Katagarda ka 1 Samaila
Kuɓa̱yuwa̱
A̱ ciya̱ kuyeve ku vuma vu na u ɗanai katagarda ka nampa ba. Ama tsu na o tonoi ene e yeve ta̱ vuza na u ɗanai katagarda ka nampa ka, u yongo ta̱ n wuma ana ili i nampa i gita̱i. Katagarda ka ugiti ka Samaila ki ta̱ a kadanshi tsu na saba'i tsugono ili i na i ɗikai azafada a kubana a ngono a tsumani ci Isaraila. E kece uma a tatsu aza a na a ya'in ulinga u nanlo. Uma a ele ɗa, Samaila kaya'inkafada ka ukocishi a̱ ka̱tsuma̱ ka aya'infada a gbagbain a Isaraila, Shawulu a̱yi ɗa mogono ma ugiti ma aza a Isaraila, n Dawuda vuza na wu unai Goliya vuza va aza a Filisitiya, ɗa wo okpoi mogono a na Shawulu u kuwa̱i.
Katagarda ka ki ta̱ a kadanshi tsu na a zuwai tsugono ci Isaraila. Ushuku ta̱ Vuzavaguɗu n ka̱ci ka̱ ni a̱yi ɗa mogono mi Isaraila, ama a na a̱ la̱nsa̱i e neke le mogono a zuwaka le mogono, ɗa Vuzavaguɗu u zagbakai le mogono. Ili i kindana ko i gbayin a̱ ubuta̱ u nampa ɗaɗa, mogono n uma, vuza vu uciyi ko vuza vu unambi, i ta̱ a̱ ka̱tsuma̱ ka atakaci a̱ Ka̱shile ɗa baci a iwain kutono yi 2:7-10.
Ili i na yi punu
A matsai Samaila n ugiti u tsugono ci ni 1:1; 7:17
Shawulu wo okpoi mogono 8:1; 10:27
A̱ya̱ a ugiti o tsugono tsu Shawulu 11:1; 15:35
Dawuda n Shawulu 16:30-31
Ukpa̱ u Shawulu m muku mo olobo n ni 31:1-13
1
A matsai Samaila
1 Vuma yoku wi ta̱ lo a kumaci ku Ifirayimu, vuza kula Elikana. Wi ta̱ ida̱shi a Rama a iɗika yi nsasan n Ifirayimu. A̱yi maku ma Jeroham ma'a, matsukaya ma Elihu, a̱ ka̱tsuma̱ ka kpa'a ku Tofu a kumaci ku Zufa. 2 Wi ta̱ n a̱ma̱ci ere, vuza te e ci ɗeke yi ta̱ Hanatu, vuza te kpamu e ci ɗe ke yi ta̱ Peninna, a̱yi Peninna u matsa ta̱ muku ama Hanatu u ciya̱ maku ba. 3 Ka̱ya̱ dem, Elikana u tsu ka̱sukpa̱ ta̱ likuci i ni Rama u bana a Shilo adama a na u ya'anka Vuzavaguɗu Mala'imili alyuka, ka̱ta̱ u cikpa yi kpamu. Olobo e re e Eli, Hofini n Finehas, ele ɗa anan ganu a Vuzavaguɗu ɗe. 4 A kanna ka na de dem Elikana u kuneke alyuka a̱ ni, u tsu neke ta̱ Peninna n muku n ni, olobo nu nkere, yaba dem n ugboku u ni. 5 Ama u ci neke ta̱ Hanatu ugboku ute u gbayin, adama a na u ciga yi ta̱ ka̱u, ama Vuzavaguɗu u neke yi limata ba. 6 Sheku vi ni Peninna u tsu pa'in yi ta̱ una̱ ayin dem, ciya̱ u pana wupa ka̱u, adama a na Vuzavaguɗu u sa̱nka̱ yi ta̱ limata. 7 Ta a̱ ka̱na̱i kuya'ansa nannai a̱ ka̱ya̱ dem, ayin a na baci de dem a banai adama a na a cikpa Vuzavaguɗu, ka̱ta̱ Peninna sheku vu Hanatu u giva yi ali u shika̱ u iwan kulya'a ilikulya'a. 8 Ɗa vali vi ni Elikana wu ecei ni, <<Hanatu yiɗa̱i i zuwai ɗa vi a̱ ma̱shi? Yiɗa̱i i sa̱nka̱i nu kulya'a ilikulya? Yiɗa̱i ɗa vu na̱mgba̱i ka̱tsuma̱? Mpa n la'a muku mo olobo kupa wu a̱ nu ba?>>
Hanatu n Eli
