1 Ɗa Shawulu u danai maku ma̱ ni Janata koɓolo n aza a ulinga a̱ ni, a una Dawuda. Ama Janata u ciga ta̱ Dawuda ka̱u, 2 Ɗa u danai ni, <<Esheku a̱ va̱ Shawulu wi ta̱ a̱ kula̱nsa̱ uye u na u kuna wu. Adama a nannai, vu zuka mayin makpa n usana, vu ciya̱ ubuta̱ u na vu sheɗeki. 3 Mpa n kubana ta̱ ka̱ta̱ n shamgba koɓolo n Esheku a̱ va̱ ɗe a kakamba ka na vi va. Ka̱ta̱ n ya'anka yi kadanshi ka̱ nu, i na baci m panai dem mi ta̱ o kutonuko wu.>> 4 Ɗa Janata u dansai ukuna u singai adama a Dawuda u Shawulu esheku a̱ ni, u danai, <<Mogono ka̱ta̱ vu takacika kagbashi ka̱ nu Dawuda ba, adama na a̱yi u nusaka wu ba, kpamu i na u ya'in i ɓa̱nka̱ wu ta̱ n a̱bunda̱i. 5 U neke ta̱ wuma u ni a ayin na wu unai Goliya. Ɗa Vuzavaguɗu ta na u nekei aza a Isaraila ulya'i u gbayin. Avu feu a na ve enei ili i nampa ya vu ya'an ta̱ ma̱za̱nga̱. Yiɗa̱i i kuzuwa vu takacika Dawuda vuza babu unushi ali vu una yi gbani?>> 6 Ɗa Shawulu u panai kadanshi ka na Janata u dansai, ɗa u ya'in akucina u danai, <<Vuzavaguɗu wi baci de n wuma, a kuna Dawuda ba.>>

7 Ɗa Janata u ɗekei Dawuda ɗa u danai ni ili i na Shawulu u dansai ra̱ka̱. Ɗa u bankai ni u Shawulu. Ɗa Dawuda u lya'i kelime n kuya'anka Shawulu ulinga uteku tsu na u kiwanai.

8 Ɗa kuvon ku doku ku ɗa̱nga̱i n aza a Isaraila n aza a Filisitiya, ɗa Dawuda wu uta̱i u ya'in kuvon n aza a Filisitiya wu unai le n a̱bunda̱i, ali aza a na buwai a sumai. 9 Kanna ke te Shawulu ida̱shi a kpa'a ku ni, a̱yi uka̱ni m masara, ɗa wunla̱i u gbani-gbani u Vuzavaguɗu u uwai ni. Dawuda ta na a kuwa'a umolu u ni, 10 ɗa Shawulu u sheshei u sovo yi u gbaɓa n kasaka, ama ɗa Dawuda u werei. Yeve ɗa masara ma lazai ɗa mo sovoi mashilya. N kayin ka nanlo ka ɗa Dawuda u sumai ɗa u la'akai n wuma u ni.

11 Ɗa Shawulu u suki uma a bana a inda kpa'a ku Dawuda adama a na a̱ ciya̱ a una yi n usana. Ama ɗa Makelu vuka vu Dawuda u danai ni, <<Ɗa baci vu sumai n kayin ka nampa adama a wuma u nu ba, makpa n usana vi ta̱ a̱ kukuwa̱>> 12 Ɗa Makelu u pusa̱ta̱ngi Dawuda n katusu, u sumai ɗa u la'akai. 13 Ɗa Makelu u ɗikai ka̱ma̱li ɗa u va'ankai a kajiba, ɗa u zuwai cileme tsu nraɗika a uɓon u kaci ɗa u palai ka'a n akashi. 14 Ana Shawulu u suki agbashi a̱ ni a bana a̱ ka̱na̱ Dawuda, ɗa Makelu u danai, <<Wi gbaga ba.>> 15 Ɗa Shawulu u doku u suki agbashi a o bono ɗe a̱ ciya̱ e ene Dawuda n a̱shi e le. Ɗa u danai le, <<Tuka̱i ni na n kajiba ka̱ ni adama a na mu una yi.>> 16 Ama ana agbashi a uwai a kpa'a ku Dawuda ka, ɗa a cinai ka̱ma̱li uva'anki a kajiba, kpamu a uɓon u kaci a cinai ɗe cileme tsu nraɗika. 17 Ɗa Shawulu u danai Makelu, <<Yiɗa̱i i zuwai ɗa vu doroi mu nannai, vu zuwai vurala vu va̱ u suma adama na u la'aka?>>

Ɗa Makelu wu ushuki u danai ni, <<Dawuda u dana ta̱ ɗa baci n ka̱sukpa̱i ni u lazai ba, wi ta̱ a kuna mu.>>

18 Ɗa Dawuda u sumai u la'akai, ɗa u lazai a kubana a Rama a̱ ubuta̱ u Samaila ɗa u danai ni ra̱ka̱ i na Shawulu u ya'ankai ni. Ɗa a̱yi va koɓolo n Samaila a lazai a kubana a Nayotu ɗa o yongoi ɗe. 19 Ɗa a danai Shawulu, <<Dawuda va wi ta̱ ɗe a Nayotu a Rama.>> 20 Ɗa u suki agbashi a bana e reme yi. Ama ana a yawai ɗa cinai koɓolo ka eneki a kuya'an kene, Samaila ta na lo kashani e kelime ke le. Ɗa Ayinviki a̱ Ka̱shile a̱ cipa̱i wa aza a usuki a Shawulu a, ɗa ele feu a ya'in kene. 21 Ana Shawulu u panai ka'a ɗa u suki aza o yoku, ɗa ele feu a̱ ka̱na̱i kuya'an kene. Ɗa Shawulu kpamu u doku u suki agbashi tatsu, ɗa ele feu a̱ ka̱na̱i kuya'an kene. 22 A ukocishi ɗa a̱yi n ka̱ci ka̱ ni u banai a Rama. Ana u yawai derere vu kayinva ka gbayin ka̱ likuci i Seku, ɗa we ecei, <<Ubuta̱ u na Samaila n Dawuda i?>> Ɗa a danai ni, <<I ta̱ ɗe a Nayotu a iɗika i Rama.>> 23 Ɗa Shawulu u banai Nayotu ɗe a Rama. Ɗa Ayinviki a̱ Ka̱shile a̱ cipa̱i wa̱ ni feu ɗa u ka̱na̱i kuwala n u ya'in kene, ali sapu na u yawai a Nayotu. 24 Ali u foɗoi aminya a̱ ni, u ka̱na̱i kuya'an kene e kelime ka Samaila. U vaki koshomboɗi kanna ka̱ɓa̱la̱ n kayin feu. Ta ɗe kansa ka nampa ka ka ɗa̱nga̱i, ka na a tsu dana, <<Shawulu feu keneki ka'a?>>