Matɨyu
Olo Hungkuno Wopɨngo loso Matɨyu Mtɨꞌmokumentisofoho.
Olo Hungkuno Sɨmoꞌmjofoho.
Jisas ahwomomneꞌno nto sɨmentiso sohonta soswo teti (30) nto uyakoloꞌmentisopolɨkeno olo iyoswo loso Jisasɨye inomokomoyo aho hufaꞌu hopiꞌnono sɨfe mtaꞌni hufaꞌuyo sohwa mtaꞌango kakoe yofe Matɨyu mtɨꞌmokumentisofoho. Oso Matɨyu huhwo sohwo yofe hufaꞌunjo hweho. Nomꞌne yofeso ole, Lifaiyoho. Matɨyu huhwo sohwo sɨmoꞌmo kako ango Koponeyam sopo aꞌamu mtaꞌni hamniyoho mayo syoho imojo hweho. Oso ango hopo sopo Jisas iꞌmofawento Matɨyumo ulɨmento, Kɨko ngkimo tɨfi nnɨngkape. Jisas ose ulahonɨngki Matɨyu aꞌamu mtaꞌni hamniyoho mayo syohoso nohoꞌnasyonto Jisasɨmo inɨngkamentisofoho. Tɨfi Matɨyu Jisasɨye inomokomoyo imoꞌnɨmentisofoho. (Oso hungkuno hiso Matɨyu sohe engo 9 honɨngkano weꞌe 9. Osopo weho.)
Mak sohwoe iyoswoso sɨmoꞌmo mtɨꞌmokumentisofoho. Tɨfi Matɨyuꞌnji Lukɨꞌnji mtɨꞌmokumentisiyefoho. Osoꞌno Makɨye hungkuno piꞌnɨngo fehohnjoso Matɨyuye hungkunomo weho. Sɨmoꞌmo aꞌamu toho wojo lɨmotofo sohwa ole lɨmentohofi Mesaiya ifaweneponoho. Ose lɨmentohofo soꞌno aꞌamu Jutaso nohontohumentanɨngkofi olo iyoswo loso Matɨyu Jisas sohwo olo Mesaiya oloho hweho. Kako nto ifawoꞌmaho. Ose ulɨmonto mtɨꞌmokumentisofoho.
Olo iyoswo hiloso Matɨyu kako aꞌamu Juta Jisasɨmo inɨngkamentohofo somo ufoꞌmayoꞌne mtɨꞌmokumentisofoho. Olo iyoswo mtɨꞌmokiyoso Ngkɨlik hungkunomo mtɨꞌmokumentisofoho. Osoꞌno olo iyoswo Matɨyu mtɨꞌmokumentiso hiloso nakumo huno nafohotofoꞌnefoho. Oso huno nafohotofo hwapɨngo neso olenoho. Nakwo atofo lɨhwasi huno syafɨsyiyoso Matɨyu kako olo iyoswo loso tɨhwamneꞌno mtɨꞌmokumentisoto. Osoꞌno Matɨyu kako aꞌamu Jutaso atofo lɨkuji Jisasɨmo inɨngkafitnneꞌento mtɨꞌmokumentiso kalohi nakwo atofo lɨhwasi Jisasɨmo unɨngkohwano.
1
Jisas Kɨlaisɨye hofiyakwosafe yofeso olenoho.
(Luk 3:23-28)
1 Olo aꞌamu lohwa Jisas Kɨlaisɨye hofiyakwosafoho. Jisas kako hwe yofe engoꞌnjo Ntefit sohwoꞌnji Apɨlohamꞌnjiye temtitofo mtaꞌango hweho.
2 Apɨloham sohwo Aisakɨye kanɨngkwohweho.
Aisak sohwo Jekoupɨye kanɨngkwohweho.
Jekoup sohwo Jutaꞌnji homnɨngkwaꞌwehwosanjiye kanɨngkwohweho.
3 Juta sohwo kako Pelesɨꞌnji Selaꞌnjiye kanɨngkwohweho. Sikoe konaꞌwohisi Temafoho.
Peles sohwo Hesɨlounɨye kanɨngkwohweho.
Hesɨloun sohwo Lamɨye kanɨngkwohweho.
4 Lam sohwo Aminotapɨye kanɨngkwohweho.
Aminotap sohwo Nasounɨye kanɨngkwohweho.
Nasoun sohwo Salɨmounɨye kanɨngkwohweho.
5 Salɨmoun sohwo Mpouasɨye kanɨngkwohweho.
Mpouasɨye konaꞌwohisi Lehapɨyoho.
Mpouas sohwo Oupetɨye kanɨngkwohweho. Oupetɨye konaꞌwohisi Lutɨyoho.
Oupet sohwo Jesiye kanɨngkwohweho.
6 Jesi sohwo hwe yofe engoꞌnjo Ntefitɨye kanɨngkwohweho.
Ntefit sohwo Yulaiyafe ape nomanto Soulomoun tɨpemaꞌmentisofoho.
7 Soulomoun sohwo Leyapouamɨye kanɨngkwohweho.
Leyapouam sohwo Apiyafe kanɨngkwohweho.
Apiya sohwo Asafe kanɨngkwohweho.
8 Asa sohwo Jehousofatɨye kanɨngkwohweho.
Jehousofat sohwo Joulamɨye kanɨngkwohweho.
Joulam sohwo Usiyafe kanɨngkwohweho.
9 Usiya sohwo Joutamɨye kanɨngkwohweho.
Joutam sohwo Ehasɨye kanɨngkwohweho.
Ehas sohwo Hesekiyafe kanɨngkwohweho.
10 Hesekiya sohwo Monaseye kanɨngkwohweho.
Monase sohwo Emounɨye kanɨngkwohweho.
