1 Kanna kete vuka vu keneki kete punu a̱ ka̱kuma̱ ke eneki u banai u Ilisha, u bankai ni n ma̱shi u danai, <<Kagbashi ka̱ nu vali va̱ u kuwa̱ ta̱. Vi yeve ta̱ a na vuza vu wovon u Vuzavaguɗu ɗa. Ama ɗanna vuza yoku na wi o kutono yi kutan u ta̱wa̱i kuɗika muku n e re n va̱ mo okpo agbashi a̱ ni.>>

2 Ilisha we ecei ni, <<Yiɗa̱i ma kuya'anka wu? Dana mu, yiɗa̱i vi ni i ɗa a kpa'a?>>

Ɗa u danai, <<Kagbashi ka̱ nu ki n ili a kpa'a ba sai kedele ka mani'in ma zaitu koci.>>

3 Ilisha u danai vuka va, <<Bana vu ka̱ra̱'a̱ aza a̱ nu, vu folono edele a mani'in a na i n ili ba, vu folono a ɗa n a̱bunda̱i. 4 Ka̱ta̱ vu uwa a̱ kunu, n muku mo olobo n nu, i gbagura utsutsu. Ka̱ta̱ i tsuwa̱n mani'in ma punu edele a. Kedele ka na baci ka shanai, i zuwai ka'a a kakanbu ka̱ta̱ i lya'a kelime n kutsungu.>>

5 Ɗa vuka va vu lazai. Ɗa u uwai a̱ kunu koɓolo n muku mo olobo n ni, ɗa a gbagurai utsutsu. A̱ gita̱i ku tsungu mani'in ma Zaitu ma, muku n ni a̱ kutusa̱ka̱ n edele, a̱yi n utsungi punu mani'in ma. 6 Ana edele a mani'in a shanai ra̱ka̱, ɗa u danai maku ma̱ ni, <<Tuka̱ n kedele ko yoku.>>

<<Ɗa u danai ni, babu kedele ko yoku.>> Ɗa mani'in ma ka̱sukpa̱i kutsuwa̱n.

7 Ɗa u banai u danai Ilisha vuma vu Ka̱shile, ɗa u danai vuka va, bana vu denge mani'in ma, ka̱ta̱ vu tsupa kutan ka, kagimi ka na ka buwai ka ɗaɗa ka̱ kuɓa̱na̱ wu n muku n nu.

8 Kanna kete Ilisha u banai a̱ likuci i Shunemu, a̱ ubuta̱ u na vuka vu uciyi vi yoku vi. Ɗa vuka va vu danai ni u ta̱wa̱ u lya'a ilikulya a kpa'a ku ni. Ɗa wo okpoi a makyan ma na baci wi a kupasamgbanai lo dem, u tsu shamgba ta̱ u lya'a ilikulya'a. 9 Ɗa u danai vali vu ni, <<Babu munla̱i vuma vu na u ta̱wa̱ na va vuma vu ciɗa vu Ka̱shile ɗa. 10 Ci ya'anka yi maku ma̱ kunu kenu zuva vu kpa'a kutsu, ka̱ta̱ tsu lapulaka yi kuɗa. Tsu zuwaka yi iva'ankpatsu n kirukpa n kakuba n ma̱kuni. Adama a na u ciya̱ ubuta̱ u kucipa̱ ɗa baci u ta̱wa̱i dem.>>

11 Kanna kete ana Ilisha u ta̱wa̱i a̱ likuci Shunemu, ɗa u kumbai gaɗi a̱ kunu ku ni a dama a na wu uvuka. 12 Ɗa u danai Gehazi vuza na u ci ya'anka yi ulinga <<Ɗeke vuka va.>> Ana u ɗeke ni, Ɗa u uwai u shamgbai kelime ka̱ ni. 13 Ilisha u danai ni <<Dana vuka va, <An wo okpoi vu ya'anka tsu ta̱ a̱ga̱nda̱, yiɗa̱i va kuciga n ya'anka wu? Vu ciga ta̱ n ya'anka mogono kadanshi ko n ya'anka kovonshi vo osoji kadanshi?> >>

Ɗa wu ushuki u danai, <<A̱'a̱, mi ta̱ n uma a̱va̱, a na e kuneke mu ili i na n cigai ra̱ka̱.>>

14 Ilisha we ecei Gehazi, <<Yiɗa̱i n kuya'anka yi?>> Gehazi u danai, <<Wi n maku mo kolobo ba, tana vali vi ni vu kutsa ta̱.>>

