Marku
Marku tañi wirielchi küme dungu
Kiñe wentru Marku pingelu wirifi tüfachi lifru. Tüfa doy pichi lifru tati meli “evangelio” mew, nütramyeniefilu ta Jesus. Marku ta Bernabe ñi sobrino ürke. Miyawürkey külangen Pablo engün kiñe rupa tripalu ñi wewpiafiel ti werken küme dungu, feymew rume kimürkey feytichi dungu Jesus ñi femel.
Marku wirifi tüfachi lifru ayülelu am ñi kimelafiel ti afmatufal dungu ñi femel ta Jesus. Tunte doy pichifuy rume, tüfachi lifru nütramyeniefi kake kiñeke ti afmatufal dungu ñi femel ta Jesus. Marku ayürkey ñi yafültukuafiel tati kutrankawkülechi pu feyentulelu. Kom tukulpalelfi Jesus ñi kutrankawün femngechi tañi montulafiel kom che mülelu mapu mew.
1
Juan tati Fawtisachefe ta müley uwe mapu mew
(Matew 3.1-12; Luka 3.1-9, 15-17; Juan 1.19-28)
1 Fey tüfa mew llituy Jesucristo ñi küme dungu, Ngünechen tañi Fotüm.*Kiñeke kuyfi wirin mew ngelay: “Ngünechen ñi Fotüm”.
2 Tati pelon wentru Isaia famngechi wirintukuy:
“Iñche werkün tañi werken wünelealu eymi mew
femngechi tañi kimeltuafiel tati pu che kisu tañi akuael.”†Malakia 3.1.
3 “Kiñe wirartu dungun allküngey uwe mapu mew:
‘Kiñe nor küme rüpü reke feletupe tamün rakiduam,
femngechi tamün llowafiel ta Ñidol.’ ”‡Isaia 40.3 LXX.
4 Feymew ta Juan pewfaluwi ti uwe mapu mew,§uwe mapu mew: feyti mapu chew ngelay iney no rume, Jordan lewfü ñi konwe antü püle. fey fawtisamekefi tati pu che, ka feypinieyefi tañi wiñorakiduamtuael engün ta Ngünechen mew ka tañi fawtisangeael, femngechi tañi wiñoduamatuaetew engün ta Ngünechen kom tañi yafkan mew. 5 Kom ti pu che mülelu Judea trokiñ mapu mew, ka Jerusalen waria mew, tripay engün tañi allkütuael. Feypi engün tañi yafkafengen, fey Juan fawtisaeyew engün Jordan lewfü mew. 6 Juan tañi tukunieelchi takuwün ngüreley ta re kal kamellu mew, ka trariwtuley kiñe trülke koriwen trariwe mew. Ka ikey chori ka lelfün mew mülechi miel. 7 Fey tañi wewpin mew ta feypi: “Iñche mew inalepay ta kiñe doy fütra pepiluwünngelu, fey fente tañi yamniefiel mew ta kisu nentupüroñmalayafuiñ rume tañi okota. 8 Iñche ta fawtisawkeyiñ ta eymün re ko mew müten, welu ta kisu fawtisayaeymünmew ti Lif Küme Püllü mew.”
Jesus ta fawtisangey
(Matew 3.13-17; Luka 3.21-22)
9 Feychi mew, Jesus tripapay ta Nasaret waria mew, Galilea trokiñ mapu mew mülelu, fey Juan fawtisaeyew ta Jordan lewfü mew. 10 Feychi lelen mew müten tripatulu ta ko mew, Jesus pefi ñi nülan ta kallfü wenu ka pefi ñi nagpan ta kisu mew tati Lif Küme Püllü kiñe palluma reke. 11 Ka kiñe dungun allküngey wenu mapu mew feypilu: “Eymi ta iñche ñi piwkeyen Fotüm, iñche tañi manelnieel.”
Jesus tañi kintukaduamngen
(Matew 4.1-11; Luka 4.1-13)
12 Dew rupalu tüfachi dungu, tati Lif Küme Püllü ñi pepiluwün mew, Jesus puwi ti uwe mapu mew. 13 Fey meli mari antü mülepuy chew ñi miyawentukemum ti wapoke kulliñ ka wültukungey ñi kintukaduamaetew ta Weküfü.*Weküfü ta Satana pin ürke, tati pu weküfü ñi longko. Fey ti pu werken püllü poyetunieeyew.
