رِسَالَةُ يُوحَنَّا ٱلرَّسُولِ ٱلتَّالِتَةُ
كايَن تَلت بْراوات فالعَهَد الجْديد مَعروفين بآسَم بْراوات يوحَنّا. فالبْرِيّة الأولى الكاتَب ما دْكَرش آسمو وفالبْرِيّة التانية والتالتة سَمّا روحو "الشيخ". فالأولى ما دْكَرش آسَم الناس اللي كْتَبَّلهُم، فالتانية كْتَب "للمْرا اللي الله خَيَّرها هِيَ ووْلادها" وفالتالتة لواحَد مومَن واسمو "غايوس".
البْراوات التْلاتة مَكتوبين لناس يَعَّرفو مْليح إِنجيل يوحَنّا. كانَت فاتَت مُدّة من اللي سَمعو الناس ببْشارة يَسوع المَسيح المَرّة الأولى، والمَسيحِيّين اللي قْراو من بَعد هاد الإِنجيل ما فَهموهش مْليح وبَزّاف اللي بَعّدو على الكَنيسة. ما حَبّوش يامنو باللي المَسيح جا في صِفة بْنادَم وما قَدروش يَفَّهمو فاش يَسَّحقوه خاطَر حْياتو وموتو ما كان عَندهُم حَتّى مَعنى ليهُم. كانو يْقولو: "حْنا ماشي خاطيين، نَعَّرفو الله ورانا عايشين فالنور"، بَصَّح سيرَتهُم كانَت تْبَيَّن العَكس.
يوحَنّا في بْراواتو يْوَصّي المَسيحِيّين باش ما يْتَبعوش هاد الفْكايَر الغالطين في آمَر الله ويَسوع. وْلاد الله لازَم يامنو باللي يَسوع المَسيح صَح جا في صِفة بْنادَم، واللي يْقولو العَكس هومَ عَديان المَسيح. لازَم المومنين يْشَدّو فالبْشارة اللي سَمعوها من الأَوَّل ويْكون الشي اللي يْعيشوه المومنين مْوافَق مع الشي اللي يامنو بيه ويَعَّرفو باللي : مْحَبّة الله والمَسيح يَعني مْحَبّة الناس.
1
1 الشيخ لغايوس الحْبيب اللي نْحَبّو فالحَق.
2 يا الحْبيب، نَتمَنّا تَنجَح في كُل شي وتْكون صْحيح في داتَك وفي نَفسَك. 3 فْرَحت بَزّاف كي لَحقو الخاوة وشَهدو بالحَق اللي فيك، وبالحَق اللي أنتَ تَمشي فيه، 4 ما عَنديش فَرحة كْبيرة كْتَر من اللي نَسمَع باللي وْلادي راهُم يَمشيو فالحَق.
غايوس
5 يا الحْبيب، أنتَ حْلالي في كُل شي تْديرو للخاوة وحَتّى للبْراوِيّة، 6 اللي شَهدو بمْحَبتَك قُدّام الكَنيسة، واللي تَعمَل مْليح لو كان تْعاوَنهُم فالشي اللي لازَمَّلهُم للسْفَر كيما يْليق بالله. 7 ياخي في خاطَر آسمو اللي راحو يَخَّدمو وما أدّاو والو من الكُفّار. 8 حْنا لازَم نْرحبو باللي بْحالهُم باش نْكونو خَدّامين معاهُم للحَق.
ديوتريفوس
9 كْتَبت حاجة للكَنيسة بَصَّح ديوتريفوس اللي يْحَب يْكون الأوَّل عَندهُم ما يَقبَلناش. 10 على هَدا، لو كان نْجي، نَدكُر فْعالو اللي دارهُم، الكْلام الدوني اللي شَيّعو علينا، وما كْفاوَهش هَدو، يْزيد ما يَستَقبَلش الخاوة واللي يْحَبّو يَستَقبلوهُم، ما يْخَلّيهُمش ويْحاوَزهُم من الكَنيسة. 11 يا الحْبيب، ما تْتَبَّعش الشَر، تَبَّع الخير. اللي يْدير الخير من الله، اللي يْدير الشَر ما شافش الله.
ديمِتريوس
12 ديمِتريوس شَهدولو كامَل والحَق بالدات شْهَدلو وحْنا تاني نَشَّهدو وراك عارَف باللي شْهادَتنا حَقّانية. 13 كانو عَندي حاجات بَزّاف نَكتَبهُملَك، بَصَّح ما رانيش حاب نَكتَبلَك بالمِداد والريشة.
سْلام
14 نَتمَنّا قْريب نْشوفَك ونَهَّدرو فُم لفُم. 15 يْهنيك، الحْباب يْسَلّمو عليك، سَلَّم على الحْباب كُل واحَد بآسمو.