1 Mogono Josaya u ya'in ka̱ɗiva̱ ka kupasamgbanai u Vuzavaguɗu a Urushelima. A kanna ka kupa n ka̱ na̱shi ko wotoi u iyain, a kiɗai ma̱giri ma̱ ka̱ɗiva̱ ka kupasamgbanai. 2 Ɗa mogono Josaya u zuwai anan ganu a ya'an ulinga u le, ɗa kpamu u nekei le kadanshi a ya'an ulinga wa̱ A̱'isa̱ a gbayin a Vuzavaguɗu mayin. 3 Ɗa u nekei aza e Levi a na a tsu pi'isaka aza a Isaraila ra̱ka̱, n aza a na kpamu erengi adama a ulinga u Vuzavaguɗu, u danai <<Zuwai akpati vu uzuwakpani vu ciɗa a kpa'a ku Vuzavaguɗu ku na Sulemanu kolobo ka Dawuda mogono mi Isaraila u ma'in. Ka̱ta̱ i lya'a kelime n kuɗika vu ɗa avangatsu a̱ ɗa̱ a̱ kuka̱ra̱'a̱ka̱ ubuta̱ dem ba. Ka̱ta̱ i neke ka̱ci ka̱ ɗa̱ a̱ ubuta̱ u kutono Vuzavaguɗu Ka̱shile ka̱ ɗa̱ n uma a̱ ni aza a Isaraila. 4 I Pecuku ka̱ci ka̱ ɗa̱ tsu i'uwa yi ikaya i ɗa̱ ka̱tsura̱-ka̱tsura̱, tsu na a ɗanai n tsu na mogono Dawuda n kolobo ka̱ ni Sulemanu a dansai. 5 I shamgba a̱ ubuta̱ u ciɗa tsu na yi ka̱tsura̱-ka̱tsura̱ a kumaci ki ikaya ka̱ aza a̱ ɗa̱. Ciya̱ i ɓa̱nka̱ a kumaci ku na e nekei ɗa̱ a makyan ma na i a̱ ku tuka̱ n kune'e ku le A̱'isa̱ a gbayin. 6 Yi ta̱ kpamu a kukiɗa ma̱giri ma̱ ka̱ɗiva̱ ka kupasamgbanai, ka̱ta̱ yi erengu ka̱ci ka̱ ɗa̱ ciɗa, tsu na Vuzavaguɗu u danai Musa.>>

7 Ɗa Josaya u nekei ngiri a̱kpa̱n kamangankupa, (30,000). A kiɗa n ɗa adama a̱ ka̱ɗiva̱ ka kupasamgbanai. Ɗa kpamu u nekei obomburon a̱kpa̱n a tatsu (3,000). Nnama n nampa dem a ushiga u mogono u ɗa a ɗikai le. 8 Nkoshi m gba̱ra̱-gba̱ra̱ feu a̱ tuka̱i n kune'e ku ucigi u ka̱ɗu ku le u anan ganu n aza e Levi. Ɗa Hilikiya n Zakariya n Jehiyelu, aza a kindi ka̱ A̱'isa̱ a gbayin a Vuzavaguɗu e nekei anan ganu ngiri a̱kpa̱n e re n amangatawa̱nta̱li (2,600), adama a̱ ka̱ɗiva̱ ka kupasamgbanai n obomburom amangatawantatsu (300). 9 Ɗa aza e kelime aza e Levi, Konaniya n Shemaya n Netanelu n Hashabiya n Jeyiyelu n Jozabadu e nekei ngiri nu ngaji a̱kpa̱n a tawun (5,000) n obomburon amangatawantawun (500).

10 Ana o foɓusoi ili ra̱ka̱ i ka̱ɗiva̱ ka kupasamgbanai, ɗa anan ganu a shamgbai a̱ ubuta̱ u le, a shamgbai tsu na i kumaci-kumaci tsu na mogono ma danai. 11 Ɗa aza e Levi a kiɗai ngiri n ka̱ɗiva̱ ka kupasamgbanai, ɗa e nekei anan ganu mpasa ma a vishangi a katalikalyuka. Aza e Levi tamkpamu a kuminya nnama ma. 12 Ɗa a takpai kune'e ku kusongu ka adama a na e peceke uma tsu na i ka̱tsura̱-ka̱tsura̱ tsu na i kumaci-kumaci ki ikaya i le, adama a na a ya'anka Vuzavaguɗu kune'e, tsu na a ɗanai a katagarda ka Musa. Nannai ɗa feu a ya'in n obomburon a. 13 Ɗa aza e Levi a̱ zungi nnama n ka̱ɗiva̱ ka kupasamgbanai ka tsu na a danai. Ɗa a su'wain kune'e ku ciɗa a mgbodo, ebelyu nu nvene. Gogo lo ɗa utuka̱i a bankai uma ra̱ka̱ a takuma. 14 Ana o kotsoi ra̱ka̱, ɗa yeve aza e Levi a ya'ankai ka̱ci ke le n anan ganu ilikulya'a, adama a na anan ganu muku n Haruna i ta̱ ulinga ili yi usana ali a kubana kayin, a kuya'an alyuka o kusongu n ushuma wu nnama ma. 15 Aza a ishipa, ntsukaya n Asafa tamkpamu lo a̱ ubuta̱ u na a zuwai le, tsu na Dawuda u dansai. Asafa n Heman n Jedutun keneki ko mogono, n aza kindi a utsutsu dem, a̱ ka̱sukpa̱ ubuta̱ wu ulinga u le ba, adama aza e le aza e Levi a ya'anka le ta̱ ɗe ilikulya'a i ka̱ɗiva̱ ka kupasamgbanai ka.