15 Ɗa Ilisha u danai, <<Ɗekei ni u ta̱wa̱ na.>> Ana u ɗeke ni, ɗa u ta̱wa̱i u shamgbai u tsutsu. 16 Ilisha u danai vuka va, <<Ka̱ya̱ ka̱ kuta̱wa̱ a makyan ma nampa vi ta̱ a̱ kuɓa̱na̱ maku mo kolobo ma̱ nu n a̱ kiye a̱ nu.>>

Ɗa u danai <<A̱'a̱, vuzagbayin vu va̱, vuma vu Ka̱shile, ka̱ta̱ vu doro mu ba.>>

17 Vuka va tana vu ya'in ka̱tsuma̱, a na ka̱ya̱ ko bonoi ɗa u matsai maku mo kolobo derere a makyan ma na u danai ni.

18 Ana maku ma mo gbonguroi, ɗa kanna kete u banai u cinai esheku a̱ ni, a̱ ubuta̱ wa aza a ulinga.

19 Babu arabali, <<Ɗa u lapai una̱ u danai esheku a̱ ni, kaci ka̱ va̱, kaci ka̱ va̱,>>

Ɗa esheku a̱ ni a danai kagbashi kete, <<Ɗika yi vu banka a̱na̱ku a̱ ni.>> 20 Ana u bankai a̱na̱ku a, ɗa u keɓe ni a̱ nkuta̱ ali kanna ke pecei, ɗa u kuwa̱i. 21 Ɗa u ɗikai maku ma u kumbai zuva a̱ kunu ku vuma vu Ka̱shile va, ɗa u va'ankai maku ma a iva'amkpatsu i ni, u gbagurai utsutsu wa ɗa wu uta̱i.

22 Ɗa u ɗekei vali vi ni u danai, <<N folono wu ta̱ su'uku mu n kagbashi kete m majaki, adama a na n suma a kubana u vuma vu Ka̱shile gogo'o ka̱ta̱ m bono.>>

23 Vali vi ni ve ecei ni, <<Yiɗa̱i ɗa vi a kubana wu a̱ ni anana? Ka̱ɗiva̱ ko wotoi u savu ka a ba, kpamu anana Ashibi a ɗa feu ba.>>

Ɗa wu ushuki u danai,<<Babu ko yoku.>> 24 U foɓusoi majaki ma. Ɗa u danai kagbashi ka,<<Zuwa majaki ma ma dakaka, ka̱ta̱ vu ka̱sa̱kpa̱i u wala sawu ba sai n dana wu.>> 25 Ɗa u ka̱na̱i uye, u banai a̱ ubuta̱ u vuma vu Ka̱shile va a kusan kugbayin ku Kamelu.

Ana vuma vu Ka̱shile we enei vuka va a̱ kuta̱wa̱, ɗa u danai Gehazi, <<La̱na̱, vuza va aza a Shunama ɗa lo a̱ kuta̱wa̱. 26 Suma vu gasa n a̱yi, ka̱ta̱ ve ece yi, <Vu ta̱wa̱ ta̱ gbaga? Vali vu nu vi ta̱ gbaga? Maku ma̱ nu tana?> >>

Ɗa wu ushuki u danai,<<Babu ko yoku.>>

27 Ana u yawai a̱ ubuta̱ u vuma vu Ka̱shile va a kusan ka, ɗa u remei ene a̱ ni. Ɗa Gehazi u ta̱wa̱i u ka̱'a̱ngu ni, ɗa vuma vu Ka̱shile va u danai,<<Ka̱sukpa̱ yi, adama a na wi ta̱ n una̱mgbi u ka̱tsuma̱ ka̱u. Vuzavaguɗu tana u sokongu mu ta̱, u dana mu ko yiɗa̱i ba.>>

28 Ɗa vuka va vu danai, <<Vuzagbayin n folono u ta̱ maku? N dana wu ba, <Ka̱ta̱ vu doro mu ba?> >>

29 Ɗa Ilisha u danai Gehazi, <<Foɓuso vu ɗika kalangu ka̱va̱ e kukiye ku nu, ka̱ta̱ vu suma vu bana a kpa'a ku vuka ka. Vu gasa baci n vuma ka̱ta̱ vu kya̱sa̱ yi ba. Ɗa baci tana vuza yoku u kya̱sa̱i nu, ka̱ta̱ vu ushuku yi ba. Vu va'anku yi kalangu ka̱va̱ ka a̱ a̱shi a maku a.>>

30 Ama a̱na̱ku a maku a, a danai Ilisha, <<Vuzavaguɗu wi baci n wuma, mi a̱ kuka̱sukpa̱ wu ba.>> Ɗa u ɗa̱nga̱i u banai n a̱yi.

