ZAKARIA
Zacarias
Ekarotopo
Sero Zakaria papeny atapiakãko asakoro ehtohme:
1. Zakaria 1-8 ekarõko urutõ Zakaria omihpyry Izyraeu tomo a, aehtyã ropa namotome ehxĩpo Papironia poe Jerusarẽ pona. Urutõ Ajeu epeme Zakaria kynexine. Aomihpyry Izyraeu tomo a Ritonõpo nenepohpyry tõ poko ekarõko kynexine. Sero tokarose eya jeimamyry 520mã poe 518mã pona oehpyra ro Jezu Kyrixtu ahtao. Moro Ritonõpo nenepohpyry tomo tamorepase pata Jerusarẽ riry ropa poko te, Ritonõpo Tapyĩ riry poko te, ahno rypyry korokary poko te, imeĩpo ehtoh poko roropa ahno Pynanohne oepyryhtao.
2. Zakaria 9-14 ekarõko ahno Pynanohne poko, Apiakary konõto poko roropa Etyhpyryme. Zakaria 9.9 poko ekarõko nase Mateu 21.5 po, João 12.15 po, enara.
Sero pape ao
Kure ehtoh eraximatohme 1.1—8.23
Imehnõ nonory põkõ wãnohtopo 9.1-8
Imeĩpo kure ehtopo poko 9.9—14.21
1
Tyyrypyrykõ rumekatoh sero
Nuno 8mã po jeimamyry asakorõ po tuisame Tariu ahtao Perexia esẽme, tõturuse Ritonõpo urutõ Zakaria a, Parakia mũkuru, Ito pary. Ynara tykase Ritonõpo Jamihmehxo Exikety eya, ahno zurutohme:
— Ywy Ritonõpo tohne toehse yronymyryme atamurukõ poko. Mame seromaroro ynara ãko ase oya xine: Osehtoko ropa ya; ywy Ritonõpo, Jamihmehxo Exikety, oehnõko roropa ase oya xine. Atamurukõ sã pyra ehtoko. Otato pyra toh nexiase turuse toto ahtao urutõ komo a pake, sero jomihpyry tokarose ahtao eya xine: “Ritonõpo Jamihmehxo Exikety ynara tyripõko mana oya xine: popyra ehtoh poko pyra ehtoko. Zae pyra oehtohkõ irumekatoko.” Yrome jomihpyry omipona pyra toh nexiase. Seromaroro otoko hnae atamurukomo? Mokaro urutõ kõ roropa isene ro toh nae? Ypoetory tõ ae, urutõ kõ ae jomihpyry aropoase atamurukomo a, toto enaroximatohme repe. Yrome oty kara toh nexiase. Morara exiryke tuãnohse toh nexiase. Mame toeramase ropa toh nexiase tyyrypyrykõ wino. Ynara tykase toto: “Ritonõpo Jamihmehxo Exikety a tuãnohse sexiatose tõmihpyry ae ro. Iirypyryme toehse kuexirykõke tuãnohse sexiatose kyyrypyrykõ emetakame.”
Enepotoh apitorymano: kawaru tomo
Ẽmepyry 24me ehtoh po, nuno 11mã po, esety sepate, jeimamyry asakoromã po tuisame Tariu ahtao Ritonõpo omiry etase. Ywy ase urutono Zakaria, Parakia mũkuru, Ito pary. Koko nexiase enepotoh tonepose ahtao ya: Ritonõpo nenyokyhpyry enease tõtyrise kawaru kamiraramã po. Totypohse nexiase jakanahmã po wewe tõ rãnao. Mokyro mykae imehnõ nenyohtyã nexiase kawaru tõ po, kamiraramãkomo, imehnõ pitahpitahmãkomo, imehnõ karimutume exiketomo. Inenyokyhpyry toiro tõturuse ymaro. Naeroro ekaropoase eya:
— Pãna, onokah koh moxiã inenyohtyamo kawaru tõ po?
— Enepõko ase oya, tykase ynororo.
10 Mame mokyro Ritonõpo nenyokyhpyry wewe rãnao ynara tykase:
— Mokaro tynenyohtyã taropose Ritonõpo a toytotohme sero nono poro porehme.
11 Mame ynara tykase toto Ritonõpo nenyokyhpyry a, wewe rãnao exikety a:
— Toytose yna sero nono poro porehme. Tonese emero mynyhme samo osetapara mã toto.
12 Mame ynara tykase Ritonõpo nenyokyhpyry:
— Ritonõpo Jamihmehxo Exikety, 70me jeimamyry taropose Jerusarẽ põkõ poko tohne toehtoh poko, Juta patary tõ põkõ maro. Otãto ise ro mokaro pyno oehtohme ropa?
13 Mokyro tozuhse Ritonõpo a omi kurã ke, kypyno xine ehtoh ke, omi emuhkehkatoh ke. 14 Mame mokyro Ritonõpo nenyokyhpyry, ymaro oturukety ynara tykase ya:
— Ynara kaxiko opore emero rokẽ netaryme: Sero omi Ritonõpo Jamihmehxo Exikety omiryme mana: “Pata Jerusarẽ pyno ase yronymyryme, ypatary kurãme mana. 15 Imeimehnõ nonory põkõ poko tohne ase, osewomaketõ poko, torẽtyke pyra exiketõ poko. Ynara exiryke tohne toehse jahtao ypoetory tõ poko, pitiko rokẽ repe itamurumehxo toto tyrohmanohpose eya xine, toto etuarimatohme pitiko rokẽ pyra. 16 Naeroro toto pyno jexiryke oepyase ropa Jerusarẽ pona. Ywy, Ritonõpo Jamihmehxo Exikety ynara ãko ase: Ytapyiny tyrisẽme exĩko ropa mana, pata Jerusarẽ roropa tyrisẽme exĩko ropa mana.”
17 Ynara tykase roropa inenyokyhpyry ya:
— Oturuko imehnõ netaryme, Ritonõpo Jamihmehxo Exikety ynara tykase: ypatary tõ tymõkomoke exĩko ropa mã kehko, pitiko rokẽ pyra. Pata Jerusarẽ akorehmãko roropa mana tynymenekahpyryme aehtohme ropa.
Enepotoh asakoromano: iretyry tõ poko
18 Imepỹ enepotoh toehse ya: 4me pui retyry enease. 19 Ritonõpo nenyokyhpyry ymaro oturukety a ekaropoase. Ynara ase eya:
— Oty katohme moro iretyry tomo?
Jezukuase ynororo, ynara nase:
— Mokaro mã imehnõ nonory põkomo. Eya xine Juta tõ sapararahme taropose sero nono poro porehme, Izyraeu tõ maro Jerusarẽ põkõ maro.
20 Mame 4me erohketõ tonepose Ritonõpo a ya kurimene poko erohketomo.
21 — Oty rĩko mokaro nae? ase eya, ekaropoase.
Ynara nase ynororo:
— Moro iretyry tõ imehnõ nonory põkõme mã kehko. Juta tõ sapararahme taropose eya xine nono poro, imehnõ poetoryme sã rokẽ toto ehtohme. Yrome seromaroro moxiã erohketõ oehnõko mã toto mokaro ahno tõ erehtohme, iretyrykõ tahkatohme, toto pahtohme roropa, mokaro Juta tõ poremãkaponanomo, Juta tõ ahpahponanomo.