João Nymerohpyry sero Jezu Nenepotyã poko
Sero pape tymerose João a. Jezu nymenekahpyryme kynexine ynororo typoetory tõ amorepaneme. Tãhpõme toehse tahtao tynymerohpyry sero taropose eya Jezu enetupuhnanõ neneryme 7me pata tõ po.
Ritonõpo osenetupuhtoh turumekapitose eya xine. Naeroro toto zurũko mana tyyrypyrykõ poko pyra toto ehtohme.
Etuarimãko toh kynexine pitiko rokẽ pyra. Naeroro toto akorehmary se kynexine tãkye toto ehtohme. Sero nono enatyry poko toto tamorepase eya, Ritonõpo nyripory poko kehko. “Sero nono enahkapõko Ritonõpo mana imepỹ nono ritohme ropa imyakãme. Tyorõ rĩko mana, kurano, jũme ehtohme,” ãko mana.
1
1 Moro João nymerohpyry, Jezu Kyrixtu nenepotyã poko. Ritonõpo nekarotyã morohne typoetory tõ amorepatohme, imeĩpo ehtoh poko, zuaro toto ehtohme. Mame Kyrixtu a morohne poko typoetory tõ João a, tutuarõtanohpose tynenyokyhpyry a. 2 Mame João a tynenehpyry tokarose emero porehme. Morohne tymerose sero poko, Ritonõpo nekarohpyry, Jezu Kyrixtu namorepatopõpyry, enara. 3 Tãkye exĩko matose sero pape sekeremaneme awahtao xine. Tãkye roropa exĩko matose sẽ omi etaneme awahtao xine, otato roropa awahtao xine. Ritonõpo poe sero tymerose. Okynahkopyra serohne exĩko mana emero. Ekurehpyra mana.
“Kure pãna matou?” katopõpyry Jezu poetory tomo a
4 Ynymerohpyry moro onenerykõme, Jezu poetory tõme matose, 7me patapõkõme matose Azia rãnao. Ywy ase João.
Oturũko ase Ritonõpo a opoko xine. Ritonõpome exikehpyra mana. Moinoro mana. Jũmãme roropa mana. Ynara ãko ase eya opoko xine, “Kure rokẽ opoetory tõ tyriko Papa. Torẽtyke pyra tyriko toto,” ãko ase eya. Ritonõpo zuzenu a kure oriporykõ se ase roropa, Ritonõpo apõ ẽpataka exikety a, torẽtyke pyra oehtohkõme. 5 Jezu Kyrixtu a roropa kure oriporykõ se ase. Kutuarõtanohnekõme mana, zae aomiry exiryke. Aẽsemamyhpyry ropa ynororo osemazuhme toorihxĩpo. Imeĩpo kuẽsemãkapotorỹko ropa mana tõsemãtopõpyry ropa saaro. Tuisa tõ esẽme mã ynororo.
Kypyno xine roropa mana. Toorikyryke tymyhpokase ropa sã sytatose eya, kyyrypyrykõ poko pyra kuehtohkõme, 6 Ritonõpo maro oturuketõme kuehtohkõme Jũ maro oturuketõme, ipoetoryme roropa kuehtohkõme. “Kure Jezu Kyrixtu mana tuisamehxo. Jamihmehxo roropa mana jũme,” sykatone ipoko, enara.
7 Enetoko ke! Oehnõko ropa mana akuruhtoko. Emero mã mokyro enẽko, tuohpõkõ roropa. Mame sero nonopõkõ emero epanaikãko mã toto. Xitãko mã toto mokyro eneryke tyya xine. Morara ahtao ro, osehko ropa Jezu, enara.
8 “Ywy ase Ame, Zme roropa. Apitorymãme, etyhpyrymãme, enara,” ãko Kuesẽkõ Ritonõpo mana. Emero tyriry waro exiketyme ynororo. “Ywy ase seromaroro. Pake exiase. Jũme exikehpyra ase roropa,” ãko mana.
Kyrixtu enetopõpyry
9 Ywy ase João, oruikomo. Jezu maro etuarimãko ase. Oetuarimarykõ sã ase etuarimãko roropa. Ipoetoryme sytatose, eanahtõko roropa sytatose. Ahmõta pona tonehse ywy ahno a Patimo pona, Ritonõpo omiry ekaroryke ya imehnõ netaryme. Zae ehtoh Jezu namorepahpyry roropa ekaroryke ya tonehse ywy xiaro, ãpuruhpyry taka samo. 10 Mame nomĩkoae Ritonõpo poko exiase. Mame Zuzenu tooehse ya. Tuaro pyra jahtao omi totase ya, ỹkae opore exikety, rue etone samo. 11 Ynara nase,
—Pape imeroko onenery tõ poko. Mame onymerohpyry aropoko ypoetory tomo a oximõmãkomo a 7me pata tõ poro, toto neneryme, Epezu pona, Eximina pona, Perekamu pona, Tiatira pona, Sarati pona, Pirateupia pona, Raotisea pona, enara.
12 Mame ỹkakoxi toeramase jahtao juruhpõ enese nãparina to rokẽ enease, setime. Apõpo nexiase kehko. 13 Moro rãnao orutua nexiase tupoke. Xikihme nexiase. Zupõ mosa nexiase. Ipupuru pona toehse. Ipuropuru zomye zamareary panõ nexiase, uuru risemy. 14 Zũsety karimutume nexiase, mauru samo, akurũ sã roropa karimutume. Enuru zemĩme sã nexiase apoto samo. 15 Ipupuru zemĩme sã roropa nexiase metau iahkahpyry samo. Metau ikorokahpyry sã seneneme nexiase. Aomiry sõkane konõto sã nexiase. 16 Mame emahpo xirikuato nexiase setime, apotunuru wino. Ĩtao ratoimo nexiase, osetato taere exikety. Ẽmyty xixi sã nexiase saereme, tãxiahtao exikety samo.
17 Mokyro tonese ya ahtao, nono pona epukase imyhtokoxi, ahno ekepyry samo. Mame tapose ywy eya tomary ke apotunuru wino. Ynara nase ya,
—Oserehpyra exiko. Ywy ase Osemazuhme aexihpyry, Etyhpyryme aexihpyry, enara. 18 Orihpỹme exiketyme ase. Jorikyase repe. Yrome eneko ke, orihpỹme ase jũme. Orihtoh esẽme ase, aorihtyã esẽme roropa. 19 Naeroro pape imeroko onenery tõ poko, seromaroro ehtoh poko te, imeĩpo ehtoh poko, enara. 20 Zuaro pyra mase repe. Otuarõtanohpõko ase sẽ xirikuato poko jemahpo setimãkomo, mõ nãparina apõ poko roropa uuru risemy, setimãkomo. Toto ewomananõme mã toto. Nãparina apo moro setimãkõ ypoetory tõ enetupuhtoh moro.