31 Gehazi u lazai kelime ɗa u va'ankai kalangu ka a̱ a̱shi a maku ma, ama ko izumgbi, kpamu ko urotu u wuma. Ɗa Gehazi u bonoi kugasa n Ilisha a na wa dana yi, <<Maku ma ma̱ ɗa̱nga̱ ba.>>

32 Ana Ilisha u yawai a kpa'a ka, ɗa u cinai a va'ankai keven ka ikyamba ka a iva'ankpatsu i ni. 33 Ɗa u uwai punu u gbagurai utsutsu, a̱yi n maku ma koci, u ya'in avasa u Vuzavaguɗu. 34 Ɗa u vaki a̱ ma̱ka̱nga̱ ma maku ma, u zuwai una̱ u ni a̱ una̱ u maku wa a̱shi a̱ ni kpamu a̱ a̱shi a maku a, n a̱ ekiye a̱ ni a̱ ekiye a maku a. Ana u ba̱rukpa̱i ka̱ci ka̱ ni a ikyamba i maku ya, ɗa ikyamba i maku ya i suɗukpai. 35 Ilisha u ɗa̱nga̱i u ka̱na̱i nwalu a kubana n u bonoi a̱ kunu. Ɗa u doku u ba̱rukpa̱i ka̱ci ka̱ ni a ikyamba i maku ya. Ɗa maku ma ma dishai kucindere, ɗa u paɗukpai a̱shi a̱ ni.

36 Ilisha u ɗekei Gehazi u danai, <<Ɗeke a̱na̱ku a maku a, vuza va aza a Shunama a̱ ta̱wa̱.>> Ɗa u ɗekei vuka va. Ana u uwai ɗa Ilisha u danai ni, <<Ɗika maku ma̱ nu.>> 37 Ɗa u ta̱wa̱i u kuɗa̱ngi e ene a̱ ni, u kuɗa̱ngi ali iɗika, ɗa u ɗikai maku ma̱ ni wu uta̱i.

38 Ilisha u bonoi a Gilga, u cinai kambulu a iɗika ya. Kanna kete a na ka̱kuma̱ ke eneki ki ida̱shi koɓolo n a̱yi, ɗa u danai kagbashi ka̱ ni, <<Daɓamgu mogbodo magbayin akina, vu ya'anka eneki ilikulya'a.>>

39 Vuza vu te a̱ ka̱tsuma̱ ka aza a ulinga a u uwai a kakamba kula̱nsa̱ itacishi. Ɗa u taɓai umaci u ni u shatangi motogu ma̱ ni, ana u bonokoi a kpa'a. Ɗa u miryai u tsungi o mogbodo mi ilikulya ya, babu vuza na u yeve ko yiɗa̱i. 40 Ɗa a̱ tsuwa̱nka̱i uma adama a na a lya'a. Ana i punu a kulya'a ilikulya'a ya, ɗa o ɓosoi ka̱da̱wuri a danai, <<Vuma vu Ka̱shile, yaza yi ta̱ punu o mogbodo ma.>> Ɗa a iwain kulya'a ilikulya'a ya. 41 Ilisha u danai, <<A̱ tuka̱ n kiya.>> Ana a̱ tukai, ɗa u tsungi punu o mogbodo mi ilikulya'a ya ɗa u danai, <<Pecekei uma adama a na a lya'a.>> Ɗa tana wo okpoi nannai babu koyoku.

42 Vuma vu yoku wu uta̱i a Balu-shelisha, u tuka̱i vuma vu Ka̱shile n a̱kutsu o boroji kamanga a na a ya'in n ili i kashina i nai gita̱i kuge'we. Koɓolo n aza a̱ ta̱ku a kaburma ka̱ ni. Ɗa Ilisha u danai,<<Nekei uma adama a na a lya'a.>>

43 Ama kagbashi ka̱ ni ka danai, <<Vi ta̱ e kene adanshi i ɗa yi ta̱ a kuyawa uma amangatawun?>> Ilisha u danai ni, <<Neke le a lya'a, adama a na Vuzavaguɗu u dana ta̱, <I ta̱ a ku lya'a ali a̱ ka̱sukpa̱ kagimi.> >> 44 Ɗa kagbashi ka ka nekei le ilikulya'a, ɗa a lya'i ali a̱ ka̱sukpa̱i kagimi, tsu na kadanshi ka Vuzavaguɗu ka dansai.