9 Kanna ke te ana o kotsoi kulya'a n kuso'o a Shilo, ɗa Hanatu u ɗa̱nga̱i. A makyan ma nanlo tana Eli Ganu lo ida̱shi a̱ utsutsu wa̱ A̱'isa̱ a gbayin. 10 Hanatu n ka̱tsuma̱ ku una̱mgbi u ka̱ɗu ka̱u, ɗa u shika̱i n u vasai u Vuzavaguɗu. 11 Hanatu u kucina ta̱ u danai, <<Vuzavaguɗu Mala'imili dem, vu inda baci atakaci a kagbashi ka̱ nu ɗa vu ciɓai nu mpa, vu cinukpa nu mpa ba, ɗa vu nekei mu maku, mpa n kuneke ta̱ ma'a u Vuzavaguɗu a ayin a wuma u ni ra̱ka̱, kutanu kpamu ka ku sa'awa kaci ka̱ ni ba.>>
12 Ana u lya'i kelime n kuya'an kavasa u vuzavaguɗu, ɗa Eli u zukai n una̱ u ni. 13 Hanatu u ka̱na̱i kavasa punu a̱ ka̱ɗu ka̱ ni, nlebu mu una̱ n ni izumgbi ama a pana ka̱la̱ka̱tsu ka̱ ni ba. Ɗa Eli u sheshei u so'o ta̱. 14 Ɗa Eli u danai ni, <<Yiɗa̱i i zuwai vu so'i ma̱ra̱ ali ma makai nu nannai? Ka̱sukpa̱ kuso'o ma̱ra̱.>> 15 Ɗa Hanatu u danai, <<Vuzagbayin va̱ ta nannai ba, mpa vuka ɗa vu una̱mgbuka̱tsuma̱ ka̱u. Mpa n tsuso'o ma̱ra̱ ko ili i yoku i na i kumaka mu ba, ama mi ta̱ a kudana Vuzavaguɗu ili i na yi a̱ ka̱ɗu ka̱ va̱ ra̱ka̱. 16 Ka̱ta̱ vi ɗika mu mpa vuka vu wasasa ɗa mi ba. Ayin a nampa de dem mi ta̱ a kavasa adama a i na yi a kulya'a mu ka̱ɗu.>> 17 Ɗa Eli u danai ni,<<Wala m ma̱ta̱na̱, ya'an Ka̱shile ki Isaraila ka̱ ushuku avasa a na vi a kuya'an wu a̱ni.>> 18 Ɗa Hanatu wu ushuki u danai ni,<<Ya'an kagbashi ka̱ nu ka̱ ciya̱ mapasa ma singai wa̱ nu.>> Ɗa Hanatu u lazai u banai u lya'i ilikulya'a, u doku u na̱mgba̱ ka̱tsuma kpamu ba.
19 Kanna ke ire n usana ka̱u Elikana n limata i ni a̱ ɗa̱nga̱i a cikpai Vuzavaguɗu, ɗa a lazai o kubono a i'uwa i le a Rama. Elikana u vaki n vuka vi ni Hanatu. Ɗa Vuzavaguɗu ta na u ciɓai n a̱yi. 20 Ana i lo ɗa Hanatu u ciya̱i ka̱tsuma̱ ɗa u matsai maku mo kolobo, ɗa u ne'i ni kula Samaila, ɗaɗa, <<N folono yi ta̱ u Vuzavaguɗu.>>
Erengi Samaila u Vuzavaguɗu
21 Ana ka̱ya̱ ko bonoi, ɗa Elikana n limata i ni a banai a Shilo adama a na e neke alyuka u Vuzavaguɗu tsu na a kiwanai, ka̱ta̱ kpamu u shatangu uzuwakpani na akucina a na u na u ya'in. 22 Ama a ayin a nampa Hanatu u bana ba, ama ɗa u danai vali vi ni, <<N kasa baci maku ma mi ta̱ a̱ kutuka̱ yi u Vuzavaguɗu, adama a na u da̱sa̱ngu ɗe a ayin a wuma u ni dem.>> 23 Ɗa Elikana u danai ni,<<Ya'an ili i na i ga'an nu, vana ali ayin a na vu kasai ni mani, ya'an Vuzavaguɗu u shatangu kadanshi ka̱ ni,>> Hanatu u shamgbai a kpa'a o kuwo'o maku ma̱ ni ali u kasai ni mani. 24 Ana u kasai ni mani, ɗa u ɗikai ni koɓolo n kobomburon ka̱ a̱ya̱ a tatsu, n kapara ka kiya, m ma̱diki ma̱ ma̱kya̱n, ɗa u bankai ni a kpa'a ku Vuzavaguɗu a Shilo. 25 Ana a kiɗai kobomburon ka, ɗa a bankai m maku ma u Eli. 26 Ɗa Hanatu u danai Eli,<<Vuzagbayin vu va̱, vu ciɓa nu mpa ba? Mpa ɗa vuka vu na vu sa'wai kushamgba e kelime ka̱ nu a kuya'an kavasa u Vuzavaguɗu. 27 Maku ma nampa ma'a n folonoi u Vuzavaguɗu, kpamu u pana ta̱ ufolu u na n ya'in wa̱ ni. 28 Adama nannai mi ta̱ e kuneke yi u Vuzavaguɗu a ayin a wuma a̱ ni dem, wokpo maku ma Vuzavaguɗu.>>
Ɗa a cikpai Vuzavaguɗu ɗe a ubuta̱ wa.