34
Izyraeu tõ nonory ehpio
1 Mame ynara tykase Ritonõpo Moeze a:
2 — Ynara tyripoko Izyraeu tomo a: Oeporehkarykohtao Kanaã pona, nono ynekarory oya xine, ynara sã ehpiõme exĩko mana:
3 — Ehpio ikurenae exĩko ona tonorẽ Zim poe Etõ nonory ehpikuroko. Ehpio xixi tũtatoh wino exĩko tuna konõto Aorikyhpyry potyry ikurenae poe. 4 Moro poe ytõko ikurenaka onuhtoh Akarapĩ pokoxi, Zim rãnakuroko Kate-Panea pona. Morotoino ytõko Hazaa-Ataa poro Azamõ pona. 5 Morotoino Azamõ poe ytõko iporiry ehpikoxi, Ejitu ehpiome exikety tuna konõto Metiteraneu pona.
6 — Moro tuna konõto Metiteraneu ononorykõ ehpiõme exĩko xixi omõtoh wino.
7 — Ononorykõ ehpio inikahpozakoxi exĩko tuna konõto Metiteraneu poe ypy Hoa pona. 8 Morotoino ytõko onuhtoh Hamate pona, moromeĩpo Zetate pona. 9 Zetate poe ononorykõ ehpio inikahpozakoxi ytõko Zipirõ pona, mame Hazaa-Enã pona, etyhpyryme.
10 — Ononorykõ ehpio xixi tũtatoh wino exĩko Hazaa-Enã poe Sepã pona. 11 Mame Sepã poe ytõko Ripira pona, Aim poe xixi tũtatoh wino. Morotoino ononorykõ ehpio yhtõko ikuhpo Karirea ehpikuroko xixi tũtatoh wino. 12 Tuna Joatão rãnakuroko ytõko ikurenaka tuna konõto Aorikyhpyry ehpikoxi.
— Morohne ononorykõ ehpiõ asakoropane.
13 Mame ynara tyripose Moeze a Izyraeu tomo a:
— Sero nono apiakãko matose imenekatoh ke ononorykõme. Sero nono Ritonõpo Kuesẽkõ nekarohpyryme mana ekamotohme 9½me oxiekyryme exiketomo a. 14-15 Ynara exiryke: nono tapoise tosarykõme tuna Joatão poe xixi tũtatoh wino, pata Jeriko etonie 2½me oxiekyryme exiketomo a, Kate tomo te, Rupẽ tomo te, zokonaka Manase tomo a, enara. Tuna Joatão moino Jeriko nexiase.
Ritonõpo nymenekatyã nono apiakananõme
16 Ynara tykase Ritonõpo Moeze a:
17 — Oturukety Ereaza, Jozue maro, Num mũkuru, nono ekamõko mã toto ahno esaryme. 18 Imehnõ tamuximãkõ imenekatoko roropa, toiro orutua toiro oxiekyrymãkõ wino ãkorehmatohme nono apiakary poko.
19-28 Ynara ikohmatoko ãkorehmatohkõme:
Juta tõ tuisary Karepe, Jepone mũkuru.
Ximeão tõ tuisary Samueu, Amiute mũkuru.
Pẽjamĩ tõ tuisary Eritate, Kixirõ mũkuru.
Tã tõ tuisary Puki, Jokiri mũkuru.
Joze (Manase) tõ tuisary Hanieu, Epote mũkuru.
Eparaĩ tõ tuisary Kemueu, Xipitã mũkuru.
Zepurõ tõ tuisary Erisapã, Paranake mũkuru.
Isakaa tõ tuisary Pautieu, Azã mũkuru.
Asea tõ tuisary Aiute, Seromi mũkuru.
Napatari tõ tuisary Petaeu, Amiute mũkuru.
29 Mokaro tymenekase Ritonõpo a nono apiakatohme Kanaã po ekamotohme Izyraeu tomo a tosarykõme.