رِسَالَةُ بُولُسَ ٱلرَّسُولِ ٱلتَّانِيةُ إِلَى أَهْلِ كُورِنْتُوسَ
بَعد بْرِيّتو الأولانِيّة ليهُم، بْقا بولَس والكورَنتِيّين يَتراسلو بَصَّح العَلاقة بينهُم فَسدَت، وعلى هَدا، بْعَتَّلهُم هاد البْرِيّة باش يْرَقَّع الحالة قْبَل ما يْزيد يْروح لعَندهُم. •
فالفُصول من 1 ل 7: بولَس يْحامي على رُسولِيّتو، هَدي هِيَ خَدَّمتو وراهو حاب يْخَبَّر على الله الآب ويَسوع المَسيح في كُل مْكان. وفي هاد الخَدمة اللي تْكَلَّف بيها، والو راهو مْسَبَّل، والو كايَن بَزّاف الصُعوبات، والو يَتعَدَّب، يَحمَل كُل شي وهُوَ صابَر. بولَس كان حاب يْقَنَّع الكورَنتِيّين يَقَّبلوه ويَقَّبلو التَعليم مْتاعو. •
الفُصول 8 و 9: كي كْتَب بولَس هاد البْرِيّة، كورَنتوس كانَت من البَلدان المْرَفّهين مْتاع هَداك الزْمان، التِجارة كانَت كاترة فيها والدْراهَم كانو بقيمَتهُم. على هَدا، طْلَب بولَس من المومنين مْتاع كورَنتوس يْكونو كْرام فالصَدَقة اللي كان حابهُم يَبَّعتوها للمومنين مْتاع أورشَليم. لازَم اللي عَندهُم الزْيادة يَتقاسمو مع اللي مَخصوصين. هاد الفُصول يْعَلّمو كيفاش لازَم يَترافدو الناس. • من الفَصل 10 للفَصل 13: بولَس يْقارَن بين زوج وْجوه للرُسولِيّة. كَنيسة كورَنتوس كانَت مْهَوّلة على جال ناس كانو يْدَرّسو شي مْخالَف لبولَس. هاد الناس كانو يْبَيّنو روحهُم بَزّاف، هَدرَتهُم ساهلة، ناجحين، يَشُّكرو روحهُم باللي بشْطارَتهُم اللي هومَ ناجحين. كانو يَتصَرّفو كيما صْحاب الدِيانات اللي كانو كاينين في كورَنتوس داك الوَقت وناس الكَنيسة كانو حابّين هاد الناس. بَصَّح بولَس وَرّا وَجه آخُر للرَسول: رَسول المَسيح كان يْصَغَّر روحو باش يْكَبَّر بالأخرين، يَقبَل يْكون ضْعيف ويَستَنّا الله يَعطيه القُوّة، ما يَطلَب حَتّى شي لنَفسو، لا مال وَلا شان. بولَس فَكَّرهُم باللي هُوَ ما طْلَبش الدْراهَم باش يْبَشَّر بالإنجيل، باش يَعَّرفو باللي مْحَبَّة الله هِبة من الله والله ما يَستَنَّاش من بْنادَم باش يْخَلّصو.
1
1 بولَس، رَسول المَسيح يَسوع بمُراد الله، وتيموتاوَس الأَخ، لكَنيسة الله اللي في كورَنتوس، ولكُل القَدّيسين اللي في كامَل أَخائِية، 2 نَعمة وسْلام ليكُم من عَند الله، بابانا، والرَب يَسوع المَسيح.