Jesus llituy tañi küdaw Galilea mew
(Matew 4.12-17; Luka 4.14-15)
14 Fey tukungelu ta Juan karsel mew,†Juan karsel mew: Erode Antipa, tati gobernador Galilea ka Perea trokiñke mapu mew, püresuntukufi ta Juan. Jesus wiñotuy ta Galilea ñi wewpiafiel Ngünechen ñi küme dungu, 15 feypilen mew: “Akuy ta antü, ka dew mülepay Ngünechen tañi longko ülmenngen. Wiñorakiduamtumün ta Ngünechen mew, ka feyentun mew llowfimün kisu tañi we kimelün dungu.”
Jesus mangelfi ta meli challwafe ñi inayaetew
(Matew 4.18-22; Luka 5.1-11)
16 Jesus ta trekaley Galilea tañi inaltu pichi lafken püle, fey pefi ti epu peñiwen Simon Andre engu. Challwafe ürke engu. Fey petu ütrüftukulu engu tañi challwawe pu lafken, 17 Jesus ta feypifi ti epu wentru:
—Inamuchi, tamu challwafengefel, welu tüfa kintuafimu ta che tamu küpalafiel iñche mew.
18 Feychi lelen mew müten elkünuy engu tañi challwawe, fey inaeyew engu.
19 Fey doy üyew püle amulelu, Jesus pefi tati epu peñiwen Santiaw ka Juan, Sefedew ñi epu fotüm, mülelu kiñe farku mew petu raletulu engu tañi challwawe. 20 Feymew ka müten mangelfi ñi inayaetew, fey kisu engu elkünuy tañi chaw Sefedew tati farku mew ñi pu kona engün, fey amuy engu ta Jesus engün.
Kiñe wentru ta konweküfülelu
(Luka 4.31-37)
21 Fey puwi engün ta Kapernaum. Fey ti ürkütun antü‡ürkütun antü: tati regle puwchi antü tati pu judiu ñi semana mew, feychi antü mew elungekelafuy ñi femael chem küdaw rume. mew Jesus konpuy tati sinagoga§sinagoga: kake kiñeke lofche judiu tuwünngelu niekefuy ñi sinagoga pingechi ruka ñi trawüluam engün ka ñi kimeltungeam engün. mew, fey llituy tañi kimeltuael. 22 Fey ti pu che ta afmatuley femngechi tañi kimeltungeel mew engün, fentren pepiluwün mew am kimeltumekelu. Ñi kimeltun trürlay chumngechi ñi kimeltuken tati kimeltukelu ta Moyse ñi ley dungu.*tati kimeltukelu ta Moyse ñi ley dungu: Rume küme kimniefilu Moyse ñi ley dungu, tati kechu wüne wirielchi lifru ebrewdungu müngell. Rume yamfal wentrungey engün tañi rume kimfiel mew tati ley dungu ka ti kakelu wimtun. 23 Fey tati waria mew mülechi sinagoga mew mülerkey kiñe wentru konweküfülelu, fey tüfeychi wentru ta wirartufi ta Jesus:
24 —¿Chem mew anta kontumupaiñ, Jesus Nasaret tuwlu? ¿Küpaymi am taiñ apümkamuafiel? Iñche ta kimnieeyu, ka kimnien tami ineyngen. Eymi ta Ngünechen ñi dullin.
25 Fey Jesus ta katrütudungueyew feypilen mew:
—¡Feypikilnge tüfeychi dungu ka elkünutufinge ta tüfachi wentru!
26 Tati weküfü lalatulfi tati wentru, ka fütra newentu wirarüy, fey tripatuy tati wentru mew. 27 Kom ti pu che mülelu sinagoga mew llükay engün, ka welukonkechi ramtuwi engün: “¿Chem dungu anta tüfa? ¡Kimeltuy ta kiñe kangerumechi we kimelün dungu kom rüfkünu dungu mew! ¡Kenü tati weküfü kütu ta werküfi, ka müngeltueyew!”
28 Fey müchay müten nütramyengey ta Jesus Galilea tañi kom lof mapu mew.
Jesus tremolyefi ta fentren pu kutran
(Matew 8.14-17; Luka 4.38-41)
29 Tripapatulu engün tati sinagoga mew, Jesus, Santiaw ka Juan amuy engün ta Simon ka Andre tañi ruka mew. 30 Simon tañi llalla rume aling kutrankülerkey fey ngütantuluwkülerkey. Feypingey ta Jesus ñi kutrankülen tati kuse püllü, 31 fey kisu fülkonpuy, ka nükünufi kuwü mew, fey witrañpüramfi. Feychi lelen mew müten tremotuy ñi aling kutran mew, feymew müten pepikawi tañi poyeafiel ta Jesus.
