1 Ana Ahabu u yawai a kpa'a ɗa u danai vuka vu ni Jezebelu i na Iliya u ya'in, n uteku tsu na wu unai eneki a Balu ra̱ka̱ n kotokobi. 2 Ɗa Jezebelu u su'uki Iliya n akaka, u danai, <<Ya'an a̱ma̱li a takacika mu ali u la'a nannai ɗa baci makpa'a makyan ma nampa mu unai nu tsu na vu unai eneki a Balu ba.>>

3 Ɗa Iliya u panai wovon, ɗa u sumai adama na u la'aka n wuma u ni. Ana u yawai a̱ likuci i Biyasheba a Yahuda ɗa u ka̱sukpa̱i kagbashi ka̱ ni lo. 4 Ama ɗa a̱yi u lazai, u ya'an nwalu n kanna kete a kakamba, u yawai u da̱sa̱ngi a kumi ku maɗanga ma yoku, ɗa u folonoi ukpa̱, u danai, <<Vuzavaguɗu, kadama ka yawa mu ta̱. Ɗika wuma uva̱. Adama a na mpa n la'a ikaya i va̱ i na i kuwa̱i ba.>> 5 Ɗa u vaki a̱ kumi'i ku maɗanga ma ɗa alavu a̱ pura̱i ni.

U ya'an megeshe ba ɗa kalingata ka Vuzavaguɗu ka sawai ni ɗa ka danai, <<Ɗa̱nga̱ vu lya'a ilikulya'a.>> 6 Ana u la̱na̱i, ɗa u cinai emeshe a na a ya'in n katali ka usuɗukpi n kedele ka̱ mini. Ɗa u ɗa̱nga̱i u lya'i u so'i ɗa kpamu u doku u vaki.

7 Ɗa kalingata ka Vuzavaguɗu ko doku ka̱ ta̱wa̱i ire, ɗa ka sa'wa ni, ka danai, <<Ɗa̱nga̱ vu lya'a ilikulya'a, ɗa baci ba nwalu n na mi kelime ka̱ nu mi ta̱ nu mɓa̱ri.>> 8 Ɗa u ɗa̱nga̱i u lya'i ɗa u so'i, ɗa u ciya̱i utsura wu nwalu, ɗa u ya'in nwalu ayin amangere kanna n kayin ali u yawai a kusan ku Sinai, kusan ku Ka̱shile. 9 Ta ɗe u banai a kaɓatsu ka katali ɗa wu asai.

Ɗa Vuzavaguɗu u ya'in kadanshi n Iliya, u danai, <<Iliya, yiɗa̱i vi a kuya'an na?>>

10 Ɗa Iliya wu ushuki, u danai, <<Vuzavaguɗu Ka̱shile Mala'imili, mi ta̱ e cishe'e adama a̱ nu ayin tutu. Ama aza a Isaraila a iwan ta̱ uzuwakpani u nu, a̱ fa̱da̱i katalikalyuka ka̱ nu, ɗa unai eneki a̱ nu n kotokobi. Mpa ɗa koci m buwai, ɗa kpamu a cigai ku una mu.>>

11 Ɗa Vuzavaguɗu u danai ni, <<Uta̱ ka̱ta̱ vu Shamgba a kusan e kelime ka Vuzavaguɗu, adama a na wi ta̱ a kuciga kupasamgbanai.>>

Ɗa wunla̱i wu utsura u ɓatsai nsasan ɗa u ɓosoi akpanlai okpoi miri-miri e kelime ka Vuzavaguɗu, ama Vuzavaguɗu u wi punu a̱ wunla̱i wa ba. Ana wunla̱i u kotsoi, ɗa iɗika i jengeɗei, ama Vuzavaguɗu wi punu feu ba. 12 Ana iɗika i kotsoi ku jengeɗe, ɗa akina a̱ cipa̱i, ama Vuzavaguɗu wi punu akina a ba. Ana akina o kotsoi, ɗa a panai ka̱la̱ka̱tsu e yemeni. 13 Ana Iliya u panai ka̱la̱ka̱tsu, ɗa u palai a̱shi a̱ ni m motogu ɗa wu uta̱i pulai u shamgbai utsutsu wu una̱ kaɓatsu wa.

Ɗa u panai Ka̱la̱ka̱tsu ka danai ni, <<Iliya, yiɗa̱i vi a kuya'an na?>>

14 Ɗa wu ushuki u danai, <<Vuzavaguɗu Ka̱shile Mala'imili, mi ta̱ cishe'e adama a̱ nu ayin tutu. Ama aza a Isaraila a iwan ta̱ uzuwakpani u nu, a̱ fa̱da̱i katalikalyuka ka̱ nu, ɗa unai eneki a̱ nu n kotokobi. Mpa ɗa koci m buwai, ɗa a cigai ku una mu.>>

15 Ɗa Vuzavaguɗu u danai ni, <<Ɗa̱nga̱, vu bono n uye u na vu tuka̱i, o kubana e meremune ma Dimaska. Vu yawa baci ɗe, ka̱ta̱ vu erengu Haziyelu, wo okpo mogono ma Siriya. 16 Ka̱ta̱ kpamu vu erengu Jehu kolobo ka Nimishi, wo okpo mogono mi Isaraila, n Ilisha kolobo ka Shafatu vuza aza a Ebelu-mehola, wo okpo keneki una̱ u nu. 17 Jehu wi ta̱ a ku una vuza vu na dem u la'akai ukpa̱'a̱ u kotokobi ka Haziyelu, Ka̱ta̱ Ilisha tamkpamu wu una vuza vu na dem u la'akai ukpa̱'a̱ u kotokobi ka Jehu. 18 N nannai dem, mi ta̱ a̱ kuka̱sa̱kpa̱ uma a̱kpa̱n e cindere (7,000) n wuma punu a Isaraila, aza a na a iwain ku kuɗa̱nku ka̱ma̱li ka Balu, ɗa kpamu a iwain ku oɓongu ka̱ma̱li ka.>>

19 Ɗa Iliya u ɗa̱nga̱i ɗa u ka̱na̱i uye, ɗa u cinai Ilisha kolobo ka Shafatu, vuza vu na wi a vicimba n anaka ugboku kupa n e re. Kpamu a̱yi n ka kupa n ka ire ka. Ɗa u yawai ɗevu n a̱yi ɗa u taɗuku ni motogu ma̱ ni. 20 Ɗa u ka̱sukpa̱i anaka a̱ ni ɗa u sumai u tonoi Iliya, ɗa u danai, <<Ka̱sukpa̱ mu bi'i m bana m pecemgbenei n esheku a̱va̱ n a̱na̱ku a̱ va̱, ka̱ta̱ yeve m bono n tono wu,>> Ɗa Iliya wu ushuki u danai,

<<Kpatala, mpa yiɗa̱i n ya'ankai nu?>>

21 Ɗa Ilisha u ka̱sukpa̱ ni u bonoi u remei anaka a na wi a vicimba n aɗa u kiɗai, u su'wain inyama ya nu nɗanga ma ogboro ma, ɗa u pecekei uma a takumai. Ɗa yeve u ka̱na̱i uye u banai u cinakai Iliya. Ɗa wu okpoi ka̱ɓa̱nki ka̱ ni.