1 Moromeĩpo, tyrohsẽ tymynyhpãse ahtao, ynara tykase Ritonõpo Moeze tomo a, Ereaza maro, oturukety Arão mũkuhpyry:

2 — Izyraeu tõ orutua kõ ikuhtoko emero 20me jeimamyry nae exiketomo, emero tapyi taõkomo, emero tõsetapary waro exiketomo.

3-4 Naeroro Ritonõpo omiry omipona toehse Moeze tomo Ereaza maro, oximõme orutua kõ tonehpose eya xine soutatume exiketomo. Tõximõse toto ona Moape po, tuna Joatão ehpiõ po, pata Jeriko etonie, tuna Joatão moino Jeriko nexiase. Ynara toh nexiase Izyraeu tomo, Ejitu poe aepyhpyamo:

5 Rupẽ tõ oxiekyrymãkomo (Rupẽ osemazuhme aenuruhpyryme nexiase Jako mũkurume): Ipoenõ nexiase Enoke te, Paru te, 6 Ezerõ te, Karami, enara. 7 Mokaro 43.730me orutua kõ nexiase. 8 Paru poe tonuruse Eriape, 9 imũkuru tõ maro: Nemueu te, Tatã te, Apirão (Tatã, Apirão maro tymenekase ahno a tuisame toto ehtohme. Yrome toeramase toto Moeze tõ omipona pyra Arão maro. Osepeme toh nexiase Kora maro, Ritonõpo omipona pyra. 10 Mame nono toẽtakase toto enahkatohme. Toorihse nexiase Kora tõ maro. Mame apoto a 250mãkõ tyahkase nexiase. Moro toehse imehnõ enaroximatohme. 11 Yrome Kora mũkuru tõ orihpyra toh nexiase.)

12 Ximeão ekyry tomo: Nemueu tomo te, Jamĩ tomo te, Jakĩ tomo te, 13 Zera tomo te, Sauu tomo, enara. 14 Mokaro 22.200me orutua kõ nexiase.

15 Kate ekyry tomo: Zepõ tomo te, Haki tomo te, Suni tomo te, 16 Ozini tomo te, Eri tomo te, 17 Arote tomo te, Areri tomo, enara. 18 Mokaro 40.500me orutua kõ nexiase.

19-21 Juta ekyry tomo: Sera tomo te, Pereze tomo te, Zera tomo te, Ezerõ tomo te, Hamuu tomo, enara. (Juta mũkuru tõ asakoro toorihse toh nexiase Kanaã po, Ere te, Onã, enara.) 22 Juta tõ poe 76.500me orutua kõ nexiase.

23 Isakaa ekyry tomo: Tora tomo te, Puwa tomo te, 24 Jasupe tomo te, Xinorõ tomo, enara. 25 Mokaro poe 64.300me orutua kõ nexiase.

26 Zepurõ ekyry tomo: Serete tomo te, Erõ tomo te, Jareeu tomo, enara. 27 Mokaro poe 60.500me orutua kõ nexiase.

28 Manase ekyry tomo, Eparaĩ ekyry tõ maro, Joze mũkurume mokaro toh nexiase.

29 Manase ekyry tomo: Makia, Manase mũkuru, Kireate zumy nexiase. Kireate poe: 30 Iezea tomo te, Hereke tomo te, 31 Axirieu tomo te, Xikẽ tomo te, 32 Semita tomo te, Hepea tomo, enara. 33 Zeropeate, Hepea mũkuru tõxike rokẽ nexiase tumũkue pyra. Zeropeate ẽxiry tõ nexiase: Makara, Noa, Hokara, Miuka, Tiriza, enara. 34 Mokaro poe 52.700me orutua kõ nexiase.

35 Eparaĩ ekyry tomo: Sutera tomo te, Pekea tomo te, Taã tomo te, 36 Erã tomo; Sutera mũkurume Erã nexiase. 37 Mokaro poe 32.500me orutua kõ nexiase. Mokaro Joze pakomotyãme toh nexiase.

38 Pẽjamĩ ekyry tomo: Pera tomo te, Asapeu tomo te, Airão tomo te, 39 Supã tomo te, Hupã tomo te, 40 Arate tomo te, Naamã tomo, enara. Arate, Naamã roropa Pera pakomotyãme nexiase. 41 Mokaro poe 45.600me orutua kõ nexiase.

42 Tã ekyry tomo: Suão tõ nexiase. 43 Mokaro wino 64.400me orutua kõ nexiase.

44 Asea ekyry tomo: Imina tomo te, Ixiwi tomo te, Peria tomo te, 45 Hepea tomo te, Maukieu tomo, enara. Hepea, Maukieu roropa Peria mũkurume toh nexiase. 46 Asea ẽxiry esety Sera nexiase. 47 Mokaro poe 53.400me orutua kõ nexiase.

48 Napatari ekyry tomo: Jazeeu tomo te, Kuni tomo te, 49 Jezea tomo te, Xirẽ tomo, enara. 50 Mokaro poe 45.400me orutua kõ nexiase.

51 Atapona Izyraeu tomo 601.730me orutua kõ nexiase.

52 Ynara tykase Ritonõpo Moeze a:

53 — Nono apiakako Izyraeu tõ esaryme ehtohme. Tuhkehxo Izyraeu tõ ahtao oxiekyryme, nono zumohxo ekaroko eya xine. 54-56 Nono tapiakase ahtao imenekatoh ke nono ekamoko oxiekyry mãkõ nonoryme ehtohme; tuhkehxo oxiekyryme exiketomo a nono zumohxo ekaroko; tuhke hkopyra oxiekyryme exiketomo a nono zumo hkopyra ekaroko.

57 Rewi ekyry tõ ynara kynexine: Jeresõ tomo te, Koate tomo te, Merari tomo te, 58 Ripani tomo te, Eperõ tomo te, Mari tomo te, Muxi tomo te, Kora tomo, enara. Koate toemũkuase Anarãome. 59 Anarão pytyme Jokepete nexiase, Rewi ẽxiry; tonuruse ynororo Ejitu po. Anarão maro Jokepete toemũkuase asakoro: Arão, Moeze maro. Tonuruse toiro ẽxiry roropa, esety Miriã. 60 Arão toemũkuase asakoropane: Natape te, Apiu te, Ereaza te, Itamaa, enara. 61 Yrome Natape, Apiu maro toorihse toh nexiase azahkuru toehse toto ahtao, apoto tyorõ tokarose ahtao eya xine tynekaroryme Ritonõpo a. 62 Rewita tõ tukuhse nexiase 23.000me orutua kõ rokene, toiro nuno motye exiketomo. Imehnõ Izyraeu tõ maro pyra tukuhse toh nexiase nono anapoipyra rewita tõ exiryke tynonorykõme, Izyraeu po.

63 Mokaro oxiekyry tõ emero tukuhse toh nexiase Moeze tomo a, oturukety Ereaza maro, Izyraeu tõ tukuhse ahtao ona Moape po tuna Joatão ehpiõ, pata Jeriko etonie. Tuna Joatão moino Jeriko nexiase. 64 Mokaro maro pake tukuhse aexityã pyra nexiase, Moeze tomo a Arão maro, apitoryme ona tonorẽ Xinai po. 65 Ritonõpo omihpyry ae ro: Orihnõko mã toto emero porehme ona tonorẽ po, katopõpyry ae, toorihse toh nexiase. Karepe, Jepone mũkuru te, Jozue, Num mũkuru maro rokẽ orihpyra toh nexiase.