1 Sulemanu u ya'an ta̱ a̱ya̱ kupa n a tatsu, kafu u kotso kuma'a kefeku ko tsugono ci ni. 2 U ma'i kefeku ka nu nɗanga n na a kapai a̱ Kuntsu ku Lebano. Ugaɗi u ni u ɗaɗa udashi amangatawun n amangerenkupa (150), wanshi u ni udashi amangatatsunkupa n a tawun. Uɗa̱ngi u ni kpamu udashi amangere n a tawun, a ma'i ta̱ ɗa e peciki ni kuna̱shi ni nshikpu mu nɗanga n sida, koɓolo kpamu aburakpatsu a gbagba'in n sida uzuwi punu a̱ nshikpu ma. 3 A̱ kpa̱'i gaɗi va n aburakpatsu a nɗanga n sida. Aburakpatsu a utsura a ra̱ka̱ vi le i ta̱ amangere n a tawun, ugeri gendu a kadaru dem. 4 A kasaka dem wi ta̱ n atusu gaɗi udari ugboku u tatsu a mindansanai. 5 Utsutsu u ku'uwaka wa dem wi ta̱ n urotu wu utsutsu wu ngon n na̱shi ugeri adaru a tatsu, a mindansanai.

6 Sulemanu u ma'i kpamu kafalaka ka na ugaɗi wa ashamkpatsu a̱ ni a yawai udashi amangatatsunkupa n a tawun, n wanshi amangere n a tawun. A ma'a ta̱ kpamu kafalaka ko yoku n ashamkpatsu e kelime ka̱ ni, koɓolo n kafalaka ɗe feu.

7 U ma'i kpamu kunu kakuba ko tsugono, ɗa u ɗekei ni kefeku ka afada, ubuta̱ u kukiɗa ka afada, ɗa u kumai ka'a nu nɗanga n sida ili i na i ɗikai a iɗika ali a kubana a gaɗi vu kukpa̱. 8 Sulemanu u ma'i kpa'a ku na u kuyongo a̱ kucina̱ ku mashilya mo mololo mo yoku n tsuzogu icu'u i te n kefeku ka afada. U doku u ma'akai kpamu vuka vu ni mekere ma Firi'auna kefeku ko tsugono, tsu kefeku ka nampa ka.

9 Ima'ashi i nampa dem, a ili i na i ɗikai n tsupulai ali punu a ulanga u gbayin wa, ili i na i ɗikai a̱ kumi'i ali a kubana a̱ kukpa̱, a ya'an ta̱ ulinga wa n atali a singai n aza ikebe n a̱bunda̱i. Ana a gisanki atali a ɗa a kiɗai a ɗa n ugangafu, pulai n a suvu dem. 10 Ugiti u kuma'a wa a ya'an ta̱ u ɗa n atali a gbagba'in a singai ka̱u, o yoku ali ugaɗi u le u yawa ta̱ udashi gendu, o yoku kpamu ugaɗi u le udashi kupa n ure. 11 Gaɗi vi ni atali a singai a utsura ɗa, ushe'wi derere, koɓolo kpamu n aburakpatsu a nɗanga n sida. 12 Ulanga u gbayin u kefeku ko mogono ka, ulanga wa asuvu u na wi e kelime ka̱ a̱'isa̱, n utsutsu u kunu ka̱ a̱'isa̱ ka ki ta̱ ukanji m mashilya ma na a walakai kutatsu n atali a na e she'wei, e mere ma uwalaki dem u na a ya'in n aburakpatsu a nɗanga n sida n kodololo ka̱ ni.

13 Mogono Sulemanu u suki e ɗekeke yi Hiram vuza va aza a Taya, 14 Vuza na a̱na̱ku a̱ ni i kagapa a̱ ka̱tsuma̱ ke kelentsu ka aza a Nafutali, esheku a̱ ni tankpamu vuza va aza a Taya, wi ta̱ kpamu n ulinga we ekiye u kuya'an ki iyum i shili. Hiram wi ta̱ n kuyeve ka̱u koɓolo n kufuɗa ku kuya'an ili kakau n iyum i shili. U ta̱wa̱i u mogono Sulemanu ɗa u ya'in ili dem i na a zuwai ni u ya'an.