Emoun sohwo Jousaiyafe kanɨngkwohweho.
11 Jousaiya sohwo Jekounaiyaꞌnji homnɨngkwaꞌwehwosanjiye kanɨngkwohweho. Hohosohonta aꞌamu Mpapilounntaꞌangoso aꞌamu Isɨlael somo impe intofontɨfi ango Mpapiloun neꞌno motawoꞌmentohofofoho.
12 Mpapiloun neꞌno motawoꞌmentohofo sohonta Jekounaiya sohwo Siyalɨtiyelɨye kanɨngkwohwo imoꞌnɨmentisofoho.
Siyalɨtiyel sohwo Selopapelɨye kanɨngkwohweho.
13 Selepapel sohwo Apiyoutɨfe kanɨngkwohweho.
Apiyout sohwo Elaiyakimɨye kanɨngkwohweho.
Elaiyakim sohwo Esoufe kanɨngkwohweho.
14 Esou sohwo Satoukɨye kanɨngkwohweho.
Satouk sohwo Ekimɨye kanɨngkwohweho.
Ekim sohwo Elaiyatɨye kanɨngkwohweho.
15 Elaiyat sohwo Eleyasafe kanɨngkwohweho.
Eleyasa sohwo Matanɨye kanɨngkwohweho.
Matan sohwo Jekoupɨye kanɨngkwohweho.
16 Jekoup sohwo Jousepɨye kanɨngkwohweho.
Jousep sohwo Maliyafe hwe hweho.
Maliya Jisasɨmo maꞌmentisofoho. Jisas huhwo sohwo hofɨko yofe Kɨlaisɨyoho mulɨmentohofofoho. Hwe huhwo sohumo Anɨtu uhwosopento nakwoe hwaho lopono uhwatɨmentisofoho.
17 Apɨloham kakoe imuso hofɨkoꞌmontohwa aho hufaꞌu hopiꞌnono nomꞌne sɨfe mtaꞌni osofosofahuꞌno mjimoꞌnɨmɨwahonɨngkofi Ntefit imoꞌnɨmentisofoho. Ntefitɨye imuso hofɨkoꞌmontohwa aho hufaꞌu hopiꞌnono nomꞌne sɨfe mtaꞌni osofosofahuꞌno mjimoꞌnɨmɨwahonɨngkofi aꞌamu Isɨlael somo ango Mpapiloun neꞌno motawoꞌmentohofofoho. Osohonta hofɨkoꞌmontohwa aho hufaꞌu hopiꞌnono nomꞌne sɨfe mtaꞌni osofosofahuꞌno mjimoꞌnɨmɨwahonɨngkofi Jisas Kɨlais imoꞌnɨmentisofoho.
Maliya Jisas Kɨlaisɨmo aswo maꞌmentisofoho.
(Luk 2:1-7)
18 Olo hungkuno Jisas Kɨlais imoꞌnɨmentiso soꞌnoyolohoso ole, Jousep Jisasɨye konaꞌwohi Maliya simo kakoꞌne ape nto ufohotoꞌmentohofofoho. I osoꞌno Jousep Maliyamo momaso sohonta Maliya sɨmeho Anɨtuye Towahuno mtaꞌango imoꞌnɨmentisofoho. 19 Maliyafe hwehwo Jousep kako hwe wopɨngoꞌnohino hweho. Jousep ole syafɨhuꞌmento, Maliya wonɨmango unonoho. Ose syafɨsyonto olo hungkuno hiloso hiyaso waweno syafɨhuꞌmentisofoho. Osoꞌno ngko hungkuno ape mayoꞌne wamtɨhupoꞌmo. 20 Oso hisoꞌno ko syafɨsyonto wojo honɨngkanɨmentisoso aꞌamu Anɨtu mtaꞌango sohwo kakimo uꞌmanto ulɨmento, Jousep, Ntefitɨye imu sohwosi, kɨko ape Maliya mayosoꞌno iyoho kinɨngkuhwoloho. Upaꞌnyo. Maliyafe sɨmehomo mehomi nto imoꞌnɨmaho. Oso hiso Anɨtuye Towahuno uyɨmaso hweho. 21 Maliya hwomu nomahwosoꞌno kɨko yofe ole muso, Jisasɨyoho. Yofe hwapɨngoso ole, olo hwe lohwo kako aꞌamufe wonyoso wae yaofɨhwosi asomo utɨmayoꞌne hweho. Ose ulɨmentisofoho.
22 Hohonta Anɨtu hwe Aisaiya sohumo hungkuno uyahonɨngki kako aꞌamumo ulɨmojo sohwo kako hungkuno hiso mtɨꞌmokumentisofoho. Olo hiloso ne imoꞌnyo soꞌno Maliya mehomiꞌnji imoꞌnɨmentisofoho. 23 Ole mtɨꞌmokumento,
Upaꞌnɨmno. Ape sijo wopɨngosi hwehwo momasosi kako sɨmeho imoꞌnɨngkuhwosi hwomu nomaniyoho.
Hwomu huhwo sohwo ole mulɨfitnnefo Imanɨwel.
Yofe hwapɨngoso ole, Mpohwo Anɨtu nakwoꞌnji humayoꞌnefoho.
24 Jousep oso wojo hiso honɨngkanonto nolɨkafonto aꞌamu Anɨtu mtaꞌango sohwoe hungkunomo haloho pento kako Maliyamo maꞌmentisofoho. 25 I osoꞌno siko afapo ko humanji afa saho mofosyawosofoho. Ose humamojiyofoho. Osoꞌno ose humamojiye sohonta Maliya kako hwomu maꞌmentisofoho. Nomahonɨngki Jousep hwomu huhwo sohumo yofe Jisasɨyoho mulɨmentisofoho.