1 Jowashi wi ta̱ n a̱ya̱ e cindere a na u lya'i tsugono, ɗa u lya'i tsugono tsu Urushelima a̱ya̱ amangere. Kula ka̱ a̱na̱ku a̱ ni ku ɗa Zibiya, vuza vu Biyasheba. 2 Ɗa Jowashi u ya'in i na i ga'in a̱ a̱shi a Vuzavaguɗu a ayin a na ganu Jehoyida u yongoi n wuma ra̱ka̱. 3 Ɗa Jehoyida u zamakai Jowashi a̱ma̱ci e re, ɗa a matsakai ni nkere n olobo. 4 Kanna ko yoku ɗa Jowashi u sheshei a na wa ku lapulusuka A̱'isa̱ a gbayin a Vuzavaguɗu. 5 Ɗa u ɗekei anan ganu n aza e Levi ra̱ka̱ u danai le, <<Banai a̱ likuci ya Yahuda, ka̱ta̱ yi isa ikebe yi utafu i ka̱ya̱ dem wa aza a Isaraila, adama a na i lapula A̱'isa̱ a gbayin a̱ Ka̱shile ka̱ ɗa̱. I ya'an ka'a gogo na.>> Ama ɗa aza e Levi a iwain kuya'an ka'a gogo lo. 6 Ɗa mogono Jowashi u ɗekei Jehoyida ganu vu gbayin u dana ni, <<Yiɗa̱i i zuwai ɗa vu kpa̱ɗa̱i kuzuwa aza e Levi a bana a̱ likuci i Urushelima n ya aza a Yahuda isa utafu ba? U na Musa kagbashi ka Vuzavaguɗu ka danai, kpamu aza a Isaraila ushuku ta̱ o ɓolongu ikebe adama a na lapula ma̱va̱li mu uzuwakpani.>> 7 A̱ya̱ a na a lazai muku n vuka vu gbani-gbani vu nampa Ataliya o ɓoso ta̱ A̱'isa̱ a gbayin a̱ Ka̱shile ɗa a̱ pura̱i ucanuku u na erengi adama a kpa'a ku Ka̱shile, a ya'ankai ulinga a̱ ubuta̱ u kucikpa ka̱ma̱li ka Balu.

8 Ɗa mogono Jowashi u zuwai a ya'in akpati o yoku adama a na o ɓolongu ikebe, ɗa a ya'in akpati va a zuwai a̱ utsutsu wa̱ A̱'isa̱ a gbayin a Vuzavaguɗu. 9 Ɗa a salai ukuna wa a Yahuda n Urushelima, a danai le a̱ tuka̱ Vuzavaguɗu n utafu u na Musa kagbashi ka̱ Ka̱shile ka danai aza a Isaraila a̱ tuka̱ a makyan ma na i e meremune. 10 Ɗa nkoshi m gba̱ra̱-gba̱ra̱ n uma ra̱ka̱ a ka̱na̱i kutuka̱ n utafu u le n a zuwai punu akpati va n ma̱za̱nga̱ ali a shanai. 11 A makyan ma na baci akpati a shanai, aza e Levi a ci ɗika ta̱ a ɗa a banka a̱ ubuta̱ u vuza vu kelime vu na mogono ma zuwai u la̱na̱ a ɗa, a cina baci akpati a a shanai, ka̱ta̱ kaɗani ko mogono koɓolo n ganu vu gbayin a̱ tsuwa̱n i ɗa ka̱ta̱ a ɗika ka'a o bonoko n ka'a ɗe a̱ ubuta̱ wa. Ɗa a̱ ka̱na̱i kuya'an nannai ayin dem, ali o ɓolongi ikebe n a̱bunda̱i. 12 Ɗa mogono Jowashi n Jehoyida e nekei aza a̱ kula̱na̱ ulinga wa̱ A̱'isa̱ a gbayin a Vuzavaguɗu ikebe ya. Ɗa a ɗikai eshe'wi atali n eshe'wi a nɗanga adama a na a lapulusuka A̱'isa̱ a gbayin a Vuzavaguɗu, ɗa kpamu a ɗikai awakana a iyum i lima̱ n aza a iyum i shili adama a na a lapula A̱'isa̱ a gbayin a Vuzavaguɗu. 13 Ɗa aza a na a̱ kula̱na̱ ulinga wa a ya'in u ɗa n ka̱ɗu ke te, ɗa tana ulinga wa u lya'i kelime mayin. Ɗa a ma'asakai A̱'isa̱ a gbayin a̱ Ka̱shile a tsu na a ɗa ishi ɗa o doki a ɗa utsura. 14 Ana o kotsoi kulapulu ka, ɗa o bonokoi n kagimi ki ikebe ka u mogono n Jehoyida ganu, n ikebe i ɗaɗa a ya'ankai ucanuku wa̱ A̱'isa̱ a gbayin a Vuzavaguɗu, ucanuku wu ulinga adama e kuneke alyuka, ata'an n apara a na a ya'in n azanariya n azurufa. A̱ ka̱na̱i kuya'an alyuka o kusongu a kpa'a ku Vuzavaguɗu makyan dem a ayin a Jehoyida ganu. 15 Ɗa Jehoyida ganu u kutsai ka̱u, ɗa u kuwa̱i a̱yi n a̱ya̱ amangatawun n kamangankupa, (130). 16 Ɗa a̱ ciɗa̱ngi ni a̱ likuci i Dawuda a̱ ubuta̱ u na a̱ tsu ciɗa̱ngu ngono, adama a na u ya'an ta̱ kasingai adama a Isaraila m kpa'a ku Ka̱shile.

