1 Ɗa Nahashi mogono ma aza a Amona ma banai ma kambuki likuci i Jabeshi-giliyadu n kuvon. Ɗa ali aza a Jabeshi ra̱ka̱ a danai ni, <<Ya'an uzuwakpani n a̱tsu ka̱ta̱ tsu tono wu.>> 2 Ama ɗa mogono Nahashi wu ushuki le u danai,<<N kuya'an ta̱ uzuwukpani n a̱ɗa̱ adama a ili i te koci, u na n kuzuwa o ko'o ka̱shi ku usingai ka yaba dem.*11:2 Toɗo ka̱shi ku usingai. Aza a Isaraila i ta̱ ulinga n ka̱shi ku singai a̱ ubuta̱ u ku tawa kaya'a. Kutoɗo ku ka̱shi ku singai wi ta̱ a kadanshi i a kufuɗa kuya'an kuvon n utan ba. Na lo wo okpo ta̱ ili i wono. Nannai ɗa n kuzuwa aza a Isaraila ra̱ka̱ a pana wono.>> 3 Ɗa nkoshi m gba̱ra̱-gba̱ra̱ n Jabeshi mu ushuki n danai,<<Neke tsu ayin e cindere adama na tsu suku n akaka a iɗika yi Isaraila ra̱ka̱, ɗa baci tsu ciya̱i vuza na wa ku isa tsu ba, to ci ta̱ e kuneke utan.>> 4 Ana aza a usuki a a yawai Gibiya n kadanshi ka a̱ ubuta̱ u na Shawulu wi, ɗa a dansai ka'a a̱ ubuta̱ u uma, ɗa uma a̱ shika̱i ka̱u.

5 Ɗa u ya'in aga'in derere n ayin a na Shawulu u bonoi n kashina, n anaka a vicimba a̱ ni, ɗa we ecei u danai, <<Yiɗa̱i i ciya̱i uma a ɗa i a̱ ma̱shi?>> Ɗa o bonokoi ni ukuna wa aza a Jabeshi. 6 Ana Shawulu u panai uteku tsu na a dansai, ɗa ayinviki a Vuzavaguɗu a̱ cipa̱i wa̱ ni n utsura, ɗa wupa u ka̱na̱i ni. 7 Ɗa wu unai anaka a vicimba e re a̱ ni ɗa u kiɗasai le akiɗi-akiɗi, ɗa u nekei aza a suki e pecuku a̱ ubuta̱ wa aza a Isaraila ra̱ka̱. U danai, ubuta̱ u na baci a banai dem o yotsongu inyama ya a dana, <<Vuza na baci de dem u kpa̱ɗa̱i ku uta̱ ku ɓa̱nka̱ Shawulu n Samaila kuvon ta a kuya'an nannai n anaka a̱ ni.>>Ana uma a panai nannai ɗa wovon u Vuzavaguɗu u ka̱na̱i aza a Isaraila ka̱u, ɗa ali ra̱ka̱ uta̱i n ku te. 8 Ana Shawulu u ɓolongi le a Bezeki, ɗa a̱ ciya̱i aza a Isaraila uma a̱kpa̱n amangatawantatsu (300,000), aza Yahuda kpamu uma a̱kpa̱n kamangankupa (30,000). 9 Ɗa a danai aza a̱ usuki a na a̱ ta̱wa̱i va, <<Banai i dana aza a Jabeshi vu Giliyadu, <Makpa'a kafu kanna ka suɗukpa, i ta̱ a ki isa ɗa̱.> >> Ana aza a Jabeshi a panai akaka a nampa, ɗa a ya'in ma̱za̱nga̱ ka̱u. 10 Ama ɗa a danai aza a Amona,<<Makpa'a ci ta̱ a̱ kuta̱ tsu neke utan, ka̱ta̱ i ya'anka tsu uteku tsu na i cikalai.>> 11 Ana kayin ka asai ɗa Shawulu u pecuki uma a̱ ni ugboku u tatsu, ana ubuta̱ u yimba̱na̱i ɗa a banai a kambuki a̱pa̱m aza a Amona, ɗa a̱ ka̱na̱i kuna le ali kanna a kaci. Kenu vu na a la'akai a̱ ka̱tsuma̱ ke le ɗa a wacuwai, yaba dem ende'en ni.

12 Ɗa uma a banai u Samaila ɗa a danai ni, <<Teɗai aza a na a ya'in kadanshi ka a danai, <Adama a̱ yiɗa̱i Shawulu u kulya'aka tsu tsugono?> Utuka̱i tsu n ele tsu una le.>> 13 Ama ɗa Shawulu u danai, <<Babu vuza na a kuna anana, adama a na anana ɗa kanna ka na Vuzavaguɗu wi isai aza a Isaraila.>> 14 Ɗa Samaila u danai uma a, <<Ta̱wa̱i tsu banai a Giliga adama na tsu doku tsu yeve an Shawulu a̱yi ɗa mogono mayun.>> 15 Ɗa uma ra̱ka̱ a banai a Giliga, ɗa e yevei an Shawulu ɗa mogono ma mayun e kelime ka Vuzavaguɗu. Ɗa e nekei alyuka a̱ ma̱ta̱na̱ u Vuzavaguɗu. Ɗa Shawulu koɓolo n uma ra̱ka̱ a ya'in ma̱za̱nga̱ n a̱bunda̱i.