9
Imehnõ ahno tõ apiakãko Ritonõpo mana
1 Ritonõpo Kuesẽkõ omiry ynara mana: Hatarake nonory põkõ, pata Tamaxiku põkõ roropa tuãnohsẽme exĩko mã toto. Izyraeu tõ rokẽ kara, Xiria patary imehxo exikety Ritonõpo kyryryme mana. 2 Pata Hamate roropa, Hatarake ehpio po, Ritonõpo kyryryme mana, pata tõ roropa Tiro te, Xitõ roropa epõkõ emese kure exiketõ maro Ritonõpo kyryryme mã toto. 3 Tapyi tõ jamihme exiketõ tyrise Tiro põkomo a osewomatohme, parata itamurume tapoise eya xine uuru maro itamurume nonome ehtoh samo. 4 Yrome morohne emero arõko Ritonõpo mana; Tiro põkõ mõkomory kurã emãko mana tuna konõto kuaka, moro pata roropa tyahkasẽme exĩko mana apoto ke. 5 Moro eneryhtao Axikerõ põkõ oserehnõko mã toto. Kaza põkõ roropa etuarimãko mã toto yronymyryme, Ekorõ põkõ roropa orẽnõko mã toto. Kaza tuisary orihnõko mana, Axikerõ patãpome exĩko, tytaõke pyra. 6 Imeimehnõ nonory põkõ osesarĩko mã toto Axitote po.
Ynara ãko Ritonõpo mana:
— Pirixteu tõ epyrypakehnanohpõko ase. 7 Tõsemy munu maro onõpyra toto ripõko ase, imepỹ onenahpopỹ aexihpyry roropa onenahpyra toto ripõko ase. Mame mokaro akoĩpyry ypoetoryme exĩko mã toto, Juta tõ maro exĩko mã toto. Ekorõ põkõ roropa ypoetory tõ maro exĩko mã toto, jepuseu tõ ehtopõpyry samo. 8 Ypoetory tõ ewomãko ase epetõkara winoino. Epetõkara soutatu tõ onẽmapopyra exĩko ase ynonory pona. Jũme ypoetory tõ onyrohmanohpopyra ropa tuisa popyra exikety exĩko mana. Ypoetory tõ etuarimatopõpyry tonese ya exiryke.
Imeĩpo Izyraeu tõ tuisary
9 Atãkyematoko, Xião põkomo!
Jerusarẽ põkomo, oeremiatoko ãtãkyemarykõme!
Otuisarykõ oehnõko mana.
Orẽpyra Exiketyme oehnõko mana,
Imehxo Exiketyme roropa,
yrome epyrypara mana, jumẽtu po tõtyrise mana,
jumẽtu zumõkara, imũkurumano.
10 Kahu tõ etonaketõ kyryry enahkapõko mana Izyraeu nonory po,
soutatu tõ kawaru tõ po ytoketõ roropa Jerusarẽ po.
Taky tõ, pyrou tõ roropa tonahkasẽme exĩko mã kehko.
Etonara ahno tõ tyripõko mana.
Tuisame exĩko mana tuna konõto poe imepỹ tuna konõto pona,
tuna Eupyrati poe roropa nono etyhpyry tõ pona.
Imeĩpo Izyraeu imehxo exĩko mana
11 Ritonõpo ynara ãko mana:
“Jerusarẽ põkomo, jomihpyry etapoase oya xine,
opynanopyrykõ topehmase munu ke.
Morara exiryke oekyry tõ anỹnõko ase toto apoihpõkõ winoino,
tanỹsẽme exĩko mã toto eutary winoino,
namotome oehtopõpyrykõ poe.
12 Osehtoko ropa, namoto tomo,
oewomatohkõ jamihmã pona;
osehtoko ropa opynanohtohkõ eraximananomo.
Ynara ãko ase oya xine,
itamurumehxo kurã ke oepehmatorỹko ase,
asakoro oetuarimatopõpyrykõ emetakame.
13 Juta tõ rĩko ase taky samo etonatoh kyryryme,
Izyraeu tõ pyrou sã exĩko mã toto.
Orutua kõ, Jerusarẽ põkõ ytapemãme exĩko mã toto,
mokaro maro osetapãko ase Kerexia põkõ maro.”
14 Mame osenepõko Kuesẽkõ mana typoetory tõ epoe.
Nenenehkane sã typyre ekomãko mana.
Rue etõko mana.
Ytõko mana tyryrykane konõto maro ikurenae.
15 Ritonõpo Jamihmehxo Exikety typoetory tõ ewomãko mana;
topetõkara soutatu tõ poremãkãko mã toto,
ipyrekõ kararahnõko mã toto,
topetõkara munuru kuãnõko mã toto eukuru jehnahpyry samo,
kohtãko mã toto toetỹse exiketõ samo,
pehme sã exĩko kasana sã munu ke ikuamyryhtao tynekaroryme apoto apõ pona.
16 Moro ẽmepyry toehse ahtao typoetory tõ pynanohnõko Ritonõpo mana
toky tõ pynanopyry sã ipynanohne a.
Moro nono po topu tõ kurã zemime exiketõ sã exĩko mã toto parimã poko,
uuru risẽ parimã poko tuisa konõto zupuhpyry po.
17 Kure kuhse sero nono exĩko ropa mana,
enekure roropa!
Tiriiku nae exĩko, uwa eukuru roropa itamurume.
Poetohti tõ wãtãko roropa mã toto jamihme, enekure roropa.