إلَه العْزا
3 مْبارَك الله باباة رَبّنا يَسوع المَسيح، مول الرَحمة وإلَه كُل عْزا، 4 اللي يْعَزّينا في كُل شَدَّتنا، باش نَقَّدرو حْنا نْعَزّيو اللي يْكونو فالشَدّة بالعْزا اللي نْنالوه حْنا بالدات من الله، 5 خاطَر قَد ما يَكَّترو وْجاع المَسيح فينا، قَد ما يَكتَر بالمَسيح عْزانا. 6 وَلاّ كُنّا فالشَدّة، هاد الشي لعْزاكُم وخْلاصكُم، وَلاّ كُنّا مْعَزّيين، هاد الشي لعْزاكُم اللي يْخَلّيكُم تَحَّملو الوْجاع اللي رانا حْنا تاني نْقاصيوهُم. 7 ورْجانا ليكُم تابَت، عارفين باللي كيما تْسالو فالوْجاع، تْسالو تاني فالعْزا. 8 وما راناش حابّين يا الخاوة، نْخَبّيو عليكُم الشَدّة اللي جَوَّزناها في آسيا، واللي قْوات علينا وكانَت فوق طاقَتنا، حَتّى آيَسنا نَبقاو حَيّين. 9 كُنّا قْبَلنا في قْلوبنا حُكم الموت، باش ما نْكونوش تاكلين على روحنا، ويْكون تْكالنا على الله اللي يْرَد الموتى للحْياة، 10 هُوَ اللي سَلَّكنا ومازال يْزيد يْسَلَّكنا من موت كي هَدي، فيه اللي حَطّينا رْجانا باش يْزيد يْسَلَّكنا. 11 وعلى جال اللي أنتومَ تْعاونونا بالصْلاة لينا، ناس بَزّاف يَقَّدرو يَحَّمدو الله في خاطَرنا على جال كَترة الهِبات اللي يَنَعطاولنا بصْلاتكُم.
بولَس يْبَدَّل واش كان مْعَوَّل
12 خاطَر الشي اللي نَفَّخرو بيه هُوَ شْهادة ضَميرنا، باللي مْشينا في هاد الدَنيا، وبخْصاص معاكُم، بالصْفا والنِيّة مْتاع الله وبنَعمة الله ماشي بحِكمة الدات، 13 ما نَكَّتبولكُم غير الشي اللي تَقَّدرو تَقراوَه وتَفَّهموه. نَتمَنّا تَفَّهمو مْليح مْليح، 14 كيما سْبَق وفْهَمتو والو شْوِيّة، باللي بينا اللي تَفَّخرو كيما نَفَّخرو بيكُم في يوم رَبّنا يَسوع.
15 بهاد التيقة اللي عَوَّلت من الأَوَّل نْجيكُم باش نْزيدلكُم فَرحة أخرى، 16 ومن عَندكُم نْروح لمَقدونِية ونْعاوَد من مَقدونِية نْجي لعَندكُم وأنتومَ تْوَصّلوني لليَهودِيّة. 17 كي عَوَّلت على هاد الشي، بَنت ما نْخَمَّمش، وَلاّ نَتصَرَّف على هْوا الدات، وكْلامي فيه "إيه" و"لالا"؟ 18 يَشهَد الله باللي كْلامنا ليكُم ما راهوش "إيه" و"لالا"، 19 خاطَر، ابن الله، يَسوع المَسيح، اللي بَرَّحنا بيه ليكُم، أنا وسلوانَس وتيموتاوَس، ماكانش "إيه" و"لالا"، فيه ما كايَن غير "إيه". 20 خاطَر فيه ال"إيه" لكامَل وْعود الله، وعلى هَدا فيه اللي نْقولو "آمين" لمَجد الله بينا. 21 اللي يْتَبَّتنا معاكُم فالمَسيح واللي دْهَننا هُوَ الله، 22 هُوَ تاني اللي طْبَعنا بخاتمو، وعْطا عَربون الروح في قْلوبنا. 23 نْشَهَّد الله، على رَقَّبتي، اللي ما جيتش لكورَنتوس غير باش نْحافَض عليكُم. 24 ما راناش سْياد على إيمانكُم، رانا نْعاونو فيكُم لفَرحكُم، خاطَر بالإيمان اللي راكُم تابتين.