1 A ukocishi u ka̱ya̱ ka kamanga, a na Sulemanu u ya'in a̱yi a kuma'a A̱'isa̱ a gbayin a Vuzavaguɗu n kefeku ka̱ ni, 2 ɗa Sulemanu u doku u ma'asakai likuci-likuci i na Hiram u neke ni, ɗa u zuwai aza a Isaraila a̱ da̱sa̱ngu punu a̱ likuci ya. 3 Ɗa Sulemanu kpamu u banai u lya'i likuci i Hamatu-zoba n kuvon ɗa wu isai i ɗa. 4 Ɗa u ma'i likuci i Tadamoru u na wi a meremune, koɓolo n likuci i kuzuwa a uɓon u Hamatu ra̱ka̱. 5 Ɗa kpamu u ma'i likuci i Betu-horon vu a ka gaɗi, n Betu-horon vu na vi a̱ ka̱ɗa̱ka̱i, u bonokoi le likuci ni yi ukanji, n asaka a gbagbain n aburakpatsu, 6 ɗa kpamu u ma'i likuci i Balata n likuci yi mpon n ubuta̱ wi ili i kuzuwa i ni ra̱ka̱, n likuci yi ekeke odoku a̱ ni n odoku a̱ ni dem, ɗa u ma'in ili ra̱ka̱ i na u cikalai a Urushelima n Lebano n uteku wu uɓon u tsugono u ni ra̱ka̱.

7 Kumaci ku na ku buwai a iɗika ya, aza a na i aza a Isaraila a ɗa ba, ɗaɗa aza a Hitiya n aza a Amoriya n aza a Periziya n aza a Hiviya n aza a Jebusiya, 8 ele ɗa kumaci kuna ku buwai a iɗika ya, aza a na aza a Isaraila unai ba, ɗa Sulemanu u zuwai le ulinga u tsugbashi u na i a kuya'an yi ali anana. 9 Ama u zuwa vuza vi Isaraila tsugbashi ba, ɗa u bonokoi le okpo osoji a̱ ni n aza e kelime osoji n aza e kelime e keke odoku n akumbi odoku a̱ ni. 10 Ɗa kpamu okpoi aza a̱ gba̱ra̱-gba̱ra̱ o mogono ma Sulemanu, ka̱bunda̱i ka aza a na i o kutono aza a ulinga ele ɗa uma amangatawenre n a tawun (250).

11 Ɗa Sulemanu u tuka̱i n vuka vi ni mekere ma Firi'auna ɗe a̱ likuci i Dawuda ɗa u bonoko ni a kpa'a ku na u ma'akai ni, adama a na u dana ta̱, <<Vuka vu va̱ vi a kuda̱sa̱ngu e kefeku ka Dawuda mogon mi Isaraila ba, adama a na ubuta̱ u na baci akpati vu uzuwakpani vu Vuzavaguɗu va a uwai dem ubuta̱ u ciɗa u ɗa.>> 12 Ɗa Sulemanu u ya'in kune'e ku kusongu u Vuzavaguɗu a katalikalyuka ka na u ma'akai Vuzavaguɗu e kelime ka̱ utsutsu ka̱ A̱'isa̱ a gbayin a, 13 U ya'in kune'e ku kusongu ku kanna dem tsu na wila̱ u Musa u dansai, i ta̱ e kuneke alyuka a kanna ka Ashibi n kune'e ku wotoi usavu n ka̱ɗiva̱ ka tatsu a̱ ka̱ya̱, ɗaɗa ka̱diva̱ ko boroji vu babu yisiti, n ke kuden n ka̱ a̱pa̱m. 14 Tsu na Dawuda esheku a̱ ni o tonoi, ɗa u zagbai anan ganu ka̱tsura̱-ka̱tsura̱ tsu na a kuya'an ulinga u le, ɗa u zuwai aza e Levi adama a kucikpa a̱ ɓa̱nka̱ anan ganu n ulinga u kanna dem. Ɗa kpamu u zuwai aza a kindi ku kefeku a utsutsu dem, adama a na ta Dawuda vuma Ka̱shile u dansai nannai. 15 Anan ganu n aza e Levi a ya'in nannai, a kpatalai a̱ ka̱sukpa̱i ili i na mogono ma danai a ya'an ba, ko a̱ ubuta̱ wu ulinga wu mpon ba.

16 Ta Sulemanu u kotsoi ulinga u kuma'a ka̱ A̱'isa̱ ka nannai, ili i na i ɗikai a kanna ka na a varai kuma'a ka ali a kubana a ukocishi wa̱ A̱'isa̱ a gbayin a Vuzavaguɗu. Ta o kotsoi kuma'a ka̱ A̱'isa̱ a gbayin a Vuzavaguɗu nannai.

17 Ɗa Sulemanu u banai Eziyon-gebe n Ilatu, likuci i na yi a̱ ka̱kina̱ ka mala, a iɗika i Edom. 18 Ɗa Hiram u su'uki Sulemanu n antsu a̱ mini n antiki e le, aza a na a fuɗai mini mayin. Aza a ulinga a Hiram n aza a Sulemanu a banai a Ofiri a̱ tuka̱i n mogono Sulemanu n azanariya a na a̱miki e le a yawai kilo a̱kpa̱n kupa n a tawun (15,000).