NUMERU
Izyraeu tõ Tuhke Ehtoh Kuhtopõpyry
Números
Ekarotopo
Sero Numeru ao Izyraeu tõ tukuhse tuhke toto ehtoh waro ehtohme toesyryhmase toto ahtao Ejitu nonory poe (Numeru 1). Imeĩpo tukuhse ropa toh kynexine 40me jeimamyry taropose ahtao, eporehkasasaka toto ahtao Kanaã pona (Numeru 26). Ekarõko mana Izyraeu tõ ytotopõpyry poko Kate-Panea pona repe, yrome omõsaromepyra toh kynexine Kanaã pona. Tuhke jeimamyry taropose eya xine toytorykõ poko. Mame toeporehkase toto tuna Joatão pũtokoxi, xixi tũtatoh wino. Moroto tõsesarise Izyraeu tõ zokonaka, imehnõ zokonaka tuna Joatão akuotyry se toh kynexine Ritonõpo nekarory pona tosarykõme.
Ekarõko Izyraeu tõ enaromỹke ehtoh poko tupime toehse ahtao toytorykõ poko. Tahxime toeramase toto Ritonõpo wino; Aomiry omipona pyra toehse toto, Moeze ekahmary se pyra toehse. Yrome Ritonõpo nymenekahpyryme Moeze kynexine Izyraeu tõ aroneme. Ekarõko roropa anamonohpyra Ritonõpo ehtopõpyry poko, typoetory tõ pyno toehtopõpyry poko roropa ajoajohpe toto ahtao ro.
Sero pape ao
Ypy Xinai rumekapitory 1.1—9.23
Xinai poe Moape pona 10.1—21.35
Moape po Izyraeu tomo 22.1—32.42
Ejitu poe Moape pona 33.1-49
Joatão akuohtohto 33.50—36.13
1
Ahno tuhke ehtoh kuhtopõpyry apitorymano
Mame jeimamyry asakoro taropose ahtao, Izyraeu tõ esyryhmatopõpyry poe Ejitu poe, nuno asakoro aehtoh po, ẽmepyry apitorymano, Ritonõpo tõturuse Moeze a ona Xinai po, tapyi pitiko Tymaro oturutoh tao. Ynara tykase ynororo:
— Arão maro Izyraeu tõ ikuhtoko, oxiekyrymãkomo, itapyĩ taõkomo, enara. Orutua kõ esety imerotoko 20me jeimamyry nae exiketomo, emero tuãtase exiketomo, soutatume exiketomo. Tamuxime exiketõ imenekako, toiro tuisame exikety toiro oxiekyrymãkõ wino ãkorehmatohkõme. 5-16 Ynara mã toto orutua komo, tyekyrykõ tuisaryme exiketomo, ãkorehmatohkõme:
Rupẽ tõ tuisary Erisua, Seteua mũkuru.
Ximeão tõ tuisary Serumieu, Zurisatai mũkuru.
Juta tõ tuisary Nasõ, Aminatape mũkuru.
Isakaa tõ tuisary Netaneu, Zuaa mũkuru.
Zepurõ tõ tuisary Eriape, Herõ mũkuru.
Eparaĩ tõ tuisary Erisama, Amiute mũkuru.
Manase tõ tuisary Kamarieu, Petasua mũkuru.
Pẽjamĩ tõ tuisary Apitã, Kiteoni mũkuru.
Tã tõ tuisary Aiezea, Amisatai mũkuru.
Asea tõ tuisary Pajieu, Okarã mũkuru.
Kate tõ tuisary Eriasape, Teueu mũkuru.
Napatari tõ tuisary Aira, Enã mũkuru.
Mokaro tymenekase tuisame toto ehtohme tyekyry tõ akorehmaneme toto ehtohme Izyraeu tõ rãnao.
17-18 Naeroro nuno asakoromã po, ẽmepyry apitorymã po Moeze a Arão maro mokaro 12mãkõ maro, ahno imoihmãkõ taoximõnohpose toto, toto kuhtohme, oxiekyrymãkõ oximõme, tapyi taõkõ oximõme, orutua kõ, 20me jeimamyry nae exiketõ esetykõ merotohme. 19 Moro sã tukuhse toh nexiase ona Xinai po, Ritonõpo omi poe Moeze a. 20-43 Orutua kõ 20me jeimamyry nae exiketõ, soutatume exiketõ esetykõ tymerose oximaro tyekyry tõ maro.
Osemazuhme Rupẽ tõ, Jako mũkuru apitorymã tymerose. Atapona toto ehtoh tymerose:
Rupẽ tomo, 46.500.
Ximeão tomo, 59.300.
Kate tomo, 45.650.
Juta tomo, 74.600.
Isakaa tomo, 54.400.
Zepurõ tomo, 57.400.
Eparaĩ tomo, 40.500.
Manase tomo, 32.200.
Pẽjamĩ tomo, 35.400.
Tã tomo, 62.700.
Asea tomo, 41.500.
Napatari tomo, 53.400.
44-46 Orutua kõ 20me jeimamyry nae exiketõ, soutatume exiketõ 603.550me nexiase.
Rewita tomo
47 Yrome rewita tõ esetykõ onymeropyra toh nexiase imehnõ oxiekyry tõ maro. 48 Ynara tykase Ritonõpo exiryke Moeze a:
49 — Orutua kõ tuãtase exiketõ, soutatume exiketõ kukuruhtao oya, rewita tõ onukuhpyra exiko. 50 Yrome rewita tõ tyripoko Ytapyĩ Kurã kurãkananõme, imõkomory maro. Morohne aronanõme toto tyripoko, ipoko toto erohtohme Tapyi zomye toto osesaritohme. 51 Ytotoh toehse ahtao rewita tõ ymaro oturutoh kararahnõko mã toto. Toeporehkase awahtao xine osesaritoh pona Ytapyĩ amõko ropa rewita tõ mana imehnõ oehpyra ehtohme Ytapyĩ Kurã pũtokoxi aorikyrykõino. 52 Imehnõ Izyraeu tõ tehme exĩko mã toto tosarykõ po, kamisã risẽ pãteira pũto tyekyry tõ maro. 53 Yrome rewita tõ osesarĩko mã toto ymaro oturutoh zomye eraseme, imehnõ rewita tõ kara oehpyra ehtohme moro pũtokoxi Izyraeu tõ zehno jexiryino.
54 Moro tyrise Izyraeu tomo a emero Ritonõpo nyripohpyry ae ro Moeze a.