15 U luwa̱i ashamkpatsu a iyum i shili e re, yaba dem uɗa̱ngi u ni u yawa ta̱ udashi kamanga n u cindere, ugaɗi u kawin ka na ka̱ ka̱ra̱'i le dem ɗaɗa udashi kupa n kunla̱i. 16 A gaɗi va ashamkpatsu a, u ma'i ɗe obisho n iyum i shili i gbagba'in a na yaba dem ugaɗi u ni u yawai udashi u cindere n kagimi. 17 A gaɗi vu kobisho dem a ya'in ɗe tsuzogu tsu kuca'a ci ikani ali ugeri u cindere. 18 U ya'in adaru e re a iyum i shili o tsuzogu ci iyoci yi umaci u ruman. 19 Obisho a na i a gaɗi vu ashamkpatsu a punu a̱ kunu ku na va̱ kugita̱ ku'uwa o yotso ta̱ apulufa, ɗa ugaɗi u le u yawai udashi u ta̱li. 20 Obisho a na i a gaɗi vu ashamkpatsu re a, i ta̱ n ululu a iyoci yu umaci u Ruman ali amangatawenre (200) udari a adaru e re uka̱ra̱ki dem. 21 Hiram u shikpa̱i ashamkpatsu a̱ utsutsu u kefeku ka̱ a̱'isa̱ ka. Kashamkpatsu ka na ki a uɓon u ɗakai ka ɗaɗa e ci ɗeke Jakini, ka na ki a uɓon u gaɗi ka ɗaɗa Buwazu. 22 Obisho a na i gaɗi va ashamkpatsu a ya'an ta̱ a ɗa tsa apulufa. Ta a ya'in nannai ali o kotsoi ulinga u kuya'an ka ashamkpatsu ka.

23 U ya'in kebelyu ka gbayin n iyum i na a̱ luwa̱i adama a̱ kutsungu mini. Uga̱vi u ni u yawa ta̱ udashi u cindere n kagimi wanshi u ni kpamu udashi gendu, n kawin ka na ka̱ ka̱ra̱'i una̱ u kebelyu wa, ka yawa ta̱ udashi amangere n u tawun. 24 U ka̱ra̱'i a̱ una̱ u kebelyu ka a ya'an ta̱ ololu e re a edele a na a ya'in n iyum i shili ɗa a̱ ka̱ra̱ka̱i kebelyu ka, a ya'an ta̱ edele a̱ ta̱li a̱ una̱ wu udashi u ute-ute ali uka̱ra̱'i.

25 A zuwai kebelyu ka gbayin ka a gaɗi va obomburon kupa n e re iyum i shili, a tatsu a kinda uɓon u gaɗi, a tatsu a kinda uɓon u ka̱livi, a tatsu kpamu a kinda ɗakai, a tatsu a na a buwai kpamu a kinda kasana. Kebelyu ka tamkpamu a gaɗi vi le, ogundoi e le punu n a suvu. 26 A̱guruzu e kebelyu a, a yawa ta̱ kukiye ku tatsu, una̱ u ni tsu una̱ u mokoko'o ɗa kpamu u yotsoi apulufa a̱ mini. U tsu ɗika ta̱ mini ma na ma yawai edele a̱kpa̱n amangere. (40,000.)

27 Ɗa kpamu u ya'in a̱ma̱la̱nke a̱ kuka̱ra̱ka̱ n iyum i shili, yaba dem vi le u yawa ta̱ udashi u ta̱li, wanshi ubapi u ta̱li, ɗa ugaɗi u ni wo okpoi tamkpamu udashi u na̱shi n kagimi. 28 Na ɗa tsu na a ya'in a̱ma̱la̱nke a, i ta̱ uya'in apashi a̱ na̱shi ɗa a gbaɓai le n urotu wu utsutsu wa. 29 Apashi a̱ na̱shi a ita̱ uka̱ri n ululu a kawu, n wa Anaka, n Corobi ali n gaɗi vu ni dem. Gaɗi n ɗaka vi Ikawu n Anaka a, a ya'an ta̱ ɗe ikari ya apulufa. 30 a̱ma̱la̱nke dem i ta̱ n anci a nwalu a na a ya'in n iyum i shili a̱ na̱shi, yaba dem kpamu n kebelyu u kiyangi a nsaɓu n na̱shi n na a ya'in n anci o tsuzogu a akambu dem. 31 Punu a a suvu a una̱ wi ta̱ punu u na a ya'in n urotu wu utsutsu tsu makawani ali udashi u te n kagimi. Una̱ wa wi ta̱ ma̱kurugu, koɓolo ida̱sa̱mkpa̱tsu udashi u re n kagimi. N tsupulai ci ni a ya'in ɗe tsuzogu tsu kanci tsa, kapashi ka faɓalya ka a̱ma̱la̱nke ka a ya'in u ɗa ugaɗi derere, ba ma̱kurugu ba. 32 Anci a nwalu a̱ na̱shi a i ta̱ ɗaka vu kapashi ka faɓalya ka, alangu a na e remei anci a i ta̱ ugbaɓi n a̱ma̱la̱nke va. Kisani ka kanci dem ka yawa ta̱ udashi u te n kagimi. 33 Anci a i ta̱ u ya'in tsu anci e ekeke o odoku, alangu a na a̱ ɓa̱na̱i anci a n geru va, n ika̱na̱tsu i geru, nu mogbodo ma na ma̱ ɓa̱na̱i le dem a ya'an le ta̱ n iyum i shili.