32 Fey dew konlu ta antü,†dew konlu ta antü: Tati pu judiu kiñe antü pikefuyngün dew koniyüm wüla ta antü, fey dew rupayüm ti ürkütun antü (v. 1.21), fey kisu engün ka llitutukefuy ñi küdaw. feymew Jesus yelelngey fentren tati pu kutrankülelu ka ti pu konweküfülelu, 33 ka fentren che mülelu ti waria mew trawüluwpuy engün tati wülngiñ ruka mew. 34 Jesus tremolfi rume fentren che epe fill kutran nielu, ka wemünentufi fentren weküfü, welu elulafi tañi dunguael tati pu weküfü, kisu engün am kimnieetew.
Jesus kimeltuy ti werken dungu tati sinagoga mew
(Luka 4.42-44)
35 Fente küme puliwen, petu tañi dumdumkülen, Jesus tripay ti waria mew tañi ngillatumeael kiñe uwe lelfün mew ñi ngenomum che. 36 Simon ka tañi pu kompañ amuy engün tañi kintuafiel ta Jesus, 37 fey pefilu engün feypifi:
—Kom che ta kintuyawüleymew.
38 Welu ta kisu llowdunguy:
—Amuiñ tati fülküleyechi lof che mew taiñ kimelafiel engün kay tati werken dungu. Fey tüfachi dungu mew am ta küpalu ta iñche.
39 Fey tüfa famngechi Jesus miyawi Galilea trokiñ mapu mew. Kimelkiyawüli ti werken dungu sinagoga mew müleyelu kake kiñeke lof mapu mew ka wemünentuyefi tati pu weküfü.
Tremolngey ta kiñe wentru nielu ta lepra kutran
(Matew 8.1-4; Luka 5.12-16)
40 Kiñe wentru nielu lepra kutran‡lepra kutran: epe fill wesake kutran üñfew reke wefkelu trawa mew. Tati che nielu tüfachi kutran tati pu judiu rume nüngaytukefeyew. fülkonpuy ta Jesus mew, fey lukutulen feypifi:
—Pifulmi eymi, tremoltuafen tañi kutran mew.
41 Jesus ta kutranduamyeeyew, fey nüñmaeyew ñi kuwü ka feypieyew:
—Ayülen tami tremotuael. ¡Tremotunge!
42 Feychi lelen mew müten tati wentru tremotuy tañi lepra kutran mew. 43 Feymew ka müten Jesus chalitueyew, ka feypieyew:
44 —Allkütunge. Iney no rume feypikefilnge tüfachi dungu, fey amunge tati saserdote mew tami leliwülaetew tami tremotun. Ka yeaymi tati ofrenda ta mañumtun reke, Moyse tañi werküel, femngechi ta kom che ñi kimael tami dew tremolewetun tami kutran mew.
45 Welu amuletulu tüfachi wentru, fey eluwi tañi nütramyelafiel ta kom che femngechi dungu mew tañi rupan. Feymew ta Jesus pepi konwelay chem waria mew no rume chumngechi wimtulefuy ñi konpukefel, welu re wekuntu ti waria mülekerkey tati lelfün püle chew ngelay ruka che. Welu fill püle mülechi pu che küpakey tañi pepayaetew.
*1:1 Kiñeke kuyfi wirin mew ngelay: “Ngünechen ñi Fotüm”.
†1:2 Malakia 3.1.
‡1:3 Isaia 40.3 LXX.
§1:4 uwe mapu mew: feyti mapu chew ngelay iney no rume, Jordan lewfü ñi konwe antü püle.
*1:13 Weküfü ta Satana pin ürke, tati pu weküfü ñi longko.
†1:14 Juan karsel mew: Erode Antipa, tati gobernador Galilea ka Perea trokiñke mapu mew, püresuntukufi ta Juan.
‡1:21 ürkütun antü: tati regle puwchi antü tati pu judiu ñi semana mew, feychi antü mew elungekelafuy ñi femael chem küdaw rume.
§1:21 sinagoga: kake kiñeke lofche judiu tuwünngelu niekefuy ñi sinagoga pingechi ruka ñi trawüluam engün ka ñi kimeltungeam engün.
*1:22 tati kimeltukelu ta Moyse ñi ley dungu: Rume küme kimniefilu Moyse ñi ley dungu, tati kechu wüne wirielchi lifru ebrewdungu müngell. Rume yamfal wentrungey engün tañi rume kimfiel mew tati ley dungu ka ti kakelu wimtun.
†1:32 dew konlu ta antü: Tati pu judiu kiñe antü pikefuyngün dew koniyüm wüla ta antü, fey dew rupayüm ti ürkütun antü (v. 1.21), fey kisu engün ka llitutukefuy ñi küdaw.
‡1:40 lepra kutran: epe fill wesake kutran üñfew reke wefkelu trawa mew. Tati che nielu tüfachi kutran tati pu judiu rume nüngaytukefeyew.