15
Etuarimatoh konõto otyhkatoh poko
1 Morarame imepỹ osenuruhkatoh konõto enease kapu ao, Ritonõpo nenyohtyã 7mãkõ enease 7me tyrohsemyimo maro, etuarimatoh konõto maro. Imehnõ wãnohtoh moro etyhpyrymano. Iirypyrymãkõ zehno Ritonõpo ehtoh etyhpyry moro.
2 Mame osenuhmase ropa. Tuna konõto panõ enease kutei samo, otoxie kutei ahtao kamirarame apoto maro. Onokyroimo poremãkaponanõ enease roropa. Onokyroimo nyrihpyry poremãkaponanomo, 666 ke tosehke exikety poremãkaponanõme roropa toh nexiase. Xikihme toh nexiase tuna konõto panõ ehpio. Osekuroko toare exikety toto emahpo nexiase Ritonõpo nekarotyã eya xine. Etõko toh nexiase. 3 Eremiãko roropa toh nexiase Moeze nymerohpyry ae Ritonõpo poetory nymerohpyry ae. Kaneru mũkuru poko eremiãko roropa toh nexiase. Ynara nase toto,
“Papa kapuaono, Ritonõpo imehxo mase.
Onyrityã kure kuhse mana.
Orẽpyra mase.
Pata tamuru esẽ mase. Zae mase.
Ajohpe pyra mase onyrityã poko.
4 Onoky ouno pyra exikety nae nah?
Arypyra, ouno emero mã toto,
yna esẽme oexiryke.
Imehxo oehtoh poko ekãtõko mã toto emero porehme.
Omoro rokẽ kurãme nymyry mase.
Pata tamurupõkõ emero oehnõko mã toto,
‘Kure mase,’ katohme oya.
Kure rokẽ orĩko mã toto.
Tosekumuru po porohnõko mã toto oẽpataka,
kure oexiry eneryke tyya xine, emero patapõkõ punero,”
tykase toto toremiarykõme.
5 Moromeĩpo tyorõ enease ropa kapu ao. Ritonõpo maro oturutoh enease, tapyi. Moro tao kamisa risẽ nexiase, Ritonõpo apõ esaryme. Totapuruhmakase nexiase. 6 Mame Ritonõpo maro oturutoh tae tutũtase inenyohtyã 7mãkomo. Imaro xine tyrohsemyimo etuarimatoh konõto etyhpyrymã nexiase. Upo karimutumã ke tõtupohtose toh nexiase, rino risẽ ke, ikurikahpyry panõ ke. Aozahparakõme uuru risẽ nexiase tymyhse. 7 Mame isene exikety toiro nexiase Ritonõpo ẽpataka, asakoropane exikety. Eya kasanamã tokarose Ritonõpo nenyohtyamo a 7mãkomo a. Uuru risẽ tokarose eya xine, 7me. Pehme kasanamã nexiase, iirypyrymãkõ zehno Ritonõpo ehtoh ke. Orihpỹme exiketyme Ritonõpo mana jũme. 8 Mame orexĩto ke typehkase Ritonõpo maro oturutoh nexiase, Ritonõpo imehxo ehtoh poe, ijamitunuru poe, enara. Moro taka omõsaromepyra imehnõ toehse etuarimatoh konõto etyhpyry exitãne, Ritonõpo nenyohtyã 7mãkõ nenehtyã otyhkatãne.