34 A̱ma̱la̱nke dem i ta̱ n ika̱na̱tsu i na̱shi, mogon dem n ka̱ka̱na̱tsu ke te ka na ka̱ uta̱i a a̱ma̱la̱nke a. 35 A gaɗi vu a̱ma̱la̱nke dem makatsu mi ta̱ ɗe ma na wanshi u ni u yawai udashi kuci. Ika̱na̱tsu i kapashi ka faɓalya ka ki ta̱ ugbaɓi n gaɗi vu a̱ma̱la̱nke va. 36 U ka̱ra̱i ɗe ululu o Corobi, n ikawu koɓolo n urotu wu nɗanga mu nshuwa a ikyamba ya̱ ika̱na̱tsu ya ɗe a na i a gaɗi vu ubuta̱ u faɓalya wa koɓolo n ubuta̱ u gbani u na u buwai dem. N ikari ya apulufa a̱ uka̱ra̱'i dem. 37 Na ɗa tsu na u ya'in ashamkpatsu kupa a. U ya'in le m moyotsonoi ugisanki le kpamu derere.

38 Ɗa Hiram u ya'in ebelyu e kenke'en kupa a̱ iyum i shili, yaba dem vi le wanshi u ni u yawa ta̱ udashi u ta̱li, u tsu ɗika ta̱ mini ma na ma yawai edele amangatawenre n kamangankupa (230). 39 U zuwai a̱ma̱la̱nke a tawun a uɓon u ɗakai wa̱ A̱'isa̱ a gbayin a, a tawun kpamu n uɓon u gaɗi. U zuwai kebelyu ka a uɓon u ɗakai u mogon ma kasana ma̱ ni. 40 U ya'in ebelyu a n ikenekpetsu ali m moko'o ma na a ci ja'anku.

Hiram u kotsoi ulinga wa̱ a̱'isa̱ a Vuzavaguɗu u na u ɗikai kuya'anka mogono Sulemanu,

41 Ili i na u ya'in i ɗanna, ashamkpatsu e re a, n asasu a gbagba'in e re a na i tsu kebelyu ka na ki gaɗi va ashamkpatsu a, n ololu n re n na mi n tsuzogu adama a kupalaka ebelyu a gbagba'in a na i gaɗi va ashamkpatsu a, 42 u ya'ankai kpamu ololu e re a ili i na yi tsu umaci u ruman ali amangatawa̱na̱shi (400) adaru e re e re a ci ili yi umaci u ruman ya o kololu ke te dem, n tsuzogu tsu na a ya'ankai ebelyu a gbagba'in a na i a gaɗi va ashamkpatsu a, 43 a̱ma̱la̱nke kupa koɓolo n ebelyu kupa e le, 44 kebelyu koɓolo n anaka kupa n e re ɗaka vi ni. 45 Mgbodo, n ikenekpetsu koɓolo m moko'o ma kuja'angu. Ili i nampa ya ra̱ka̱ i na Hiram u ya'ankai Mogono Sulemanu adama a̱ a̱'isa̱ a Vuzavaguɗu, a ya'an ta̱ i ɗa n iyum i shili. 46 Mogono ma zuwai a ya'in i ɗa n ci'in a̱ a̱pula̱ka̱ a na i ɗevu n Urudu e mere ma Sukotu n Zaretan. 47 Sulemanu u kondo a̱miki a̱ ucanuku u nanlo ba, adama a na u ɗa wi ta̱ n a̱bunda̱i. E yeve a̱miki a iyum i shili ya ba.

48 Sulemanu u ya'in ucanuku wu ulinga u na wi punu a̱ a̱'isa̱ a Vuzavaguɗu a, katalikalyuka ka azanariya, n kirukpa ka azanariya ku na a tsu zuwa ɗe boroji vu ciɗa, 49 ashamkpatsu a̱ nkuni ma azanariya koci, a na a zuwai e kelime ka a̱ ubuta̱ u ciɗa, a tawun a kakambu ku usingai, a tawun feu a kakambu ku ugula̱, n ikari ya a̱pa̱lu ra̱ka̱ nu nkuni n ata'an a gbagbain a azanariya. 50 nu nkoko'o n wawa'a, n ili i ku kima̱sa̱ nkuni, nvene m gbagba'in, ebelyu a̱ kuɓa̱na̱ ili i ma̱gula̱ni, n a̱mbu e ku kenuku akina, n ili i na yi uɓa̱ni n utsutsu wu ubuta̱ u ciɗa koɓolo n a̱'isa̱ a gbayin a Vuzavaguɗu. Dem u ya'in le n azanariya. 51 Ana Sulemanu u kotsoi kuya'an ulinga wa̱ a̱'isa̱ a Vuzavaguɗu a, ɗa u tuka̱i punu ili i na esheku a̱ ni Dawuda we erengi, ili i ɗaɗa azurufa, n azanariya koɓolo n ucanuku u kunu, ɗa u zuwai le a̱ kunu ku kuzuwa ku canuku ka̱ a̱'isa̱ a Vuzavaguɗu.