17 Ana Jehoyida u kuwa̱i, ɗa nkoshi m gba̱ra̱-gba̱ra̱ ma aza a Yahuda a̱ ta̱wa̱i ku kya̱sa̱ mogono Jowashi, ɗa a̱ kuɗa̱ngi a lya'akai ni kayala adama a na u ya'anka le ili i na a cigai ɗa tana mogono ma panakai le. 18 Ɗa a̱ ka̱sukpa̱i A̱'isa̱ a gbayin a Vuzavaguɗu Ka̱shile ka ikaya i le. ɗa o bonoi kutono a̱ma̱li a Ashera n a̱ma̱li a na a buwai. Ɗa Ka̱shile ka ya'in wupa n aza a Yahuda n Urushelima adama a unushi u le. 19 Ko n nannai Vuzavaguɗu u su'uku le ta̱ n eneki adama a na a ɓarangu le, ama ɗa a iwain kupana. 20 Ɗa ayinviki a̱ Ka̱shile a̱ cipa̱i u Zakariya kolobo ka Jehoyida ganu. Ɗa u shamgbai e mere ma uma ɗa u danai, <<Na ɗa ili i na Ka̱shile ka danai, <Yiɗa̱i i zuwai ɗa i kpa̱ɗa̱i kutono kadanshi ka Vuzavaguɗu? Adama nanai yi a kulya'a kelime ba. Adama a na i ka̱sukpa̱ ta̱ kutono Vuzavaguɗu, ɗa a̱yi feu u ka̱sukpa̱i ɗa̱.> >> 21 Ama ɗa mogono Jowashi u gbaɓai kaci nu nkoshi m gba̱ra̱-gba̱ra̱ una Zakariya. Mogono ma zuwai a varai ni punu a ulanga wa̱ A̱'isa̱ a gbayin a Vuzavaguɗu. 22 Mogono Jowashi u ciɓa n kasingai ka na Jehoyida ganu esheku a Zakariya a ya'anka yi ni ba, ama ɗa wu unai kolobo ka̱ ni, Zakariya a ku kasa ukpa̱ ɗa u danai,<<Ya'an Vuzavaguɗu wu indana ili i na yi a kuya'an ka̱ta̱ u tsupa ka mu.>>

23 Ana ilo a ukocishi u ka̱ya̱ wa, ɗa osoji aza a Siriya a̱ tuka̱i Jowashi n kuvon. A̱ ta̱wa̱i a Yahuda n Urushelima ɗa unai nkoshi m gba̱ra̱-gba̱ra̱ ra̱ka̱. Ɗa a̱ pura̱i ucanuku u uma n a̱bunda̱i ɗa a̱ su'uku yi mogono me le a Dimaska. 24 Ko a na wo okpoi osoji a Siriya a̱ ta̱wa̱ n a̱bunda̱i ba, ama Vuzavaguɗu u neke le ta̱ ulya'i wo osoji aza a Yahuda n a̱bunda̱i. Adama a na aza a Yahuda a̱ ka̱sukpa̱ ta̱ Vuzavaguɗu Ka̱shile ka ikaya i le, ta Jowashi u takacikai nannai. 25 Ana aza a Siriya a lazai, a̱ ka̱sukpa̱ ta̱ Jowashi n muna gbani-gbani. Ɗa aza e kelime ovonshi a gbaɓai kaci unai ni a kajiba ka̱ ni adama a na wu una ta̱ kolobo ka Jehoyida ganu. Ana u kuwa̱i ɗa a̱ ciɗa̱ngi ni a̱ likuci i Dawuda, ama a̱ ciɗa̱ngi a̱ ubuta̱ wu ngono ba. 26 Aza a na a gbaɓai unai ni ele ɗa, Zabadu kolobo ka vuka vi yoku vuza va aza a Amona vuza kula Shimeyatu, koɓolo n Jehozabadu kolobo ka vuka vu na e ci ɗeke Shimiritu mekere vuza va aza a Mowabu. 27 Arabali a̱ muku mo olobo n Jowashi, n kene ku na a ya'in adama a̱ ni, n arabali a ulinga u kulapula ka̱ A̱'isa̱ a gbayin a Vuzavaguɗu a na u ya'in, i ta̱ uɗani a katagarda ka arabali a ngono. Ɗa Amaziya kolobo ka̱ ni ko okpoi mogono a̱ una̱ u ni.