18
Papironia pata enatyry poko
1 Morarame imepỹ Ritonõpo nenyokyhpyry yhtory enease, kapu ae. Tuisamehxo nexiase. Kure aexiry ezurume sã konõto nexiase roropa. Ipoe saereme toehse sero nono emero porehme. 2 Opore ynara tykase ynororo,
—Papironiapõkõ tonahse. Ipatarykõ patãpome toehse. Seromaroro joroko tõ esaryme toehse mana, akuaryhpo tõ esaryme rokene, iirypyryme exiketõ esaryme, torõ tõ xihpyry esaryme, enara. 3 Ynara exiryke, Papironiapõkõ nohpo sã mana, imeimehnõ poko exikety samo. Eukuru ekamory sã tõsekarose ynororo imehnõ maro ehtohme. Sero nonopõkõ tuisary tõ ipoko toehse. Seropõkõ mõkomo poko erohketõ tytineruke toehse tymõkomoke roropa Papironiapõkõ pokoino, nohpo poko exiketõ sã typenetatohkõ poko toehse toexirykõke.
4 Morarame imepỹ omiry etase kaino kapu ae. Ynara nase,
—Sero pata irumekatoko ypoetory tomo.
Irumekatoko ipunaka.
Mokaro anakorehmara ehtoko iirypyry tõ poko,
awãnohpyra xine Ritonõpo ehtohme.
5 Kaetoko sã iirypyrykõ mana, ypy sã konõto.
Naeroro inyrihpyrykõ xihpyry poko wenikehpyra mã Ritonõpo.
6 Orihtopõpyrykõ sã eya xine,
morararo mokaro tyritoko emetakãme.
Epehmatoko toto iirypyhpyrykõ epehpyryme,
imotye roropa epehmatoko toto.
Ikasanarykõ ipehkatoko jetunety ke.
Inekarohpyrykõ oya xine jetunety,
moro motye ekarotoko ropa eya xine.
7 Ituarimapotoko toto, samũ kamexipotoko eya xine.
Imynyhmapotoko toto, tuisame imehxo tõsekarose toto exiryke.
Emero kurã tapoise eya xine tykyryrykõme.
Nohpo sã mã toto, ynara kane samo,
“Taro ywy tarõkõ esemy.
Pytỹpo sã pyra ase.
Emynyhmara jũme ase, samũ kara ase roropa,” kane sã mã toto.
8 Morara exiryke toto wãnohtoh exĩko mana toiro ẽmepyryae.
Tyrohsẽ exĩko mana, etuarimatopo.
Emitapãnõko roropa mã toto.
Esarykõ roropa zahnõko mana,
toto wãnohnõko mana, orẽpyra Ritonõpo exiryke,
nase ya mokyro.
9 Morarame seropõkõ tuisary tõ ipoko xine aehtyã xitãko mana. Imaro xine tãkye aexityã pata zatyry eneryke tyya xine xitãko mã toto. Apoto erexĩtory eneryke tyya xine xitãko mã toto. 10 Amekeino rokẽ enẽko mã toto, mokaro etuarimatoh zuno toexirykõke.
—Myhene! Myhene! ãko mã toto. —Pata imehxo nexiase repe. Orẽpyra Papironiapõkõ nexiase repe. Yrome axĩ tonahse myhene, ãko mã toto.
