رِسَالَةُ بُولُسَ ٱلرَّسُولِ إِلَى أَهْلِ غَلَاطِيَّةَ
كْتَب بولَس هاد البْريّة لكْنايَس جايّين في شَمال آسيا الصُغرى (التُرك). أسَّس هاد الكْنايَس فالسْفَر مْتاعو التاني والتالَت، بَصَّح من بَعدو، جاو ناس يْقولو كْلام آخُر.
كانو كْنايَس غَلاطية فيهُم مومنين آصَلهُم يْهود وواحَدُخرين آصَلهُم ماشي يْهود. اللي آصَلهُم يْهود بْقاو شادّين في عْوايَد الشَريعة اليَهوديّة اللي تْقول باللي ما لازَمش ياكلو مع غير اليْهود ولازَم يَتخَتّنو، ولازَم قْبَل ما الواحَد يامَن بيَسوع المَسيح يَسبَق يْتَبَّع الشَريعة اليَهودِيّة. هاد الكْلام كان عَكس بْشارة المَسيح وعلى هَدا كْتَب بولَس هاد البْرية:
· فالفُصول من 1 ل 2: حْكا حْكايتو، والو كان يْهودي، كانَت دَعوتو لغير اليْهود والرِيّاس في كَنيسة أورشَليم كانو راضيين على هاد الدَعوة خاطَر فَهمو باللي الإيمان بيَسوع المَسيح هُوَ اللي يْخَلّي المومَن مَقبول عَند الله ماشي تَطبيق الشَريعة. · الفُصول من 3 ل 4: يَدكُر بولَس آيات من العَهَد القْديم اللي تْبَيَّن باللي وَعد الله اللي تْحَقَّق بالمَسيح جا قْبَل الشَريعة وباللي الله ما يْفَرَّقش بين بْني آدَم على جال لونهُم وَلّا جَنسهُم وَلّا دينهُم. · فالفُصول من 5 ل 6: حَتّى واحَد ما لازَم يَبقا يْخَمَّم كيفاش يْبَرّي روحو قُدّام الله خاطَر المَسيح هُوَ اللي يْبَرّي المومن.
الإيمان بيَسوع المَسيح هُوَ بَرك اللي يْحَقَّق للمومَن عَلاقة صْحيحة مع الله وفالمَسيح المومنين يَتوَحّدو مع الله ومع بَعضهُم بَعض.
1
بولَس، رَسول لا من عَند الناس، وَلا من عَند بْنادَم، بَصَّح من عَند يَسوع المَسيح والله الآب اللي حْياه من الموت، وكامَل الخاوة اللي معايَ، لكْنايَس غَلاطية، نَعمة ليكُم وسْلام من عَند الله بابانا والرَب يَسوع المَسيح، اللي سَلَّم روحو على جال دْنوبنا باش يْسَلَّكنا من هاد الزْمان الدوني على حْساب مُراد الله بابانا، ليه المَجد للدْوام، آمين.
الإنجيل الواحَد
نَستَغرَب اللي هَكدا بالخَف بَعَّدتو على اللي دْعاكُم بنَعمة المَسيح ودَرتو إنجيل واحَدآخُر. فالصح، ما كانش إنجيل واحَدآخُر، بَصَّح كايَن اللي راهُم يْهَوّلو فيكُم وحَبّو يْحَرّفو إنجيل المَسيح. مَنعول اللي يْبَرَّحَّلكُم بإنجيل ماشي كيما الإنجيل اللي بَرَّحنالكُم بيه، يا لوكان نْكونو حْنا وَلاّ مْلاك من السْما، كيما قُلنا من قْبَل، ودُرك تاني نْزيد نْقول: لو كان يْجي واحَد يْبَرَّحَّلكُم بإنجيل ماشي كيما اللي تْبَشَّرتو بيه، يْكون مَنعول. 10 دُرك هِمّالا، نْحَوَّس نْرَضّي الناس وَلاّ الله؟ وَلاّ نْحَوّس نَعجَب الناس؟ لوكان مازَلني نَعجَب الناس، لوكان ما رانيش خادَم المَسيح.
دَعوة الله لبولَس
11 نْقولَلكُم يا الخاوة، الإنجيل اللي بَرَّحتَّلكُم أنا بيه ما راهوش من بْنادَم، 12 خاطَر ما أدّيتوش وما تْعَلَّمتوش من عَند بْنادَم، بَصَّح جاني بوَحي من يَسوع المَسيح. 13 ياخي سْمَعتو كيفاش كانَت سيرتي في دين اليَهودِيّة، كيفاش كُنت شاحَن نَحڤَر في كَنيسة الله ونْخَرَّب فيها، 14 كُنت نَتقَدَّم في دين اليَهودِيّة كْتَر من بَزّاف اللي كانو نْتاجي ومن زَرّيعتي، وكُنت شاد بَزّاف في عْوايَد جْدودي. 15 بَصَّح، كي حَب اللي خَيَّرني من اللي كُنت في كَرش يَمّا، ودْعاني بنَعَّمتو، 16 يْضَهَّرلي بْنو، باش نْبَرَّح بيه عَند اللي ماشي يْهود، تَم تَم، ما شاوَرت لا الدات وَلا الدَم، 17 وما طْلَعتش لأورشَليم عَند اللي كانو رُسَل قْبَل منّي، بَصَّح رُحت لبْلاد العْرَب وعاوَدت وَلّيت لدِمَشق. 18 أومبَعد، بَعد تَلت سْنين، طْلَعت لأورشَليم، باش نَتعَرَّف ببُطرُس وقْعَدت عَندو خْمَسطاشَن يوم، 19 وما شفت حَتّى رَسول واحَدآخُر من غير يَعقوب، خو الرَب. 20 ما رانيش نَكدَب فالشي اللي راني نَكتَبَّلكُم فيه، الله شاهَد. 21 أومبَعد، رُحت لَجْوايَه سورِيّة وكيليكِيّة، 22 بَصَّح وَجهي ما كانش مَعروف عَند كْنايَس اليَهودِيّة اللي فالمَسيح. 23 كانو بَرك يَسَّمعو يَتقال: اللي كان يَحڤَر فينا، دُرك راهو يْبَرَّح بالإيمان اللي كان من قْبَل يْحَوَس يْهَدّو، 24 وكانو يْسَبّحو الله على جالي.