16 Ta o foɓusoi ukuna u ka̱ɗiva̱ ka Vuzavaguɗu a kanna ka nanlo ka, adama a na a ya'an ka̱ɗiva̱ ka kupasamgbanai, kpamu a ya'an lyuka a katalikalyuka ka Vuzavaguɗu, tsu na mogono Josaya u danai. 17 Aza a Isaraila a na i a Urushelima a ya'an ta̱ ka̱ɗiva̱ ka kupasamgbanai ka n ele, n ka̱ɗiva̱ ko boroji vu babu Yisiti ali ayin e cindere. 18 Ili i na i ɗikai a ayin a Samaila a sa'wa kuya'an ka̱ɗiva̱ ka kupasamgbanai tsu nampa ba. A sa'wa kuciya̱ mogono mi Isaraila ma na ma ya'in ka̱ɗiva̱ ka kupasamgbanai tsu na Josaya n anan ganu n aza e Levi n aza na i punu ida̱shi a Urushelima n uma a Yahuda n Isaraila ra̱ka̱ a ya'in ba. 19 A ka̱ya̱ ka kupa n kunla̱i ko tsugono tsu Josaya ɗa aya'in ka̱ɗiva̱ ka kupasamgbanai ka.

20 Ana ka nampa ko kotsoi dem, ana Josaya u kotsoi kulapula A̱'isa̱ a gbayin a Vuzavaguɗu, ɗa Neko mogono ma Masar u ɗa̱nga̱i n osoji a̱ ni adama a na u banka Karikemishi vu uɓon u kuyene ku Yufiretu kuvon. Ɗa Josaya wu uta̱i adama a na u shilika̱ n a̱yi. 21 Ama ɗa mogono Neko u suki azusuki n akaka a kubana u mogono Josaya, u danai,

<<Yiɗa̱i i burai nu, nu mpa avu mogono ma Yahuda? Mpa n ta̱wa̱ kuya'an vishili n avu a makyan ma nampa ba. Ama mi ta̱ a kubana kuya'an vishili n iɗika i na yi a tsurala nu mpa ɗa. Kpamu Ka̱shile ka dana mu ta̱ n ya'an moloko. Adama a nannai ka̱ta̱ vu ya'an tsurala n Ka̱shile ka na ki koɓolo nu mpa ba, adama a na ka̱ta̱ u una wu ba.>> 22 Ama n nannai dem Josaya u iwain kupana kadanshi ka na Ka̱shile kadansai a̱ una̱ u mogono Neko. Ɗa kucikpa u banai n osoji a̱ ni kuvon a uɓon wa̱ a̱pula̱ka̱ a̱ likuci i Magido. Ɗa u foɗoi motogu mo tsugono ma̱ ni u zuwai adama a na e yeve yi ba, ɗa u uwai kuvon. 23 Ele a̱ ka̱tsuma̱ ko kuvon, ɗa kaya'a ko kosoji ka aza a Masar ka tawai mogono Josaya. ɗa u danai ovonshi a̱ ni, <<Uta̱ka̱i mu punu na, adama a na a uka mu ta̱ muna wuya-wuya.>> 24 Ɗa ovonshi a̱ ni utuka̱i ni ekeke vo kodoku ka̱ ni, ɗa a zuwa ni ekeke vu kodoku ko yoku. Ɗa o bono n a̱yi a Urushelima ɗa u kuwa̱i. Ɗa a̱ ciɗa̱ngi ni a̱ ubuta̱ u na a ci ciɗa̱ngu ngono. Ɗa aza a Yahuda ra̱ka̱ n aza a Urushelima a ya'in kpalu adama a Josaya. 25 Ɗa keniki Irimiya u zuɓa̱i vishipa vu kpalu adama a Josaya, vu na ali anana ali n a̱ma̱ci a ci ya'ansa adama a̱ ukpa̱ u ni. Vishipa vu na mpa va, vo okpo le ta̱ ili i kuya'an a Isaraila, vu ɗa vi ta̱ uɗani a katagarda ka kpalu. 26 Ulinga u na u buwai u Josaya n ulinga wu usuɓi u na u ya'in tsu na wi uɗani a̱ wila̱ u Ka̱shile, 27 Ulinga u ni ili i na i ɗikai a̱ ugiti ali a kubana a ukocishi, yi ta̱ uɗani a katagarda ko ngono mi Isaraila n ma Yahuda.