonõpo poetoryme exĩko mã toto, tõpurihkase ahtao. Yrome jenetuputyry se pyra toto ahtao, Ritonõpo roropa toto se pyra exĩko mana, apotoimo htaka rokẽ toto aropõko mana. 17 Yrome jenetuputyryhtao toto jamihtanohpõko Ritonõpo mana. Joroko tõ tũtanohpõko toto jesety poe. Imehnõ omiry ae oturũko roropa mã toto. 18 Okoi tõ apoiryhtao eya xine toto onesekara mana. Orihmatõ enyryhtao eya xine orihpyra toh mana. Tomary ke kurãkõkara apõko toto aekurãkatohme ropa.
Jezu arotopõpyry kakoxi kapu aka
(Ruk 24.50-53; At 1.9-11)
19 Morarame tõturukehse tahtao Jezu tõnuhse rahkene kapu aka. Mame typorohse ynororo Ritonõpo apotunuru wino. 20 Morarame Jezu poetory tõ toytose Ritonõpo omiry ekarose emero pata tõ poro. Mame typoetory tõ maro toerohse Jezu. Tyjamihtanohse toto eya tõmiry ekarotohme eya xine, kurãkõkara kurãkatohme roropa eya xine. Enara.