11 Mõkomo ekamonanõ roropa sero nonopõkõ xitãko mana. Mokaro hnamõko mã toto, tymõkomorykõ epekahnanõ pyra toehse exiryke. 12 Morohne onepekahpyra mã toto, uuru, parata, topu kurã komo, kasuruimo te, kamisa karimutumano te, kamisa kurã ezuezumano, kamisa typyne exikety te, kamisa tahpirẽ roropa, wewe kurano te, erewãti zerỹpyry risemy, wewe kurã risemy, metau risemy, kurimene risemy, topuimo risemy, (mamore risemy). 13 Kanera tõkehko onepekahpyra mã toto, tonahsẽ emepory tõkehko, typoxine zahkety azawaimo, ixtaratu panono, ixtaratu, eukuru, oriu, pou risemy te, tsprt tiriiku puhturu roropa, pui tõkehko, kaneru tomo, kawaru tomo, kahho tõkehko, namoto tõ roropa. Morohne nae toh nexiase tokamosẽme repe. Yrome epekahnanõ pyra toehse. 14 Ynara ãko mõkomo ekamonanõ eya xine repe,
—Openetatopõpyrykõ tonahse, omõkomorykomo, otinerũkomo, orẽpyra oehtopõpyrykõ roropa, emero tonahse mã jũme. Morohne onenepyra ropa mase jũme, ãko mã toto.
15 Mõkomo ekamonanõ tytineruke toehse tymõkomory ekamory poko moro pata po. Moino osenuhmãko mã toto, mokaro etuarimatoh kurũke, imaro xine toetuarimary se pyra toexirykõke. Xitãko mã toto, mokaro hnamõko.
16 —Myhene! Pata imehxo nexiase, myhene! Tupoke kurã ke moropõkõ nexiase ezuezumã ke, tahpirẽ ke roropa. Uuru risã ke roropa tynamuruke nexiase toto topu kurã ke roropa typyne exiketõ ke, kasuruimo ke roropa. 17 Axĩ tymõkomoke pyra toh toehse. Tonahse emero porehme.
Wapu esẽ tõ mã, imaro xine ytoketõ roropa te, wapu poko erohketõ roropa imehnõ erohketõ roropa tuna konõto po amekeino tõsenuhmase toto. 18 Pata zatyry eneryke tyya xine, orexĩto eneryke roropa tyya xine, yronymyryme tyxitase toto. Ynara tykase toto,
—Pata kurã nexiase. Ipanõ pyra mana, tykase toto.
19 Nono tomase eya xine tuhpokoxi xine, tyxitarykõke, pata hnamoryke tyya xine.
—Myhene! Pata imehxo nexiase repe! Moro pata po wapu konõto tõ, emero tuna konõto poro ytoketõ tytineruke toehse, tymõkomoke toehse roropa, moro patapõkõ tymõkomoke itamurume exiryke. Yrome axĩ tonahse emero porehme.
20 Atãkyematoko kapuaõkomo, mokaro enatyry poko. Atãkyematoko Ritonõpo poetory tomo, inymenekatyã roropa imehnõ amorepananõme. Ritonõpo poe urutõkõ roropa atãkyematoko. Mokaro tuãnohse eya oryhmatamitukõme.
21 Mame Ritonõpo nenyokyhpyry a topu konõto tanỹse, jamihme exikety a. Moro topu zumo exiry saipe konõto sã kynexine. Mame tuna konõto kuaka moro topu tomase eya. Ynara nase,
—Topu tomase ahtao nakuaka axĩ nerỹko mana. Moro saaro axĩ Papironiapõkõ enahnõko mana typatarykõ maro. Jũme osenepyra ropa exĩko mã toto. 22 Rue tõkehko onetara exĩko moroto mã toto. Eremiaketõ roropa onetara mã toto. Erohketõ pyra exĩko roropa mana. Tiriiku apotoh osetara exĩko roropa mã moroto jũme. 23 Nãparina saerehkara exĩko mana. Niotaketõ omiry pytaketõ omiry roropa osetara moroto exĩko mana. Mõkomo ekamonanõ imehnõ motye orẽpyra toh nexiase repe. Pyaxime toehtohkõke imehnõ tonekunohse eya xine, emero patatõpõkomo, nase.
24 Papironiapõkõ tuãnohse kynexine urutõkõ totapase eya xine exiryke, Ritonõpo poetory totapase roropa eya xine, imehnõ totapase roropa sero nonopõkõ eya xine, enara.